КЕЗЕК 2

Суг халавындан эгелээш Еги́петтен хосталырынга чедир

Суг халавын чүгле сес кижи чурттап эрткен, чоорту оларның саны көвүдеп, хөй-хөй муңнар четкен. Үер соонда 352 чыл эрткенде, Авраа́м төрүттүнүп келген. Бурган канчаар бодунуң сөзүн ээлеп, Авраа́мга Исаа́к деп аттыг оолду бергениниң дугайында билип алыр бис. Оон Бурган Исаа́ктың ийи оглунуң аразындан Иа́ковту канчаар шилип алганының дугайында база билип алыр бис.

Иа́ковтуң өг-бүлези улуг турган: 12 оол болгаш каш кыс. Иа́ковтуң он оглу хеймер дуңмазын Ио́сифти көрбестей бергеш, Еги́петче кул кылдыр садыпканнар. Сөөлүнде барып Ио́сиф Еги́петтиң ат-алдарлыг чагырыкчызы апарган. Улуг аш-чут эгелей бээрге, акыларының чүрээ өскерилген бе деп, билип алыр дээш, ол оларны хынаан. Адак сөөлүнде, Изра́иль чон деп адаттынган, Иа́ковтуң бүгү өг-бүлезиниң кежигүннери Еги́петче көже берген. Ол чүүл Авраа́м төрүттүнген соонда, 290 чыл эрткенде болган.

Дараазында 215 чыл дургузунда Изра́иль чон Еги́петке чурттап турган. Ио́сиф өлген соонда, олар аңаа кулдар апарган. Кезек үе эрткенде Моисе́й төрүттүнүп келген, ынчангаш Бурган ону таварыштыр Изра́иль чонну Еги́петтен хостаан. Ниитизи-биле алырга, ИЙИ ДУГААР кезекче 857 чыл дургузунда болган төөгү кирип турар.