1. Кандыг билдингир мөргүлдү көөр бис?

ИИСУС ХРИСТОСТУҢ арттырган үлегерлиг мөргүлүн бүдүн делегейде миллион-миллион кижилер билир. Бо мөргүлде Иисус өөреникчилеринге чүнүң дугайында мөргүүрүн көргүскен. Чүге ол мөргүлче кичээнгейни салыр ужурлуг бис? Ону тодаргайы-биле көрүп көрээлиңер.

2. Бисти мөргүүрүн өөредип тургаш, Иисус кандыг үш дилегже кичээнгейни салган?

² «Мынчаар мөргүп чоруңар: „Дээрде Адавыс! Сээң адың алдаржызын! Сээң Чагыргаң чедип келзин. Дээрге дег, черге база Сээң күзел-сорууң чогуп бүтсүн» — деп, Иисус чугаалаан. (Номчуптуңар: Матфей 6:9—13.) Мөргүлдеривиске бо үш дилегниң турарын Иисус чүге күзээнил? (20 дугаар Капсырылганы көрүңер.)

3. Бурганның Чагыргазының дугайында чүнү билип алыр бис?

³ Бурганның адын база Ооң кижилерге болгаш черге хамаарыштыр күзел-соруун билип алдывыс. Ынчаарга Иисустуң «Сээң Чагыргаң чедип келзин» дээн сөстери кандыг уткалыг? Бурганның Чагыргазы деп чүл ол? Ол чагырга Бурганның адын канчаар алдаржыдарын база ооң чүнү чедип алырын сайгарып көрээлиңер.

4. Бурганның Чагыргазы деп чүл ол база ооң Хааны кымыл?

⁴ Иегова дээрге чагырганы тургускаш, ооң Хааны кылдыр Иисусту томуйлаан. Библияда ону Бурганның Чагыргазы деп адаан. А Иисустуң дугайында мынча дээн: «Хааннарның Хааны болгаш тергиидээннерниң Дээргизи» (1 Тимофейге 6:15—16). Иисус кижилерге кандыг-даа чагырыкчыдан хөйнү кылып шыдаар, чүге дизе ол бүгү чагырыкчылардан күчүлүг.

5. Бурганның Чагыргазы кайда турар? Ол чүнү чагырар?

⁵ Дирилгениниң соонда дөртен хонук болгаш, Иисус дээрже эглип келген. Үе эрткенде, Иегова ону Бодунуң Чагыргазының Хааны кылдыр томуйлаан (Ажыл-чорудулга 2:33). Бурганның Чагыргазы дээрден черни чагырар (Ажыдыышкын 11:15). Ынчангаш ону «Дээрде Чагырга» деп адап турар (2 Тимофейге 4:18).

6, 7. Иисусту кандыг-даа чагырыкчыдан чүге эң-не эки деп болур?

⁶ Делегейде чагырыкчыларга бодаарга, Иисусту «өлүм чок» деп Библияда бижип турар (1 Тимофейге 6:15—16). Черде шупту чагырыкчылар кажан-бир дөмей-ле чок апаар, а Иисус кажан-даа өлбес. Ооң кижилерге кылыр чүүлү кезээ-мөңгеде ажык-дузаны эккээр.

⁷ Библейжи өттүр билген медеглелде Иисусту чөптүг-шынныг болгаш кээргээчел чагырыкчы деп бижип турар: «Дээрги-Чаяакчының Сүлдези — мерген угаан биле угаан-сарыыл бээр  Сүлде, арга-сүме биле күш-шыдал бээр Сүлде, билиг биле Дээрги-Чаяакчыдан коргуушкун бээр Сүлде — Ону бүргей аптар. Дээрги-Чаяакчыдан коргары Аңаа өөрүнчүг болур. Ол даштыкы хевир барымдаалап шиитпес, дамчыыр чугаа ёзугаар херектер шиитпирлевес. Ядыыларны Ол шынныы-биле шиидер» (Исайя 11:2—4). Силер ындыг чагырыкчылыг болуксаар-дыр силер бе?

8. Иисус чааскаан чагырбас деп кайыын билир бис?

⁸ Бурган чамдык кижилерни Иисус-биле кады дээрге чагырар кылдыр шилип алган. Чижээ, Павел элчин: «Ам шыдажып турар болзувусса, Ооң-биле кады чагырар бис» — деп Тимофейге бижээн (2 Тимофейге 2:12). Иисус-биле кады каш кижи чагырарыл?

9. Иисус-биле кады каш кижи чагырар? Бурган ол бөлүктү кажан чыып эгелээнил?

⁹ 7-ги эгеден Иисус-биле кады 144 000 башкарыкчылар чагырар деп билип алган бис. Ол дээрге кымнарыл? Оларның Иисус-биле кады турарын Иоанн элчин көстүүшкүнге көрген. «Хураганның болгаш Ооң Адазының адын хавактарында бижип демдектээн» улус-тур деп, Иоанн чугаалаан. Оон ыңай ол: «Хураган [азы Иисус] кайнаар-даа баар болза, Ону эдерер улус-тур» — деп немээн. (Номчуптуңар: Ажыдыышкын 14:1, 4.) Ынчап кээрге, олар — Иисус-биле кады чер кырын хааннаар Бурганның шилээни  144 000 шынчы христианнар-дыр. Кажан олар чок апаарга, дээрге чурттаары-биле оларны диргизиптер (Ажыдыышкын 5:10). Иегова ол бөлүктү элчиннерниң үезинден тура чыып эгелээн.

10. Иисус Христос биле кады 144 000 шилип чагдырганнар кижилерни чагырар дээнинде Иегованың ынакшылы канчаар көстүп турар?

¹⁰ Кижилерниң Христос-биле кады чагырар дээнинде Иегованың сагыш човангыры көскү. Иисус боду черге кижи бооп чурттап чораан база хилинчекти көрген болгаш, ол эң эки чагырыкчы болур. Павел элчин Иисусту бистиң «кошкак талаларывысче ээ көрүнмейн баар хире эвес» база «бис ышкаш, бүгү тала-биле күткүлгеге алзып турган» деп бижээн (Еврейлерге 4:15; 5:8). Чүс дөртен дөрт муң шилип чагдырган христианнар база тергиин эвес болурун, аарып-аржыырын эки билирлер. Ынчангаш Иисус болгаш ооң кады чагырар улузу бистиң сагыш сеткиливисти, кандыг бергелерге таваржып чоруурувусту билип турарынга чигзинмес бис.

11. Иисус Бурганның күзел-соруу дээрге күүсеттинзин деп мөргүүрүн чүге өөредип чорааныл?

¹¹ Дээрге Бурганның күзел-соруу күүсеттинзин деп мөргүүрүн Иисус өөреникчилеринге өөредип чораан. Чүге? Эрлик Иеговага удур тура халаанының соонда, Бурган Эрликке болгаш  буктар деп адаан шынчы эвес дээрниң төлээлеринге кезек үе дургузунда дээрге артарын чөпшээрээн деп 3-кү эгеден билип алган бис. Ынчангаш дээрде шупту чаяалгаларны Бурганның күзел-соруун күүседип турар деп болбас турган. Бо номнуң 10-гу эгезинден Эрликтиң болгаш буктарның дугайында хөйнү билип алыр бис.

12. Ажыдыышкын 12:10-да кандыг ийи чугула болуушкуннуң дугайында бижээнил?

¹² Бурганның Чагыргазының Хааны апарган соонда, Иисус удатпаанда Эрликке удур дайылдажып эгелээн. (Номчуптуңар: Ажыдыышкын 12:7—10.) 10-гу шүлүкте ийи чугула болуушкун бижиттинген. Бирээде, Бурганның Чагыргазы чагырып эгелей берген база ооң Хааны Иисус Христос апарган. Ийиде, Эрликти дээрден черже дүжүр октапкан. Ол ийи болуушкуннуң күүсеттине бергенин ооң соонда билип алыр бис.

13. Эрликти дээрден дүжүр октапкан соонда ында байдал канчаар өскерилген?

¹³ Библияда: «Өөрүп-байырлаңар, дээрлер база дээрлерниң чурттакчылары!» — деп бижээн (Ажыдыышкын 12:12). Эрликти болгаш ооң буктарын дээрден дүжүр октаптарга, Бурганга шынчы дээрниң төлээлери аажок өөрээн! Амгы үеде Бурганның күзел-соруун дээрниң бүгү чаяалгалары күүседип турар. Олар амыр-тайбың болгаш чаңгыс эп-сеткилдиг чурттап чоруур.

14. Эрликти дээрден дүжүр октаптарга, чер кырында байдал кандыг апарган?

 ¹⁴ Ынчалза-даа амгы үеде черде байдал көңгүс өске. Кижилер дыка хилинчектенип чоруур, чүге дизе Эрлик «хөлчок килеңнээн» — «ооң үези көңгүс эвээш артканын билир-дир» (Ажыдыышкын 12:12). Эрликти дээрден дүжүр октаптарга, ол аажок килеңнеп турар. Чүге дизе удавас узуткаттырарын ол билир. Ынчангаш ол чер кырынга ажыг-шүжүг, аарышкы болгаш хилинчек-човалаң көвүдезин дээш, бүгү чүвени кылып турар.

15. Бурганның черге хамаарыштыр күзел-соруу кандыгыл?

¹⁵ Бурганның черге хамаарыштыр күзел-соруу өскерилбээн. Черниң дываажаң болурун база аңаа тергиин кижилерниң мөңге чурттаарын Ол күзевишаан хевээр (Ырлар 36:29). Бурганның Чагыргазы ону канчаар кылыптарыл?

16, 17. Даниил 2:44-те Бурганның Чагыргазының дугайында чүнү бижээн?

¹⁶ Даниил медээчиниң номунда: «Ол хааннарның үезинде өске чоннарның холунга кирбес, мөңге, бузулбас күрүнени дээрде саадаан Бурган тургузуп каар. Ол күрүне демги күрүнелерни шуптузун чылча шаап, узуткап каар. А ол боду мөңгези-биле турар» — дээн (Даниил 2:44). Бо өттүр билген медеглелден чүнү билип ап турар бис?

¹⁷ Бирээде: Чагырга «ол хааннарның үезинде» чагырып эгелей бээр. Ол дээрге кажан черде  бүгү чагыргалар турда-ла, Бурганның Чагыргазы чагырып эгелей бээр. Ийиде: ол Чагырга мөңгези-биле чагырар база ону кандыг-даа өске чагырга-биле солувас. Үште: Бурганның Чагыргазы биле черде бүгү чагыргаларның аразынга дайын эгелээр. Ол дайынга Бурганның Чагыргазы тиилээш, черге дың чаңгыс эң-не эки чагырга болур.

18. Делегейниң чагыргаларының болгаш Бурганның Чагыргазының аразында дайынны чүү деп адаарыл?

¹⁸ Бурганның Чагыргазы бодунуң эрге-чагыргазын черге канчаар тургузуптар? Буктар «чер-делегейниң хамык хааннарын» дуурайлап, Бүрүн Күчүлүг Бурганның дайынынга чаалажыры-биле оларны чыып турар деп Библияда бижээн. Делегейниң чагыргалары Бурганның Чагыргазынга удур дайылдажып үнер, ынчалза-даа Бурганның Чагыргазы тиилеп алыр. Ол дайынны Армагеддон дээр (Ажыдыышкын 16:14, 16; 10 дугаар Капсырылганы көрүңер).

19, 20. Бурганның Чагыргазы биске чүге эргежок чугула?

¹⁹ Бурганның Чагыргазы биске чүге эргежок чугула? Үш чылдагаанын көрүптээлиңер. Бирээде, кижилер бачыттыг болгаш, аарып база өлүп турар. Ынчалза-даа Бурганның Чагыргазының адаанга мөңге чурттаар бис. Иоанн 3:16-да: «Аңаа бүзүрээн кижи бүрүзү өлбезин, харын мөңге амыдыралдыг болзун дээш, Бурган Бодунуң эр чаңгыс Оглун берипкен.  Ооң бо делегейниң улузунга ынакшылы ол хире болган-дыр» — дээн.

²⁰ Ийиде, бис каржы-бак-биле долган делегейде чурттап турар бис. Мегелээр, нүгүлдээр болгаш самыын-садар чорук нептерээн. Боттарывыс бузут-бакты чайладып шыдавас бис, ынчалза-даа Бурган ону кылып шыдаар. Каржы-бак кижилерни Армагеддонга Ол узуткап кааптар. (Номчуптуңар: Ырлар 36:10.) Үште, кижилерниң тургузуп алган хөй-ле чагыргалары каржы болгаш шынчы эвес. Оларда кижи төрелгеттениң бергелерин шиитпирлээр харык чок. Олар кижилерни Бурганга дыңнангыр боорун өөретпейн турар. «Кижи кижини чагырып, аңаа хора чедирип чоруур» — деп Библияда бижээн (Экклесиаст 8:9).

21. Чагырганың ачызында Бурганның күзел-соруу чер кырынга канчаар күүсеттинер?

²¹ Армагеддон соонда Бурганның Чагыргазының ачызында чер кырынга Бурганның күзел-соруу күүсеттинер. Эрлик болгаш буктар турбас  (Ажыдыышкын 20:1—3). Кижилер аарывас база өлбес. Төлевирниң ачызында дыңнангыр бүгү улус чер кырынга дываажаңга кезээ-мөңгеде чурттап болур (Ажыдыышкын 22:1—3). Адак сөөлүнде, Чагырга Бурганның адын алдаржыдар. Ол Чагырга черни башкарып эгелээрге, шупту улус Иегованың адын ханы хүндүлээр боор. (21 дугаар Капсырылганы көрүңер.)

22. Иисус черге турган үезинде-даа, дирилген соонда-даа дораан Хаан апарбаан деп кайыын билир бис?

²² Иисус черге турган үезинде өөреникчилеринге: «Сээң Чагыргаң чедип келзин» деп мөргүүрүн өөредип чораан. Бо сөстерден алырга, ол үеде Бурганның Чагыргазы келбээн турган, өскээр чугаалаарга, Иегова Бодунуң Чагыргазын ам-даа тургуспаан база Иисусту Хаан кылдыр томуйлаваан турган. Иисус дээрже эглип келгеш, дораан-на Хаан апарган бе? Чок, ол кезек үе дургузунда манап турган. Ону кайыын билир бис? Ооң дугайында Ырлар 109:1-де:  «Дайзыннарыңны буттарың адаанга эккеп салбаан шаамда, Мээң оң таламга олур» — деп, Иегова баш бурунгаар медеглээн. Пётр биле Павелдиң тайылбырлаанындан алырга, ол өттүр билген медеглел дирлип келген Иисуска хамааржыр (Ажыл-чорудулга 2:32—35; Еврейлерге 10:12, 13). Ынчаарга Иисус дирлип келген соонда-даа Иегованың ону Хаан кылдыр томуйлаарын кезек үе ишти манаан. Ол кайы хире үр манаар ужурлуг турган?

23. а) Иисус кажан Бурганның Чагыргазының Хааны апарган? б) Дараазында эгеден чүнү билип алыр бис?

²³ Иисус Христос 1914 чылда Хаан апарган (Ырлар 109:2). Солун чүүл, 1914 чыл мурнунда-ла, каш кижиден тургустунган биче бөлүк улус библейжи өттүр билген медеглелдер ёзугаар ол чыл онзагай болур деп билип турган. Делегейге 1914 чылдан эгелээн болуушкуннар ол христианнарның бодалын бадыткаан. Иисус 1914 чылда Хаан апаргаш, бир-ле дугаарында чүнү кылган? Эрликти дээрден дүжүр октапкан. Ажыдыышкын 12:12-де бижээни дег, амгы үеде Эрликтиң «үези көңгүс эвээш арткан». Ынчангаш Бурганның черге хамаарыштыр күзел-соруун Чагырганың күүседиптеринге чедир мырыңай кыска үе арткан. Дараазында эгеден шак ол үеде чурттап турарывыстың дугайында оон-даа хөй бадыткалдарны көөр бис. (22 дугаар Капсырылганы көрүңер.)