КӨРЕМ, Авраа́м чүнү кылып турар-дыр? Ооң холунда бижек, оглун өлүрер деп турар ышкаш-тыр. Ынчалза-даа ол ону чүге кылыр деп турар ирги? Баштай Авраа́м биле Са́рраның оглу кайыын тыптып келгенил, билип алыылам.

Сактып келем, олар оолдуг болур деп, Бурган аазаан болгай. Ынчалза-даа Авраа́м биле Са́рраның назы-хары дыка улгаткан болганда, ол чүүлдүң болдунары аргажок берге ышкаш кылдыр сагындырып турган. Ынчалзажок Бурган болдунмас чүүлдү безин кылыптар деп, Авраа́м бүзүреп турган. Ынчап кээрге, чүү болганыл?

Бурганның аазаашкын берген хүнүнден бээр, барык бир чыл эрткен. Ынчап кээрге, Авраа́м 100 харлыг турда, а Са́рра 90 харлыг турда, оларның Исаа́к деп аттыг оглу төрүттүнген. Бурган бодунуң аазаашкынын күүсеткен!

Кажан Исаак өзүп кээрге, Иегова Авраа́мның бүзүрелин хынаан. Ол: ‘Авраа́м!’ — деп кыйгырган — ‘Бо мен!’ — деп, Авраа́м харыылаан. Ынчан Бурган мындыг даалга берген: ‘Бодуңнуң оглуңну — бодуңнуң кара чаңгыс оглуң — Исаа́кты алгаш, мээң айытканым даг кырынче үнүп кел. Аңаа бодуңнуң оглуңну өлүргеш, ону өргүл кылдыр бер’.

Ол сөстер Авраа́мның сагыш-сеткилин дыка-ла муңгараткан — бодунуң оглунга ол дыка ынак турган болгай. База бир чүүлдүң дугайын сактып кел даан: Авраа́мның ажы-төлү Ханаан черинге чурттаар деп, Бурган аазаан болгай. Бир эвес Исаа́к өлүп каар болза, ол чүүл канчап күүсеттинерил? Авраа́м ону чедир билбейн турган-даа болза, ол дөмей-ле Бурганга чагыртып турган.

Даг кырынче үнүп келгеш, Авраа́м Исаа́кты хүлүп-шарааш, ооң мурнунда-ла белеткеп каан өргүл салыр черже ону чыттырып каан. Ооң соонда ол оглун өлүрери-биле бижек уштуп экелген. Ынчалза-даа шак ол үеде дээрниң төлээзи кыйгы салган: ‘Авраа́м, Авраа́м!’ — ‘Бо мен!’ — деп, Авраа́м харыы берген.

— Оолга кандыг-даа хора чедирбе, ооң-биле чүнү-даа кылба,— деп, Бурган аңаа мынча дээн.— Меңээ бүзүрелиңниң улуун ам-на билдим, чүге дизе сен бодуңнуң оглуңну — кара чаңгыс оглуңну — мен дээш харамнанмаан сен.

Авраа́мның Бурганга бүзүрели кандыг кончуг улуг турган-дыр! Иегованың кылып шыдавас чүвези чок, база Иегова Исаа́кты өлгеннерден диргизип шыдаптар деп, ол бүзүреп турган. Херек кырында Авраа́м Исаа́кты өлүрзүн деп, Бурган күзевээн. Ынчангаш Бурган хараганнар аразында мыйызы-биле ораажы берген кошкар турар кылдыр кылыпкан, оон оглунуң орнунга өргүл кылдыр ону эккээрин ол Авраа́мга дааскан.