ИЙИ чыл эрткен — Ио́сиф биеэги хевээр кара-бажыңда. Арага сунукчузу ону олчаан сагынмаан. Бир-ле катап дүне фарао́н ийи дыка хөктүг дүш дүжээш, оларның утказын билип алыксап турар. Ооң удуп чыдарын көрүп тур сен бе? Дараазында эртен фарао́н бодунуң мерген-угааныгларын кыйгырып алгаш, оларга дүштерин чугаалап берген. Ынчалза-даа олар ооң ужур-утказын тайылбырлап шыдаваан.

Ынчан арага сунукчузу ам-на Ио́сифти сактып келген. Ол фарао́нга чугаалай-дыр: ‘Мен кара-бажыңга олурумда, аңаа дүштер утказын тайылбырлап шыдаар кижи турган’. Фарао́н Ио́сифти кара-бажыңдан доп-дораан эккээрин дужааган.

Оон фараон Ио́сифке бодунуң дүштериниң дугайын чугаалап берген: ‘Мен чеди семис-чаагай, чараш инектер көрдүм. Оон чеди дыка арган-сөөк инектерни база. Арган-сөөк инектер семис-чаагай инектерни чипкеннер.

Дараазында дүжүмде бир тараа сывында долу болгаш кадык-чаагай үрезиннерлиг чеди тараа баштарын көрдүм. Ооң соонда үрезиннери кадып калган чеди чиңгежек тараа баштарын көрдүм. Хавы куруг тараа баштары чеди чаагай баштыг тарааларны ажырыпкан’.

Ио́сиф фарао́нга мынча деп-тир: ‘Ийи дүштүң кайызы-даа чаңгыс уткалыг. Чеди семис-чаагай инектер база чеди чаагай үрезиннерлиг тараа баштары чеди чылды көргүзүп турар, база чеди арган инектер биле чеди чиңге тараа баштары өске чеди чылды көргүзүп турар. Еги́петке чеди чыл дургузунда аъш-чем элбек четчир болур. Ооң соонда аъш-чем чедишпес чеди чыл эгелээр’.

Ынчангаш Ио́сиф фарао́нга: ‘Мерген угаанныг кижини шилип алгаш, тодуг-догаа чеди чылдың дургузунда аъш-чемни чыыр кол кижизи кылдыр тургузуп каг. Ынчан дараазында чеди аъш-чем чедишпес чылдар дургузунда, кажан хамык чүве багай өзүп турда, кижилер аштавас’,— дээн.

Ол сүме фарао́нга таарышкан. Ынчангаш ол аъш-чемни чыыр база шыгжаар кылдыр Ио́сифти шилип алыр. Еги́пет чуртунга Ио́сиф фарао́ннуң соонда эң кол чугула кижи апаар.

Сес чыл эрткенде, аш-чут эгелей бергенде, Ио́сифче каш кижи кел чыдарын ол көрүп каан. Кымнарыл ол, билир сен бе? Хаа, шынап-ла, ол дээрге ооң он улуг акылары ышкажыл! Оларның Ханаа́нда бажыңында көңгүс чем артпаан болгаш, Иа́ков оларны Еги́петче чоргузупкан. Ио́сиф акыларын танып каан, а олар ону танываан. Чүге деп, билир сен бе? Чүге дизе Ио́сиф өзүп келген, ооң кеткен хеви база бир өске турган.

Ио́сифке акылары кээп мөгейип турганының дугайында бичиизинде дүжээн дүштерин ол сактып келген. Ол дугайын номчуп турганывысты, сактыр-дыр сен бе? Ону Еги́петче Бурган эки күзели-биле чортупканын ынчан Ио́сиф билип каан. Ио́сиф ам чүнү кылырыл, чүү деп бодаар сен? Билип алыылам, че.