ИИСУСЧЕ көр даан. Ам ол кижилерни Галиле́яда бир даг кырында өөредип турар. Аңаа чоок кылдыр ооң өөреникчилери олурар. Он ийи кижи апостолдар кылдыр шилиттинген. Апостолдар дээрге Иисустуң тускай өөреникчилери-дир. Оларның аттарын билир сен бе?

Си́мон Пётр, а ооң акызын Андре́й дээр. Өске кады төрээн алышкыларны Иа́ков биле Иоа́нн дээр. Дараазында ийи апостолдар база бар, оларны Иа́ков биле Си́мон дээр. Өске ийи апостолдар Иу́да деп дөмей аттарлыг. Бирээзиниң адын Иу́да Искарио́т дээр, а өскезин Иу́да Фадде́й деп адаар. А арткан апостолдарның аттары мындыг: Фили́пп, Нафанаи́л (Варфоломе́й база дээр), Матфе́й биле Фома́.

Иисус Сама́риядан эглип келгеш: ‘Дээрде Чагырга чоокшулаан’,— деп бир дугаар суртаалдаан. Ол чүү деп чагырга, билир сен бе? Ол дээрге ёзулуг шын бар Бурганның чазаа-дыр. А Иисус ол чазактың хааны. Дээрден башкарып тура, Иисус чер кырынга тайбыңны тургузар. Бурганның чагыргазының үезинде бүгү чер чаартынар база кайгамчык дываажаң болу бээр.

Ам Иисус кижилерни чагырга дугайында өөредип турар. ‘Шак мынчаар мөргүүр ужурлуг силер,— деп, ол тайылбырлаан.— Дээрде бистиң Адавыс, сээң адың алдаржызын. Сээң чагыргаң келзин. Сээң күзелиң дээрде дег, черге база күүсеттинзин’. Хөй кижилер бо мөргүлдү «Дээргиниң мөргүлү» деп адап турар. Өскелери — «Бистиң Адавыс» дээр. Мөргүлдүң шуптузун катаптап шыдаар сен бе?

Иисус оон ыңай чонну бот-боттарынга кандыг хамаарылгалыг болурун өөредип турар. ‘Силерге улус кандыг хамаарылгалыг болзун деп күзей-дир силер, боттарыңар база улуска ындыг хамаарылгалыг болуңар’. Кажан өскелер сеңээ эки хамаарылгалыг болурга, сеңээ таарымчалыг эвес-тир бе? Ынчангаш бистиң өске улуска хамаарылгавыс база ындыг болур ужурлуг деп, Иисус чугаалап турар. Бир эвес кижи бүрүзү эки хамаарылгалыг болур болза, черге дываажаңга чурттаары кайгамчык болур эвес-тир бе?