СҮМЕ херек апаарга, кымга баар-дыр силер? Бүзүрээр кижиңерге чадавас. Ооң сүмезиниң ажыын дораан билбес-даа болзуңарза, ону дыңнаар болгай силер. А бир эвес Библиядан сүмелерниң ажыын көрүксеп турар болзуңарза, ооң Автору-биле таныжып алыры силерге эргежок чугула. Оон артык, Ооң «өңнүү» апарып болур силер! (Исайя 41:8).

² Бир кижи-биле найыралдажырда, эгезинде ооң адын айтырар болгай силер. А Библияның Авторунуң, Бурганның, ады бар бе? «Мен — Дээрги-Чаяакчы мен, Мээң адым ол-дур! Бодумнуң алдарымны өске кымга-даа бербес мен база Меңээ хамааржыр макталды дүрзү-бурганнар-биле үлешпес мен!» — деп, Ол чарлаан (Исайя 42:8). Ооң ады — Иегова. Еврей дылда ону мынчаар бижиир: יהוה (оң талазындан солагай талазынче номчуур). Еврей Бижилгелерде ол ат 7000 хире катап таваржып турар. Бурганның ады «Ол болдуруп турар» дээн уткалыг. Ол дээрге Иегова бодунуң күзел-соруун күүседир дээш, бодунуң чаяалгаларын азы бодун кым-даа апаар кылдыр болдуртуптар дээни ол. Оон аңгыда еврей дылда ооң адының грамматиктиг тургузуу үргүлчүлелдиг кылдыныгны илередип турар. Ол чүүже айтып турарыл? Иегова салып алган сорулгаларын эчизинге чедир күүседип турар. Ол анаа-ла бир күш эвес, а дириг Бурган-дыр!

³ Иегова — Чаяакчы (Эге дөс 1:1). Ол «дээрниң, черниң, далайның база оларда бар бүгү чүвениң Чаяакчызы, дириг Бурган-дыр» (Ажыл-чорудулга 14:15). Иегова бүгү чүвени, ол ышкаш баштайгы кижилерни, Адам биле Еваны, чаяаган. Ынчангаш Бурган — «амыдырал хайырлаар суг бажы-дыр» (Ырлар 35:10). Оон ыңай Ол — амыдыралдың деткикчизи бооп турар. Ол «буянныг үүлезин кылып, Бодунуң дугайында үргүлчү херечилеп келген. Ол силерге дээрден чаъсты болгаш дүжүткүр өйде дүжүттү берип, а ол ышкаш аъш-чемни силерге  хайырлап база чүректериңерни өөрүшкү-биле долдуруп келген» (Ажыл-чорудулга 14:17). Африкада болгаш Азияда улус ада-өгбелеринден чуртталганы алган болгаш, оларга мөгейип чоруур. Ынчаарга ол улус амы-тынны болгаш өзүп-көвүдээр арганы берген база амыдыралды деткип чоруур Бурганга өөрүп четтирерин оон-даа артык миннир ужурлуг эвес бе? Ооң дугайында боданыры силерни: «Бистиң Дээрги-Чаяакчы-Бурганывыс, алдарны, мактал-хүндүнү, эрге-чагырганы хүлээп аарынга төлептиг сен, чүге дээрге Сен бүгү чүвени чаяаган сен, ынчангаш бүгү чүве Сээң күзел-сорууңга дүүштүр чаяаттынган база амыдырап турар» — деп хөлзеп чугаалаарынче оттуруп болур.

⁴ Библияның арыннарындан, боттарыңарның Чаяакчыңар, Иегованы кандыг Бурган дээрзин билип ап болур силер. Библияда «Бурган дээрге ынакшыл-дыр» деп бижээн (1 Иоанн 4:16; Хосталыышкын 34:6, 7). Библияны Эге дөстен Ажыдыышкынга чедир номчааш, Бурган херек кырында ынакшыл-дыр деп, дыка хөй бадыткалдарны тып алыр силер. Чаяакчыңарны эки билип алыр дээш, Бурганның Сөзүн хүннүң-не номчуур чаңчылды чүге сайзырадып ап болбас деп? Библияны эки билир улустуң дузазын хүлээп ап, ону кичээнгейлиг өөрениңер (Ажыл-чорудулга 8:26—35). Оон ыңай Ол чөптүг чоруктуң Бурганы болганда, каржы чорукту мөңгези-биле шыдажып турбас деп, билип алыр силер (Ы.х.к. 32:4). Хары угда ынакшылдыг болгаш чөптүг болуру кижилерге белен эвес, а Иегова ол шынарларны деңге, тергиини-биле ажыглап турар (Римчилерге 11:33; 16:27). Бурган Бүрүн Күчүлүг болганда, бодунуң күзел-соруун күүседир күчү-күжү бар (Эге дөс 17:1). Библейжи мерген угаанныг сүмелерни ажыглаар болзуңарза, оларның кайы хире ажыктыын эскерип каар силер. Ынчан Чаяакчыңарга оон-даа артык өөрүп четтиргениңерни миннир силер.

⁵ Бурганче чоокшулаарының база бир аргазы — мөргүл-дүр. Иегова мөргүлдерни дыңнап турар (Ырлар 64:3). Ол «дилеп аар азы бодап чоруур бүгү чүүлүвүстен оранчок хөйнү кылып шыдаар» (Эфесчилерге 3:20). Ынчалза-даа чүгле бодунуң ажыын бодап чедип кээр «өңнүктүң» дугайында чүнү бодаар-дыр силер? Аңаа каяа таарзынар деп силер. Шак ынчаар, бир эвес Бурганга мөргүүр арганы үнелеп турар болзувусса, чүгле дилениринден аңгыда, Аңаа өөрүп четтирип, Ону алгап-мактаар ужурлуг бис (Филипчилерге 4:6, 7; 1 Фессалоникчилерге 5:17, 18).