УЛУГ улус-биле хөөрежип олурар, бо оолче көрем. Бо улус — Иерусали́мде Бурганның өргээзинден башкылар-дыр. А оол — Иисус-тур. Ол ам өзүп келген. Ол 12 харлыг.

Башкылар хөлчок кайгаан: Иисус кайыын Бурганның дугайында база Библия дугайында ынча хөйнү билир болган чоор. А чүге мында Мария-даа, Иосиф-даа чогул? Ам олар кайдал? Билип алыылам.

Чылдың-на Иосиф өг-бүлези-биле Иерусали́мге Па́сха дээр тускай байырлалче кээр турган. Назаре́т хоорай Иерусали́мден ыракта турар. Кымда-даа машиналар болгаш поездилер чок. Ол үеде машиналар-даа, поездилер-даа шуут чок турган. Кижилерниң хөй кезии чадаглап чоруур: оларга Иерусали́мге чедип алыр дизе, үш хире хонук херек.

Ол үеге чедир Иосифтиң өг-бүлези улуг апарган. Ынчангаш ол Иисустуң бичии кыс биле эр дуңмаларын база карактаар апаар. Ам Иосиф биле Мария ажы-төлү-биле ырак Назаре́тче чаныпкан. Иисус өске улус-биле кел чыдар деп, олар бодап турар. Ынчалза-даа хүн төнчүзүнде олар доктааптарга, Иисус кайда-даа чок болган. Төрелдер-даа аразында, таныыры-даа улус аразында! Ынчангаш олар Иерусали́мче катап баргаш, Иисусту дилеп турарлар.

Ам-на Иисусту бо башкылар-биле олурда тып алганнар. Ол кичээнгейлиг дыңнап база олардан айтырыглар салып олурган. Шупту ооң мерген угааныын кайгаан. Ынчалзажок Мария айтырган: ‘Оглум, сен бисти ынчап канчаарың ол? Бис ачаң-биле сени дилеп, сагышсырап турдувус’.

— А чүге мени дилеп турар улус силер?— деп, Иисус кайгаан.— Мени Адамның бажыңынга турар ужурлуг деп, канчап билбес улус силер?

Ийе, Иисус Бурганның дугайында хөйнү билип алыр черге турарынга ынак. Бис база шак-ла ону миннир ужурлуг эвес-тир бис бе? Неделя санында-ла бодунуң бажыңынга Назаре́тке Иисус чүдүлге чыыштарынче барып турган. Ол кезээде кичээнгейлиг болгаш Библияны эки билир. Бис база Иисус ышкаш болуулам, че.