БИР КАТАП Иисус бир-ле кижиге чанында кижизинге ооң ынак болур ужурлуун чугаалаан. Ынчан ол кижи Иисустан айтырган: ‘Мээң чанымда кижим деп кымыл? Ынчалзажок Иисус ол кижиниң чүү бодап турарын билир. Чүгле ооң язы-сөөгүнден база чүдүлгезинден кижилер чанында кижизи болур деп, ол санап турар. Ынчангаш көрээлем, ооң оозунга Иисус чүү деп харыылаар эвес.

Чамдыкта бир-ле чүүлге өөредир дээш, Иисус кандыг-бир төөгү чугаалап бээр турган. Бо удаа база ынчалган. Ол бир иуде́йниң база бир самари́йжиниң дугайында төөгү чугаалап берген. Иуде́йлерниң хөй кезии самари́йжилерге ынак эвес деп, ооң мурнунда билип алган бис. Иисустуң төөгүзү мындыг.

Бир катап бир иуде́й кижи Иерихо́н хоорайже дагда оруктап бадып орган. Хенертен олче дээрбечилер халдай берген. Ооң акшазын хунаап алгаш, ону эттеп-эттеп, чүгле тынныг кылдыр арттырып каан.

Бичии үе эрткенде ол-ла оруктап иуде́й бараалгакчы эртип бар чыткан. Ол эттеткен кижини көрүп каан. Чүү деп бодаар сен, ол канчанган? Канчап?! Ол анаа-ла оруктуң бир чарыынче эрткеш, улаштыр кылаштап чоруй барган. Оон чоогундан өске хөлчок бүзүрелдиг кижи эртип бар чыткан. Леви́т кижи. Ол канчаар ирги? Чок — ол база эттеткен кижиге дуза кадып доктааваан. Көрүп тур сен бе, бараалгакчы биле леви́т орукту куду ырап бар чыдырлар.

Ынчалза-даа көр даан, эттеткен кижиниң чанында ам кым олурар-дыр. Самари́й кижи. Ам ол иуде́й кижиге дуза чедирип тур. Ооң балыгларынга эм чаап турар. А ооң соонда иуде́йни дыштанып алыр база эккирип алыр черже чедирип каан.

Ол төөгүнү чугаалааш, Иисус айтырыг салган кижиден айтырган: ‘Сээңии-биле алырга, ол үш кижиниң кайызы эттеткен кижиниң чанында кижизи кылдыр кылган-дыр? Бараалгакчы бе, леви́т бе азы самари́й кижи бе?’

— Самари́й кижи. Эттеткен кижиге ол буянны кылган,— деп, ол кижи харыылаан.

— Шын-дыр. Ынчангаш сен база өске кижилер-биле ол дег, кылып чор.

Шынап-ла, Иисус эки өөредир-дир бе? Библияда Иисустуң чугаалап турар шупту чүүлге кичээнгейлиг болур болзувусса, бис база хөй чүүлге өөренип алыр эвес-тир бис бе?