Удуртукчу чөвүлелдиң чагаазы
«Башкылар болу[р]... ужурлуг... силер» — деп Еврейлерге 5:12-де бижээн. Бодап көр даан, Октаргайда эң-не кайгамчык Башкы, Иегова, биске өскелерни өөредирин дааскан! Иегованың дугайында алыс шынны өг-бүлеге, чыышка азы суртаалга өөредири — улуг алдар-хүндү болгаш шыңгыы харыысалга-дыр. Ол даалганы канчаар күүседирил?
Харыызын Павелдиң Тимофейге бижээн сөстеринден тып алыр бис. Ол мынча дээн: «Бижилгени улуска номчуурунга, суртаалдаарынга база өөредиринге бодуңну бараалгадып көр. [...] Ынчаар кылып чоруур болзуңза, бодуңну-даа, дыңнакчыларыңны-даа айыылдан кадагалап алыр сен» (1 Тим. 4:13, 16). Чугаалап турар медээвис улустуң чуртталгазын камгалап болур. Ынчангаш номчуур болгаш өөредир арга-мергежиливисти экижидери дыка чугула. Бо брошюра ол сорулганы чедип алырынга дузалаар. Ооң онзагай талаларын көрээлиңер:
Арын бүрүзүнде бердинген библейжи шүлүк — чугула бодалды онзалап турар азы ону канчаар ажыглаарын көргүзүп турар кол дүрүм-дүр.
Иегова — Өндүр улуг Башкы (Иса. 30:20). Бо брошюра номчуур болгаш өөредир арга-мергежилиңни экижидип алырынга дузалаар. Улусту Бодунче чүгле Иегова хаара тудуп турар база ол медээ Ооңуу деп утпа (Ин. 6:44). Ынчангаш ыдыктыг сүлдени хөй дилеп, мөргү. Библияны үргүлчү ажыгла. Кичээнгейни бодуңче эвес, а Иеговаже угла. Дыңнакчыларыңның чүрээнге Бурганга күштүг ынакшылды сайзырадырынга дузала.
Сеңээ кижи төрелгетенниң дыңнап көрбээни эң-не чугула медээни улуска чугаалаарын дааскан. «Херектиг күштү Бургандан ап» тургаш, бо даалганы күүседип шыдаар сен дээрзинге бүзүрээр бис! (1 Пет. 4:11).
Сен ышкаш башкылар,
Иегованың Херечилериниң Удуртукчу чөвүлели
