КӨР ДААН, ол бичии оолду Иисус канчаар куспактап алган-дыр? Иисус уруглар дээш ёзулуг сагыш човап турар деп көскү. Ону кыдыындан хайгаарап көрүп турар эр улус — Иисустуң апостолдары. Ам Иисус оларга чүнүң дугайында чугаалап турар ирги? Билип алыылам.

Иисус апостолдары-биле үр аян-чоруктан чаа-ла эглип келген. Орук ара апостолдарның аразында маргыш тургустунуп келген. Ынчангаш олар Иисуска келирге, ол олардан айтырган: ‘Орук ара чүнүң дугайында маргыжып чордуңар?’ Херек кырында чүнүң дугайында маргыш болганын Иисус билир турган. Ынчалза-даа олар аңаа шынын чугаалаар бе азы чок бе — көөр дээш олардан айтырган.

Апостолдарның ыыды чиде берген, чүге дизе орук ара кым оларның аразында улуг деп маргыжып чорааннар. Чамдык апостолдар өскелерден улуг болуксаар. Өскелерден улуг болур күзел шын эвес деп, Иисус оларга канчаар тайылбырлап бээрил?

Ол бичии оолду кыйгыргаш, апостолдарның мурнунга тургузуп каан. Ооң соонда оларга чугаалаан: ‘Тодаргайы-биле билип алырыңарны күзеп тур мен: бир эвес эттинип албас болзуңарза, база чаш уруглар дег апарбас болзуңарза, Бурганның чагыргазынче канчап-даа кирбес силер. Бо бичии уруг ышкаш апарган кижи чагыргада эң-не улуг кижи болур’. Чүге Иисус ынча дээн, билир сен бе?

Колдуунда чаш уругларны: олар өскелерден улуг азы чугула бе деп чүүл дүвүретпейн турар. Ынчангаш апостолдар бичии уруглардан өөренмишаан, кым улуг база чугула деп маргышпас ужурлуг турган.

Иисус бичии уругларга кайы-хире ёзулуг сонуургалдыын каш-даа удаа көргүскен. Каш ай эрткенде чамдык улус Иисуска уругларын эдертип эккелген. Апостолдар оларны Иисусче эртирбейн турган. Ынчалза-даа Иисус апостолдарга дужааган: ‘Бичии уруглар меңээ кээп турзун, оларга шаптыктаваңар, чүге дээрге Бурганның чагыргазы олар ышкаш улустуу болур’. Иисус уругларны куспактавышаан, оларны йөрээп турар. Иисус бичии уругларга ынак деп билип алырга, өөрүнчүг эвес-тир бе?