ООҢ акылары ол-ла хевээр кара сагыштыг болгаш кээргээр сеткили чок бе деп чүвени, Ио́сиф билип алыксап турар. Ынчангаш ол чугаалаан: ‘Силер — шпионнар-дыр силер. Бистиң чуртувустуң кошкак талаларын көрүп алыр дээш, келген силер’.

— Чок, бис шпионнар эвес бис,— деп, олар харыылаан.— Шынчы улус бис. Шупту алышкылар-дыр бис. Он ийи турган бис. Ынчалза-даа бир дуңмавыс ам чок, а эң хеймеривис ачавыс-биле бажыңда артып калган.

Ио́сиф оларга бүзүревейн турар кылдыр мегеленген. Симео́н дээр акызын ол кара-бажыңга арттыргаш, өскелеринге аъш-чем бергеш, бажыңынче салыпкан. Ынчалза-даа байырлажып тургаш, ол оларга мынча дээн: ‘Дараазында кээрде, эң хеймер дуңмаңарны эдертип алгаш кээр силер’.

Ханаа́нче чанып келгеш, акышкылар адазы Иа́ковка оларның-биле чүү болганының дугайында шуптузун чугаалап берген. Иа́ков ол дээш хөлчок муңгараан. ‘Ио́сиф чок-тур,— деп, ол ыглап турар,— ам Симео́н база чок. Эң хеймер оглум Вениами́нни алырын чөпшээревес мен’. Ындыг-даа болза оларның чиир чеми көңгүс төнүп каарга, Иа́ков ам база өг-бүлезинге аъш-чем тып бээр дээш, Вениами́нни Еги́петче ап алыр кылдыр чөпшээрээр ужурга таварышкан.

Ынчап кээрге, Ио́сиф акыларының кел чыдарын көрүп каан. Ол бодунуң хеймер дуңмазын Вениами́нни көрүп кааш, дыка амыраан. Ол улуг дарга — Ио́сиф деп, оларның кайызы-даа билбейн турары, чугаажок. Бо удаада Ио́сиф бодунуң чаңгыс адалыг 10 акыларын хынаары-биле, бир-ле чүвени кылыпкан.

Ол чалчаларынга шупту акыларының шоодайларын чем-биле долдурарын дужааган. Олардан бүдүү Вениами́нниң шоодайынче бодунуң тускай мөңгүн аяан ол супкан. Олар ындыг кончуг ыраваанда, Ио́сиф оларның соондан чалчаларын чорудупкан. Оларны сүрүп четкеш, чалчалар айтырган: ‘Бистиң хайыраатывыстың мөңгүн аяан чүге оорлаан силер?’

— Бистер ооң аяан албаан бис,— деп, шупту акылары харыылаан.— Бир эвес кайы-бирээвистен аякты тып алыр болзуңарза, ол кижи амы-тынындан чарылзын.

Ынчап кээрге, бо чурукта көрүп турарың ышкаш, чалчалар шупту шоодайларны үжээш, Вениами́нниң шоодайындан аякты тып алган. Ынчан олар мынча дээн: ‘Шуптуңар чоруп болур силер, а Вениами́н бистиң-биле чоруур’. 10 алышкы ам канчаарыл?

Олар шуптузу Вениами́н-биле кады Ио́сифтиң бажыңынче катап чедип келгеннер. Ио́сиф акыларынга дужааган: ‘Силер шуптуңар чанып болур силер, а Вениами́н артып калгаш, мээң кулум болур’.

Ынчан Иу́да чаннып чугаалап-тыр: ‘Бир эвес мен оолду албайн чана бээр болзумза, мээң ачам өлүп каар, чүге дизе ол аңаа аажок ынак. Өршээп көрүңер, кул кылдыр мени арттыргаш, оолду чана бээринге чөпшээреп көрүңерем’.

Ооң акылары өскерли берген, деп Ио́сиф көрген. Ам олар кээргээр сеткил чок эвес база кара сагыштыг эвес апарган. Ынчан Ио́сиф чүнү кылыпканыл, көрүп көрээлем.