АПОСТОЛ Павелдиң чанында Тимофе́й деп аттыг элээди оол тур. Ол ада-иези-биле Листрада чурттап турар. Ооң авазының ады Евни́ка, а кырган-авазының — Лоида.

Листра хоорайга Павел ам үш дугаар доктаап турар. Бо хоорайга бир дугаар Павел Варна́ва-биле кады бир хире чыл бурунгаар бодунуң миссионержи аян-чоруунуң үезинде чораан. Ам Павел бодунуң эжи Си́ла-биле келген.

Павел Тимофе́йге чүнү саналдап турарыл, билир сен бе? ‘Мээң-биле база Сила-биле чоруур сен бе? Ырак черлерде кижилерге суртаал кылыр кылдыр? — деп, Павел Тимофе́йден айтырган.

— Ийе, силер-биле чоруксап тур мен,— деп, Тимофе́й харыылаан.— Удаваанда Тимофе́й төрелдерин каггаш, Павел болгаш Си́ла-биле чорупкан. Ынчалза-даа оларның аян-чоруунуң дугайында билип алырының бетинде, ооң мурнунда Павел-биле чүү болганын көрээлем. Дама́скы оруунга Иисус аңаа көстүп келгенинден бээр, 17 хире чыл эрткен.

Сактып кел даан, Павел Дама́скыже, Иисустуң өөреникчилерин истеп сүрер дээш бар чыткан, ол ам боду ооң өөреникчизи! Сөөлүнде барып чамдык дайзыннар Павелди өлүрер деп бодап алган — Павел Иисустуң дугайында өөредип турар боорга, олар таарзынмайн турар. Ынчалза-даа өөреникчилер Павелдиң дезе бээринге дузалаан. Олар ону корзина иштинге олурткаш, хоорайның даштынче ханадан бадырыпкан.

Ооң соонда Павел Антио́хияже суртаал кылып чорупкан. Иисустуң өөреникчилери бир дугаарында христианнар деп ол хоорайга адаткан. Оон Антио́хиядан Павел биле Варна́ваны ырак чурттарже миссионержи аян-чорукче чоргускан. Оларның барган хоорайларының бирээзи,— Листра, ында Тимофе́й чурттап турар.

Бир хире чыл эрткенде, Павел бодунуң ийи дугаар миссионержи аян-чоруунуң үезинде, катап база Листрага келген. Павел, Си́ла база оларга каттышкан Тимофе́й кайнаар углап бар чыдарын, билир сен бе? Картаже көргеш, ол черлерниң чамдыызы-биле таныжып алыылам.

Баштай олар Листраның чанында турар Икония хоорайже баргаш, ооң соонда ийи дугаар Антио́хия дээр хоорайже чорупканнар. Оон олар Троа́дага чедир үнгеш, оон Фили́ппы, Фессало́ника база Верия деп хоорайларга четкеннер. Картада Афи́ны деп хоорайны көрүп тур сен бе? Павел аңаа база суртаалдап турар. Ооң соонда олар бүдүн чартык чыл иштинде Кори́нфте суртаалдап турар. Аян-чоруунуң төнчүзү келгенде, олар түр када Эфе́ске доктааган. Кесарияже корабльга эглип келгеш, оон Антио́хияже чорупкан, аңаа Павел артып калган.

Ындыг янзылыг Тимофе́й Павел-биле чүс-чүс километрлер эрткеш, аңаа «буянныг медээ» суртаалдаарынга база хөй чаа христиан хуралдар үндезилээринге дузалашкан. Сен өзүп келгеш, Тимофе́й ышкаш Бурганның шынчы бараалгакчызы болур сен бе?