ИЕГОВА-БИЛЕ таныжып алыры силерге кандыг ажык-дузалыг болурул? Аажок ажыктыг. Чижээ, «чүү дээш чурттап чоруур кижи боор мен?» деп, хөй-хөй улусту дүвүредип чоруур айтырыгга харыыны билип алыр силер. Силер база ындыг айтырыгны бодуңарга салып турган чадавас боор силер. «Чер-делегейниң бүгү хааннарын» бай-байлаа-биле ажып турган бир мерген угаанныг хаан чуртталганың ужур-утказын билип алыр дээш кызып чораан (2 Чылдар 9:22; Экклесиаст 2:1—13). Ооң адын Соломон дээр турган. Ооң шупту чүвези: улуг эрге-чагыргазы-даа, санап четпес алдын-мөңгүнү-даа, кайгамчыктыг мерген угааны-даа бар турган. Ооң дилээшкини кандыг түңнелге чедиргенил? «Бүгү чугаа төнген, түңнели бо-дур: Бургандан коргуп, Ооң айтыышкыннарын сагып чор, чүге дээрге кижиге херек-ле чүве ол» (Экклесиаст 12:13). Соломоннуң амыдыралга арга-дуржулгазы, кижилерниң хөй кезиинге бодаарга, оранчок улуг турган. Ынчангаш ооң сөстерин кичээңгейге алыры чугула (Экклесиаст 2:12).

² Бургандан коргары дээрге каракка көзүлбес, билдинмес күштен коргуп-сирилээри дивээни ол. Чижээ, кижиге херек кырында ынак болзуңарза, силер ону хомудадырындан сестип, харын-даа өөртүрүн күзээр болгай силер. Шак ынчаар, кажан Иеговага ынак апаар болзуңарза, ындыг минниишкиннерни миннип эгелээр силер.

³ Библияны номчуп тургаш, Чаяакчывыстың чүге ынаан, а чүге таарзынмазын, ол ышкаш черни чүү дээш чаяап каанын билип алыр силер. Иегованы «дээрни чаяап каан Дээрги-Чаяакчы» деп, Библия чугаалап тура, «Ол — черни овур-хевирлиг кылып, быжыктырып тургускан Бурган-дыр; чер ээн турбазын, аңаа кижилер чурттазын дээш, Ол ону чаяап каан» деп демдеглеп турар (Исайя 45:18). Иегова кижилерге черни белеткээш, олар ону болбаазырадып, шупту дириг амытаннарны карактап-ажаар кылдыр дагзып каан  (Эге дөс 1:28). Ынчалзажок Иегова кижилерни чүгле ол дээш чаяап каан бе?

⁴ Чок, Иегованың оон-даа бедик чаагай сорулгазы турган. Баштайгы кижи, Адам, Иегова-биле онзагай хамаарылгалыг чораан. Адам Чаяакчызы-биле дорт чугаалажып болур аргалыг турган. Ол Бурган-биле хостуг харылзажып, Ооң үнүн дыңнап турган (Эге дөс 1:28—30; 3:8—13, 16—19; Ажыл-чорудулга 17:26—28). Ынчангаш Адам биле Ева Иегованы эки билип алгаш, Ооң-биле оон-даа чоок харылзааны тургузуп алыр онзагай аргалыг турганнар. Бир эвес олар Иегованы эки билип ап, ону өттүнүп турган болза, олар аас-кежиктиг бооп болур турган, чүге дээрге Иегова — «ачы-буянныг [аас-кежиктиг, ЧД] Бурган-дыр» (1 Тимофейге 1:11). «Сеткил ханар бүгү чүүлүвүстү элбээ-биле хандырып бээр Бурган», Иегова, бир дугаар кижини Эдем сесерлиинге чурттадып кааш, аңаа мөңге амыдыраар арганы берген (1 Тимофейге 6:17; Эге дөс 2:8, 9, 16, 17).

⁵ Мөңге амыдырал? «Таанда, меге чүве-дир оң!» — дээр чадавас силер. Ынчалза-даа ындыг түңнел үндүреринче далашпаңар. Амгы үеде эртемденнер клеткаларның эргижирээриниң чылдагаанын тып алган деп санап турар. Хромосоманың ужу, өскээр чугаалаарга, теломера, клетканың үлеттинген санында-ла, кыскалап турар. Клетканың 50—100 катап үлеттингениниң соонда, теломера элеп каар, ынчангаш клеткаларның хөй кезии үлеттиннер аргазын чидирип алыр. Сөөлгү эртем ажыдыышкыннарының түңнели-биле алырга, теломераза деп аттыг ферментиниң дузазы-биле кижиниң клеткалары төнчү чок үлеттинип болур. Ынчалзажок Иегова мөңге амыдыралды ол ферментиниң дузазы-биле бээр дивээни ол. Ындыг-даа болза, кижи мөңге чурттап болур деп, ол ажыдыышкын бадыткап турар!

⁶ Ийе, бир дугаар кижилер мөңге чурттаар кылдыр чаяаттынган деп, библейжи төөгүге бүзүреп болур бис. Кижилер Иегова-биле хамаарылгазын кезээ-мөңгеде сайзырадып болур турган. Олар боттарының чүү дээш чаяттынган сорулгазын эки билип, хүнден хүнче дээрде Адазы-биле найыралын быжыглап болур турган. Адам биле Еваның чуртталгазы чилчиин үзүлдүр ажылдаарында эвес, олар черниң кырын аас-кежиктиг, четпес-дудуу чок үре-салгал-биле долдурар кайгамчыктыг даалгалыг турган. Оларның ажылы солун болгаш ужур-уткалыг болур турган. Шынап-ла, ёзулуг амыр-чыргалдыг чуртталга! (Эге дөс 1:28).