БО БИЧИИ уруг 12 харлыг. Ооң холун тудуп алган кижи — Иисус, а чанында ооң ачазы биле авазы тур. Билир сен бе, олар чүге ынчаар өөрүп турарыл? Билип алыылам, че.

Бо бичии уругнуң ачазы — Иаир деп аттыг билдингир ат-сураглыг кижи. Бир катап бичии уруг аарый бээрге, ону орунга чыттырып каан. Ынчалза-даа ол экирбейн туруп берген. Шуут дедир — суларап бар-ла, бар-ла чыдар. Иаир кадайы-биле хөлчок дүвүреп турар, чүге дизе, сактырга, уруг ам дораан өлүп каар ышкаш. Ол — оларның дың чаңгыс уруу ышкажыгай. Ынчангаш Иаир Иисусту дилеп чорупкан. Ол ооң мурнунда Иисустуң хуулгаазыннарының дугайында дыңнаан турган.

Иаир Иисусту дыка хөй улус долганып алган турда тып алган. Хөй улус аразы-биле эрткеш, ол Иисустуң буттарынче доңгая кээп дүшкен. ‘Мээң уруум аар-берге аараан. Өршээп көр, келгеш ону экиртип көрем’,— деп, ол чаннып турар. Иисус чөпшээрешкен.

Орук ара улус дам-дам көвүдээш, Иисусту кызагдап турар. Ол хенертен тура дүшкеш, долгандыр көрүп эгелээн. ‘Кым меңээ дээпти?’— деп, ол айтырган. Иисус миннип турарга, оон күш үне берген болган, ынчангаш ол бир-ле кижи аңаа дегген деп билип каан. Ынчаарга кым ынчаш? Ол херээжен кижи болган — барык 12 чыл аар-берге аарыг-биле хилинчектенип келген. Ол чоокшулап келгеш, Иисустуң хевинге дээпкеш, экирий берген!

Иисустуң улусту белени-биле эмнептерин көргеш, Иаир бичии оожургай берген. Ынчалза-даа хенертен медээлиг кижи келген. ‘Иисусту ам дүвүретпе — деп, Иаирден ол дилээн — Сээң урууң өлүп калды’. Иисус ону көргеш, Иаирге чугаалаан: ‘Дүвүреве, шупту чүве эки болур’.

Иаирниң бажыңынга ам-на чеде бергеш олар ыглажып турган улусту көрүп кааннар. Ынчалза-даа Иисус чугаалаан: ‘Ыглашпаңар. Уруг өлбээн. Ол анаа удуй берген’. Ынчалза-даа олар Иисусту кочулап эгелээн, чүге дизе уруг өлген деп чигзинмээннер.

Ынчан Иисус ооң ада-иези болгаш үш апостолдары-биле өлген уругнуң чыдар өрээлинче эрте берген. Уругну холдарындан туткаш дужааган: ‘Туруп кел!’ Ынчангаш, сээң көрүп турарың-биле, уруг дирлип келген. Ол туруп келгеш, өрээлинге кылаштай берген! Ынчангаш ооң авазы биле ачазы хөлчок өөрүп турары ол-дур.

Иисустуң кижи диргискени ол бир дугаары эвес. Библияда чугаалап турары-биле, бир дугаарында Наин хоорайда дулгуяк кадайның оглу турган. Ооң соонда Иисус Мария биле Ма́рфаның акызын Ла́зарьны база диргискен. Кажан Иисус Бурганның томуйлаан хааны болуп, чагыра бээр үеде, ол дыка хөй улусту диргизер. Бо чүүл өөрүнчүг эвес-тир бе?