ИО́СИФ улаштыр бодунуң ишти-хөңнүн чажырар харыы чок. Шупту чалчаларынга өрээлден үнерин ол дужааган. Чүгле акылары-биле артып калгаш, ол ыглап эгелээн. Ооң чүге ыглап турарын билбейн, акылары кайы-хире кайгаанын бодап болур бис. Ам кээп ол: ‘Мен Ио́сиф-тир мен. Ачам ам-даа дириг бе?’ — деп чугаалаан.

Ооң акылары кайгаанындан чугааланыр хире эвес-тир. Олар кортканындан аңгадай бергеннер. Ынчалза-даа Ио́сиф оларга чугаалаан: ‘Бээр менче чоокшулап келиңерем’. Кажан олар чоокшулап кээрге, ол мынча деп чугаалаан: ‘Мен силерниң, Еги́петке кул кылдыр садыпкан, дуңмаңар Ио́сиф-тир мен’.

Оон ол оларга чымчаа кончуг чугаалаан: ‘Мени бээр садыпканыңар дээш, бодуңарны буруудатпаңар. Бурган улустуң амы-тынын алыры-биле, мени Еги́петче чоргусканы ол-дур. Фарао́н мени бүгү чурттуң чагырыкчызы кылдыр тургузуп каан. Ынчаарга мээң адамче дүрген баргаш, ол дугайында чугаалаңар. Ол келгеш, маңаа чурттазын’.

Ооң соонда Ио́сиф акыларын шуптузун изии-биле куспактап, ошкап-чыттап эгелээн. Ио́сифке акылары чедип келген дээрзин фарао́н дыңнааш, аңаа мынча дээн: ‘Тергелиг аъттарны алгаш, адазын база боттарының өг-бүлелерин ап алгаш, бээр эглип келзиннер. Еги́петтиң эң эки черин оларга бээр мен’.

Олар ол-ла хевээр кылганнар. Хамык өг-бүлези-биле Еги́петче чедип келген адазын Ио́сиф канчаар уткуп турарын мында көргүскен.

Ол үеге чедир Иа́ковтуң өг-бүлези дыка көвүдээн. Иа́ков-биле кады санаарга, Еги́петче 70 ажы-төлү болгаш уйнуктары көжүп келген. Ооң өг-бүлезинге кадайлары хөй турган, ол ышкаш чалчалары база хөй турган чадавас. Олар шупту Еги́петке чурттай бергеннер. Оларны изра́ильчилер дээр турган, чүге дизе Бурган Иа́ковтуң адын Изра́иль кылдыр өскерткен. Изра́иль чон Бурганга ылаңгыя эргим апарган деп чүвени улаштыр көрүп көөр бис.