1, 2. Хөй-ле кижилерни чүү дүвүредип чоруур?

ДАЛАЙНЫҢ улуг чалгыы бүдүн хоорайны үрегдээн. Оък-чепсектиг кижи садыг-саарылга төвүнге келгеш, кижилерни боолаан. Беш ажы-төлдүң иези рак аарыындан чок болган.

² Мындыг хай-халаптар кижилерге «чүге?» деп айтырыгны тургузуп турар. Көөр хөөн чок чоруктуң болгаш хилинчек-човалаңның нептерээни оларны дүвүредип чоруур. А силер ооң дугайында боданган силер бе?

3, 4. а) Аввакум Иеговага кандыг айтырыгларны салганыл? б) Иегова аңаа чүү деп харыылаан?

³ Бурганга быжыг бүзүрелдиг улус безин ындыг хевирлиг айтырыгларны салып чораан деп Библиядан көскү. Чижээ, Аввакум медээчи Иеговадан мынча деп айтырып турган: «Кемниг үүлгедиглерже көөр кылдыр чүге мени албадаар сен? Базындырыышкынче чүге анаа көрүп турар сен? Үптээшкин биле күчүлелди көрүп тур мен, адаан-өжээн көдүрлүп, алгыш-кырыш кедереп тур» (Аввакум 1:3).

⁴ Аввакум 2:2, 3-те Бодунуң медээчизинге Бурганның чүнү харыылаанын бижээн. Бурган безин Аввакум медээчиге байдалды шиитпирлептерин аазаан. Иегова кижилерге дыка ынак деп Библияда бижээн. Ында: «Ол силер дээш сагыш салып чоруур» дээн (1 Пётр 5:7). Херек кырында, Бурган каржы-бакты болгаш  хилинчек-човалаңны бистен артык көөр хөңнү чок. Ынчаарга чүге бо делегей каржы-бак-биле долганыл? Харыызын Библиядан билип алыылыңар.

5. Хай-халап болурга, хүрээ-хиит бараалгакчылары чүү деп турарыл? Хай-халап дугайында Библияда чүү дээн?

⁵ Хүрээ-хиит бараалгакчылары болгаш шажын-чүдүлге башкылары «кижилерниң хилинчек-човалаңы — Бурганның күзел-соруу-дур» дээр. «Кижиниң чуртталгазынга хай-халаптарның, янзы-бүрү болуушкуннарның болурун Бурган баш бурунгаар шиитпирлеп каар деп, ол ышкаш боду-биле чүү болу бээрин база ооң-биле чүге ындыг чүүл болганын кижи билбес» деп өскелери бүзүредип турар. А үшкүлери: «Бурган өлген кижилерни, оларның санында бичии уругларны, дээрже ап турар» деп чугаалап турар. Ынчалза-даа бо бүгү көңгүс меге. Хай-халаптарның болуп турар чылдагаанын Иеговада деп болбас. Библияда мынча дээн: «Бурганда шынныг эвес чүве турбас, Күчүлүг Бурганда чөптүг эвес шииткел чок» (Иов 34:10).

6. Хөй улус хай-халаптарга чүге Бурганны буруудадып турарыл?

⁶ Кижилер делегейни Бурган чагырып турар деп бодаар, ынчангаш хай-халаптарга Бурганны буруулуг деп санап турар. Ынчалза-даа делегейни Эрлик чагырып турар деп 3-кү эгеден билип алган бис.

7, 8. Делегейде чүге ынча хөй хай-халап болуп турарыл?

⁷ «Бүгү делегей эрликтиң чагыргазының адаанда турар» деп Библияда бижээн (1 Иоанн 5:19). Делегейниң чагырыкчызы — каржы Эрлик, ол «бүгү делегейни дуурайлаан» (Ажыдыышкын 12:9). Ооң салдарындан хөй-ле улус каржы-хажагай апарып турар.  Делегейде мегечи болгаш көөр хөөн чок чоруктуң база күчүлелдиң нептерээниниң бир чылдагааны ол бооп турар.

⁸ Оон өске чылдагааннар база бар. Бурганга удур тура халаанының соонда Адам биле Ева тергиин эвес апаргаш, бачытты салгалдарынга дамчыткан. Бачыт — хай-халаптың база бир чылдагааны. Кижилер бачыттыг бүдүжүнден бот-боттары-биле адааннажып, эрге-чагырга дээш демисежип, дайылдажып, бот-боттарын кызагдап чоруурлар (Экклесиаст 4:1; 8:9). Оон ыңай хай-халаптар «үе-хуусаа биле таварылгадан» болуп турар (Экклесиаст 9:11). Кижи карак чивеш аразында бир-ле айыыл-халапка таваржы берип болур.

9. Бурганның хилинчек-човалаңны чөпшээреп турарында шыңгыы чылдагаан бар деп, чүге бүзүреп болур бис?

⁹ Иегова кижилерге багай чүү-даа кылбайн турар. Кижилерниң дайылдажып, кем-херек үүлгедип база бот-боттарын дарлап турарында Ооң буруузу чок. Чер шимчээшкиннериниң, хат-шуурганнарның, үерлерниң база оон-даа өске халаптарның болуп турарынга Бурганның буруузу чок. Ынчалзажок «Иегова Бүрүн Күчүлүг Бурган болза, чүге бузут-бакты узуткавайн турарыл?» деп айтырыг силерни дүвүредир чадавас. Бурган биске дыка ынак деп Библияда бижээн. Ынчап кээрге, хилинчек-човалаңны Иегованың чөпшээреп турарында шыңгыы чылдагаан бар (1 Иоанн 4:8).

10. Эрлик Иегованың дугайында чүнү чугаалаан?

¹⁰ Эдем сесерлиинге Эрлик Иегованы багай чагырыкчы  деп нүгүлдээш, Адам биле Еваны мегелээн. Бурган олардан бир-ле эки чүвени чажырып турар деп чугаалааш, кижилерге Бурган херекчок, мен Иеговадан дээре чагырар мен деп, Эрлик бир дугаар кижилерни бүзүредиксээн (Эге дөс 3:2—5; 27 дугаар Капсырылганы көрүңер).

11. Кандыг айтырыгның харыызын билип алыры биске чугула?

¹¹ Адам биле Ева Иеговага удурланып, Ону дыңнавайн барган. Чүү эки, чүү багай дээрзин боттарывыс шиитпирлеп болур бис деп бодааннар. Оларның шын эвес кылганын база бистиң аас-кежиивис чүгле Бургандан хамааржырын Иегова канчаар бадыткап болур турган?

12, 13. а) Иегова Адам биле Еваны чүге узуткавааныл? б) Эрликке делегейни чагырарын база кижилерге боттарының чагыргаларын тургузарын Иегова чүге чөпшээрээнил?

¹² Иегова Адам биле Еваны ол-ла дораан узуткаваан. Оларга ажы-төлдүг болурун чөпшээрээн. Ынчан оларның ажы-төлү кымга чагыртырын боттары шилип ап болур турган. Эрликтиң Бурганга шаптыктаар дээн оралдажыышкыннары турза-даа, чер кырын тергиин кижилер-биле долдурар дээн Бурганның күзел-бодалы албан күүсеттинер ужурлуг (Эге дөс 1:28; Исайя 55:10, 11).

¹³ Эрлик миллион-миллион дээрниң төлээлериниң мурнунга Иегованы нүгүлдээн (азы Ооң дугайында меге чүүл чугаалаан) (Иов 38:7; Даниил 7:10). Эрлик бодунуң шынныын бадытказын дээш, Иегова аңаа үени берген. Оон аңгыда кижилер Эрликтиң башкарылгазының адаанга кижи чагыргаларын тургускаш, боттарын эки башкарып шыдаар деп база Бурган оларга херекчок деп чүүлдү бадыткаар кылдыр үени берген.

14. Чоорту чүү илереп келгенил?

 ¹⁴ Кижилер бот-боттарын муң-муң чылдар иштинде чагырарын оралдашкан, ынчалза-даа оон эки чүве үнмээн. Чоорту Эрликтиң мегези база кижилерниң бот-боттарын Бурганның дузазы чокта чедиишкинниг чагырып шыдавазы тодазы-биле илереп келген. Ооң дугайында Иеремия медээчи мынча дээн: «Билир бис, Дээрги-Чаяакчы: кижи бодунуң оруун чагырып шыдавас, баар уун башкарып шыдавас» (Иеремия 10:23).

15, 16. а) Иегова кижилерниң үр үеде хилинчектенирин чүге чөпшээрээн? б) Эрликтиң чагыргазының хайындан тывылган бергелерни Иегова амгы үеде чүге шиитпирлевейн турарыл?

¹⁵ Иегова кижилерниң үр үеде хилинчектенирин чүге чөпшээрээнил? Бурган чүге ону үзе шиитпирлевейн турарыл? Чүге дизе Эрликтиң чагыргазының чедиишкин чогу бүгүдеге көскү апаар ужурлуг. А ооң илереп кээринге чедир үе херек. Кижилер чагырганың аңгы-аңгы хевирлерин шенээн, ынчалза-даа олар кажан-даа бот-боттарын эки башкарып шыдавааннар. Олар эртем-техника талазы-биле чедиишкиннерни чедип алган-даа болза, делегейде чөптүг эвес чорук, ядыы-түреңги чуртталга, кем-херек үүлгедиглери база дайын-чаа кажангызындан-даа артык нептерээн. Моон алырга, кижилер Бурган чокта боттарын башкарып шыдавас деп көскү.

¹⁶ Иегова амгы үеде Эрликтиң чагыргазының хайындан тывылган бергелерни чүге шиитпирлевейн турарыл? Чүге дээрге Иегова ону кылыр болза, Эрликке дузалап турарын көргүзүп турар боор. Оон аңгыда Бурган шупту бергелерни шиитпирлээр  болза, кижилер боттарын эки башкарып турар бис деп бодаарлар. Ол-даа, өске-даа байдалда Бурган мегени деткип турар боор ийик. Ынчалза-даа Иегова ону кылбас, чүге дизе Ол кажан-даа мегелевес (Еврейлерге 6:18).

17, 18. Иегова Эрликтиң көдүрген үймээниниң шупту уржуктарын канчаар узуткап кааптар?

¹⁷ Эрликтиң болгаш дыңнангыр эвес кижилерниң хайындан тыптып келген бергелерни Иегова бүрүнү-биле узуткап шыдаар бе? Ийе, Бурганның шыдавас чүвези чок болгай. Эрликти мегечи деп долузу-биле бадыткаан соонда, Иегова ол бергелерни шиитпирлептер. Ол бодап алган дываажаңын черге база катап тургузар. «Чевеглерде чыдар бүгү улус» дирлип кээр (Иоанн 5:28, 29). Аарыг-аржык болгаш өлүм-даа турбас. Иисус «Эрликтиң ажыл-херээн дазылындан тура тырткаш», ооң үймээниниң бүгү уржуктарын ап кааптар (1 Иоанн 3:8). Амдыызында Иегова кижилерниң Ооң дугайында билип алырын база Ону боттарының чагырыкчызы кылдыр шилиирин шыдамыы-биле манап турар. (Номчуптуңар: 2 Пётр 3:9, 10.) Амгы үеде бергелерден чайлап шыдавас-даа болзувусса, оларны ажып эртеринге Иегова биске дузалаар. (Номчуптуңар: 1 Коринфичилерге 10:13.)

¹⁸ Иегова бисти Аңаа чагыртып чурттаарын албадавайн турар. Ол кижилерге үнелиг белекти, хостуг эргени, берген. Ооң дугайында билип алыылыңар.

19. Иегова кижилерге кандыг белекти берген? Ону чүге үнелээр ужурлуг бис?

¹⁹ Дириг амытаннарга бодаарга, кижилерде хостуг  эрге бар, азы канчаар чурттаарын кижилер боттары шиитпирлээр эргелиг (Чугаалар 30:24). Иегованы өөртүр-өөртпезивис канчаар амыдырап чоруурувустан хамааржыр. Бистер тускай программа-биле ажылдаар роботтар эвес-ле болгай бис. Чуртталга биске өөрүшкүнү эккээрин Иегова күзээн. Ынчангаш Ол биске кандыг ажыл кылырывысты, кандыг кижи болурувусту, кым-биле эдержиривисти база шупту чүүлдү боттарывыс шиитпирлээривисти чөпшээрээн.

20, 21. Чуртталгада кандыг орук эң-не экил?

²⁰ Сеткиливис ханызындан ынакшылдыы-биле бараалгаарывысты Иегова күзеп турар (Матфей 22:37, 38). Бодап көрүңер даан, адазының сеткилин чүү өөртүр: оглунуң албадал-биле «мен сеңээ ынак мен» дээри бе азы шын-на сеткилинден ону чугаалаары бе? Иегова бистиң Адавыс болгаш Аңаа ынак болурувусту албадавайн турар. Бурганга бараалгаар-бараалгавазын боттарывыс шиитпирлээр бис. Эрлик база Адам биле Ева Бурганга дыңнангыр эвес болурун боттары шиитпирлээннер. А силер канчаар силер?

²¹ Чуртталгада эң-не эки орукту шилип, Иеговага бараалгаңар! Миллион-миллион кижилер шак ындыг шилилгени кылган. Бурган оларның Эрликке эвес, а Аңаа бараалгаар дээн шиитпиринге өөрүп турар (Чугаалар 27:11). Кижилер келир үеде моон соңгаар хилинчектенмес деп, Иегова аазап турар. А силер ол аазаашкынның күүсеттинерин көөр дээш, чүнү канчап болур силер? Ооң дугайында дараазында эгеден билип алыр бис.