КӨРЕМ, мында чүү болуп турар-дыр! Моисе́й даянгыыжын Кызыл далайже угландырыпкан. Ооң чанында, айыыл чок талада, изра́ильчилер турар. Фарао́н болгаш ооң аг-шерии далайда дүжүп турар. Ол канчап ындыг болганыл, көрүп көрээлем, че.

Бистиң билип алганывыс-биле алырга, Бургандан 10 дугаар шаажының соонда, фарао́н изра́ильчилерге Еги́петтен үнүп чоруурун дужааган. Шуптузун алырга 600 000 хире изра́ильчи эр кижилер база эңмежок херээженнер ажы-төлү-биле үнүпкен. Ол ышкаш изра́ильчилер-биле кады оон-даа өске Иеговага бүзүрей берген хөй кижилер үнүпкен. Оларның кижи бүрүзү хойларны, өшкүлерни болгаш инектерни ап алган.

Чоруурунуң бетинде изра́ильчилер еги́петчилерниң хевин, алдындан болгаш мөңгүнден кылган чараш эт-септи дилеп алганнар. Сөөлгү шаажыдан еги́петчилер аажок корткан. Ынчангаш олар изра́ильчилерниң шупту дилээн чүүлдерин берген.

Каш хонук эрткенде, изра́ильчилер Кызыл далайга чедип келген. Олар аңаа доктаап, дыштаныр чер кылып алган. Ол аразында фарао́н болгаш ооң чалчалары изра́ильчилерни салыпканы дээш, хараадап эгелээн. ‘Кулдарывысты салып алган бис!’ — деп, олар алгыра бергеннер.

Ынчангаш фарао́н бодунуң шиитпирин база катап өскертипкен. Далаштыы кончуг бодунуң бүгү тергелиг дайынчы аъттарын база бүгү аг-шериин чыыпкан. Изра́ильчилерниң соондан Еги́петтиң шупту тергелиг аъттарынга, аразында 600-зү тускай, ол сүрүпүнүпкен.

Изра́ильчилер фарао́ннуң чоокшулап орар шериин көргеш, дыка корткан. Кайнаар-даа дезер арга чок болган. Бир талада Кызыл далай чаттылган, а өске талада — еги́петчилер чоокшулап орган. Ынчалза-даа Иегова бодунуң чону-биле еги́петчилерниң аразынга булут тургузупкан. Еги́петчилер изра́ильчилерни көрбейн турган болгаш оларже халдап шыдавааннар.

Ооң соонда Иегова Моисе́йге даянгыыжын Кызыл далайже угландырыптарын дужааган. Моисе́й шак ынчаар кылган. Ынчан Иегова чөөн чүктен күштүг хатты чоргузупкан. Далайның суглары ийи чарылгаш, бот-боттарынга удурланыштыр туруп алган.

Ынчан изра́ильчилер далайның кургаг дүвү-биле базыпкан. Сая-сая кижилер шупту малы-биле менди-чаагай өске талаже эртеринге элээн каш шак хереглеттинген. Ам кээп еги́петчилер изра́ильчилерни катап көрүп каан. Оларның кулдары дезип бар чыткан! Ынчангаш оларның соондан далайже халыпканнар.

Олар далайже кире бээрге, Бурган еги́петчилерниң тергелериниң дугуйларын уштуна чаштай бээр кылдыр кылыпкан. Еги́петчилер хөлчок корткаш, алгыржып эгелээннер: ‘Биске удур Иегова демисежип турар. Моон үнүп чоруулуңарам!’ Ынчалза-даа эмин эрттир орай болган.

Бо чурукта Иегова Моисе́йге даянгыыжын Кызыл далайже угландырар дужаал берген үени таптыг-ла көргүскен. Ол үеге чедир хана ышкаш турган суг бодунуң туружунче эглип, еги́петчилерни болгаш ооң тергелерлиг аъттарын дуглай чыдыпкан. Изра́ильчилерниң соондан еги́петчилерниң бүгү шерии халыпкан. Ынчангаш еги́петчилерден кым-даа дириг артпаан!

Бурганның чону хосталгазынга кайы-хире өөрээнил! Эр кижилер Иеговага четтиргенин илередип: ‘Иегова ат-алдарлыг тиилээн. Аъттарны болгаш аъттыг кижилерни далайже ол дүжүр октапкан’,— деп ырлажып турганнар. Моисе́йниң угбазы Мариа́мь база өске херээженнер коңгурааштарлыг үнүп келгеннер. Өөрүшкүлүг танцылавышаан, олар база эр улус-биле деңге ол-ла ырыны ырлажып турганнар: ‘Иегова ат-алдарлыг тиилээн. Аъттарны болгаш аъттыг кижилерни далайже ол дүжүр октапкан’.