КӨР ДААН — бир-ле коргунчуг чүүл болуп турар! Иисусту шаажылап турар. Ону чагыда кадап каан. Хол-будун кадаглар-биле кадап каан. Ынчалза-даа Иисусту мынчаар аажылаар деп кымның бажынга киргенил?

Иисусту көөр хөңнү чок хуу-боттар бар. Билир сен бе, кымнарыл? Оларның бирээзи — Нүгүлчү Эрлик-тир. Иеговага дыңнангыр эвес боор кылдыр, Ада́м биле Е́ваны ол күткээн. Иисустуң дайзыннарын ол коргунчуг кем-херек үүлгедиишкин кылыр кылдыр база ылап-ла ол күткээн.

Иисусту азып кадаарының мурнунда, дайзыннар каржызы-биле ону куду көрүп турган. Сактыр-дыр сен бе, Гефсиман садынга олар келгеш, Иисусту канчаар хоругдап алганнар ийик? Ол дайзыннар кымнар турганыл? Шын-дыр — шажын баштыңчылары. Улаштыр чүү болган эвес, билип алыылам.

Иисусту шажын баштыңчылары тудуп хоругдап алырга, апостолдары тарадыр халчып чоруй барган. Олар кортканындан Иисусту чааскаандырзын дайзыннар-биле каапкан. Ырак эвеске чүгле Пётр биле Иоа́нн апостолдар артып кааннар. Ооң соонда Иисус-биле чүү болурун көөр дээш, соондан чоруп олурарлар.

Иисусту ооң мурнунда дээди бараалгакчы кылдыр бараалгап турган Анна деп аттыг улгады берген кижиге эккелгеннер. Ынчалза-даа маңаа олар үр болбаан. Оон Иисусту Каиафага аппарган, ол үеде ол дээди бараалгакчы болуп бараалгап турар. Ооң бажыңынга хөй шажын баштыңчылары чыылган.

Ынчангаш маңаа, Каиафаның бажыңынга, Иисусту шиидип турарлар. Бээр Иисусту нүгүлдеп турар кижилерни эккелгеннер. Шажын баштыңчылары шупту деңге негеп турар: ‘Иисусту өлүрүп шиидер’. Оон ооң арнынче дүкпүрүп, чудуруктары-биле шашкылап турар.

Ол үеде Пётр херим иштинге турган. Дүне соок боорга, кижилер одаг кыпсып алган. Кажан олар одагга чыннып турда, бир херээжен чалча Пётрже көргеш, алгыра берген: ‘Бо кижи Иисус-биле турду’.

— Чок, турбаан мен!— деп, Пётр аашкынган.

Үш катап улус аңаа Иисус-биле турган сен деп чугаалаан. Ынчалза-даа Пётр харыы бүрүзүнде-ле ойталап турар. А кажан ол үш дугаар ойталаарга, Иисус эргилип келгеш, ооң талазынче көрүпкен. Мегелепкени дээш Пётрга дыка багай болу берген: ол үнүп келгеш муңгарап ыглай берген.

Пятницада даң адып олурда, дээди бараагакчылар Иисусту синедрио́нга эккелген — ол улуг өрээл, ол черле чыыштары болур чери-дир. Маңаа олар сүмележип турарлар: улаштыр Иисус-биле чүнү кылырын. Оон ону Иуде́я девискээриниң чагырыкчызы По́нтий Пила́тка чедире бергеннер.

— Бо өөдежок кижи-дир,— деп, Иисусче дээди бараалгакчылар нүгүлдээн.— Ону шиидип өлүрер херек.— Кыска байысаалга соонда Пила́т кайгап турар: ‘Мен бо кижиде бичии-даа багай чүве көрбейн тур мен’. Ынчангаш Пила́т Иисусту И́род Антипаже чорудупкан. И́род Галиле́яны чагырып турар-даа болза, ол үеде Иерусали́мге турган. И́род база Иисуста кандыг-даа буруу көрбейн турар, ынчангаш Иисусту катап Пила́тче чоргускан.

Пила́т Иисусту хостаарын күзеп турар. Ынчалза-даа Иисустуң дайзыннары ооң орнунга өске бир хоругдаттырган кижини хостаар кылдыр негеп турар. Дээрбечи Варавваны. Дүъш дүжер деп барган, Пила́т Иисусту чонга үндүрүп эккелген. База чарлаан: ‘Көрүңер! Бо-дур силерниң хааныңар!’— ‘Ону ыңай аппар! Ону өлүрүп каавыт! Өлүрүп каавыт!’— деп, дээди бараалгакчылар кускуннап алгыржып турар. Ынчан Пила́т Варавваны хостапкан, а Иисусту өлүмге шиидер дээш аппарган.

Пятницада хүндүс Иисусту чагыга чыпшыр кадап каан. Ооң ийи талаккы кыдыында база-ла чагыларда, өлүмге шииттирген ийи кем херек үүлгедикчилерин азып каан, — бо чурукта олар көзүлбес-тир. Иисустуң өлүмүнүң мурнунда кем херек үүлгедикчилериниң бирээзи дилээн: ‘Чагыргаңга келгеш, мээң дугайымда сактып келем’.— ‘Сеңээ аазап тур мен, Дываажаңга мээң-биле турар сен’,— деп, Иисус харыылаан.

Ол аазаашкын кайгамчык эвес-тир бе? Иисус кандыг дываажаң дугайында чугаалап турар, билир сен бе? Бурганның эң-не эгезинде-ле чаяап кааны дываажаң каяа турган ийик? Шын-дыр — чер кырынга. Иисус дээрге хааннай бергеш, ол кижини чер кырынга дываажаңга аас-кежиктиг чурттаар кылдыр диргизер. Бис аңаа өөрүвес бис бе?