БУРГАННЫҢ башкарылгазынга удур үймээн көдүрүлгениниң хайы-биле кижилерниң чуртталгазы хоозун апарган, ынчалза-даа Бурган оларны идегел чок арттырбаан. Библияда: «Бүгү бойдус эки туразы-биле эвес, а ону чагырган Бурганның күзел-соруу-биле үре-түңнел чок хоозун дүрүмнерге чагырткан болгай. Ынчалза-даа бойдуста идегел бар. Ооң боду бустуушкуннуң кулданыындан хосталгаш, Бурганның ажы-төлүнүң хосталгазы болгаш өндүр-чаагайындан үлүг алыр деп идегел ол-дур» — деп бижээн (Римчилерге 8:20, 21). Ийе, Бурган баштайгы кижилерниң үре-салгалынга, олар бачыт биле өлүмден хосталы бээр деп, быжыг идегелди берген. Ынчан кижилер Иегова Бурган-биле чоок хамаарылганы катап тургузуп алыр. Канчаар?

² Адам биле Ева бачыт үүлгеткеш, боттарының ажы-төлүнүң чер кырынга кажан-даа өлбейн, солун чуртталга чурттаар аргазын чок кылып каан. Олар чүнү эки, а чүнү багай деп санаарын боттары шиитпирлээр эргени шилип алгаш, келир үеде өг-бүлезин бачыт биле өлүмнүң кулданыынга садыпканнар. Ындыг өг-бүлеге төрүттүнген ажы-төлдү кээргел чок чагырыкчылар башкарып турар ортулукче шөлүттүрүпкен кулдарга дөмейлеп болур. Кижилерге шак ындыг кээргел чок чагырыкчылар бачыт биле өлүм апарган (Римчилерге 5:14, 21). Сактырга, оларны кым-даа хостап шыдавас ышкаш. Чүге дээрге оларны кулданыгже боттарының-на өгбези садыпкан болгай! Ынчалза-даа бир буянныг кижи тыптып келгеш, кулданыг адаанда улусту хостаарынга херек акшаны бээр кылдыр, оглун чоргузупкан (Ырлар 50:7; 145:4; Римчилерге 8:2).

³ Бо чижекте кулдарны хостапкан буянныг кижи дээрге Иегова Бурган-дыр. Оларның хосталгазы дээш акша төлээн оглу — Иисус Христос-тур. Ол кижи кылдыр төрүттүнериниң мурнунда кудай-дээрге Бурганның эр чаңгыс Оглу турган (Иоанн 3:16). Иисус  Иегованың бир дугаар чаяалгазы турган, а Октаргайда өске бүгү чаяалгалар ону дамчыштыр чаяаттынган (Колосчуларга 1:15, 16). Иегова хуулгаазын арга-биле бодунуң Оглунуң чуртталгазын арыг кыстың иштинче көжүрүпкен. Шак ынчаар чаш төл бачыт салгап албайн, четпес-дудуу чок кылдыр төрүттүнүп келген. Ооң амы-тыны Бурганның чөптүг негелдеринге дүгжүр өртек-үнелиг турган (Лука 1:26—31, 34, 35).

⁴ Иисус 30 хире харлыг апаргаш, Иордан хемге сугга суктурган. Ынчан ол ыдыктыг сүлде-биле, азы Бурганның хөделдирикчи күжү-биле, шилиттинген турган. Шак ынчаар ол Христос, азы «Шилиттинген кижи», апарган (Лука 3:21, 22). Черге Иисустуң бараалгалы үш чыл чартык ишти уламчылаан. Ол үениң дургузунда Иисус бодунуң эдерикчилеринге «Бурганның Чагыргазының» дугайында алыс шынны өөредип чораан. Ол дээрден чагырар Чагырганың ачызында кижи төрелгетен Иегова Бурган-биле катап  эки хамаарылгалыг апаар (Лука 4:43; Матфей 4:17). Иисус кижилерге аас-кежиктиг чурттаарынга чүү херегин билир турган болгаш, бодунуң эдерикчилеринге удуртулганы берген. Библияңарны Матфейниң номунда 5-тен 7-ге чедир эгелерни ажыткаш, ооң даг кырынга чугаалаан өөредиглериниң чамдыызы-биле таныжып көрүңер.

⁵ Адамга бодаарга, Иисус Бурганга бүгү талазы-биле дыңнангыр чораан. «Ол кандыг-даа бачыт үүлгетпээн» (1 Пётр 2:22; Еврейлерге 7:26). Ынчангаш ол черге мөңге чурттаар эргелиг турган. Ынчалзажок Адамның чидирген чүүлүн Бурганга эгидер дээш, Иисус «амы-тынын» берипкен. Хилинчектиң чагызынга ол бодунуң бачыт чок чуртталгазындан ойталаан (Иоанн 10:17; 19:17, 18, 28—30; Римчилерге 5:19, 21; Филипчилерге 2:8). Шак ынчаар Иисус кижи төрелгетенни бачыт биле өлүмнүң кулданыындан садып хостаар дээш төлевирни берген (Матфей 20:28). Даң бажыңдан кежээге чедир оорга-мойнун үзүлдүр ажылдап турар кулдуң орнунга бодуңарны сагыштаалап көрүңер даан. Силерни хостаар дээш, силерниң орнуңарга бодун кулданыгже садыпкан кижи турган болза, ол кижиге хамаарыштыр чүнү миннир силер? Канчаар-даа аажок өөрүп четтирер боор силер. Төлевирниң ачызында бачыт биле өлүмнүң кулданыындан адырылгаш, аас-кежиктиг чурттаар база Бурганның улуг өг-бүлезинче катап эглип кээр арга силерниң мурнуңарга ажыттынган (2 Коринфичилерге 5:14, 15).

⁶ Кажан Иегованың ол хире энерелдииниң дугайында билип алгаш, кижиниң Библиядан мерген угаанныг сөстерни чуртталгазынга ажыглаксаары дам баар. Чижек кылдыр, сагыыры ылаңгыя берге, өршээринге хамаарышкан дүрүмнү ап көрээлиңер. 2-ги кичээлге сайгарып турганывыс Колосчуларга 3:12—14-те бижээн сөстерни сактып тур силер бе? Ол шүлүктер бисти, хомудаар чылдагааннарывыс бар-даа болза, өскелерни өршээринче деткип турар. Ол шүлүктүң дараазында сөстеринден алырга, ону чүге ынчаар кылыр ужурлуувус билдинип кээр: «Дээрги-Чаяакчының силерни өршээгени дег, силер база ынчалдыр өршээңер!». Иегова биле Иисус Христостуң кижи төрелгетенге кылган чүүлүн ханызы-биле медереп билиптер болзувусса, өскелерниң биске удур кылган кандыг-даа частырыгларын, ылаңгыя олар буруузун миннип турар болза, өршээр күзеливис тыптып кээр.