ОРУК кыдыынга диленип орган ийи согур улусту эмнээн соонда, Иисус үр болбаанда Иерусали́мден ырак эвесте улуг эвес суурга чедип келген. База ийи өөреникчилеринден дилээн: ‘Суурже баргаш келиңерем, оон бичии элчиген тып аар силер. Ону чешкеш, меңээ чедип эккелиңер’.

Кажан элчигенни чедип эккээрге, Иисус ону мунуп алган. Оон Иерусали́мче чортупкан. Хоорайның чанынга Иисусту хөй бөлүк кижилер уткуп алган. Хөй кижилер даштыкы хевин ужулгаш, ону орукка чада салып турарлар. Өскелери пальманың бүрүлерин кезип алган. Оларны орукка чатпышаан, улуг өөрүшкү-биле алгырып турарлар: ‘Иегованың ады-биле чортуп олурар хаанны Бурган йөрээзинем!’.

Бурунгу үеден тура мындыг чаңчыл бар: чонга бодун көргүзер күзелдиг чаа хаан, Иерусали́мче элчиген мунуп алгаш, чортуп кирер. Шак ону ам Иисус кылып турар. Иисус оларны чагырзын деп, күзелин кижилер көргүзүп турар. Ынчалза-даа ону шуптузу эвес күзеп турар. Ону бис өргээге болган чүүлден көөр бис.

Өргээге келгеш, Иисус согур база бертик улусту эмнеп турар. Ол дээш ажы-төл Иисусту ыыткыр кылдыр алдаржыдып турар. А дээди бараалгакчылар килеңнеп ажынгаш, Иисустан айтырган: ‘Ажы-төл чүү деп алгыржып турар-дыр, дыңнап тур сен бе?’

— Ынчанмайн канчаар, дыңнап тур мен,— деп, оларга Иисус харыылаан.— ‘Бурган ажы-төлдүң үнү-биле алдарны үндүрер’ деп номчуваан эвес силер?— Оон чаштар Бурганның тургускан хаанын алдаржыдарын уламчылааннар.

Бис бо уругларга дөмей болуксаар эвес бис бе? Бурганның чагыргазының дугайында чугаалаарынга биске кандыг-бир улус шаптыктап турар чадавас. Ынчалза-даа бир эвес бис Иисустуң келир үеде кижилерге кылыр ол бүгү кайгамчыктыг чүүлдер дугайында өске улуска чугаалаарын уламчылаар болзувусса, шын кылыр бис.

Иисус черге турда, ооң хаан бооп чагырар үези ам-даа келбээн турган. Ол үе кажан келирил? Ону Иисустуң өөреникчилери база билип алыксап турар. Бис ооң дугайында дараазында эгеден билип алыр бис.