1. Кандыг айтырыг силерге тургустунуп кээп болур?

БО НОМНУ өөренгеш, хөй-ле библейжи өөредиглерни билип алган силер, чижээ: мөңге чуртталганың дугайында, өлген улустуң байдалының болгаш диргизиишкин дугайында (Экклесиаст 9:5; Лука 23:43; Иоанн 5:28, 29; Ажыдыышкын 21:3, 4). Иегованың Херечилериниң чыыштарынче барып  эгелээш, оларның Бурганга шын мөгейип турарынга шынзыккан чадавас силер (Иоанн 13:35). Оон Иегова-биле найыралыңар быжыгып, Аңаа бараалгаар күзелиңер тыптып келген чадавас. Ынчан силерге мындыг айтырыг тургустунуп кээп болур: «Ам чүнү канчаар ужурлуг мен?»

2. Бир эфиоп кижи чүге сугга суктуруп алыксай бергенил?

² Шак ол айтырыг Иисус Христостуң үезинде чурттап чораан эфиоп кижиге база тургустунуп келген. Ол мынча дээн: «Көрем, суг бо-дур. Мээң сугга суктуруп аарымга чүү шаптыктап турарыл?» (Ажыл-чорудулга 8:26—36). Ол чүге сугга суктуруп алырын күзей бергенил? Иисус Христостуң өөреникчилериниң бирээзи, Филипп, Иисус дээрге Мессия-дыр деп эфиоп кижиге тайылбырлап бээрге, ол чүүл ооң сеткил-чүрээнге дээштиг болган. Ынчангаш ол кижи сугга суктуруп алыксай берген.

3. а) Иисус өөреникчилеринге чүнү дааскан? б) Сугга суктурары канчаар эртер ужурлугул?

³ Иеговага бараалгаарын күзээр кижи сугга суктуруп алыр ужурлуг деп Библияда тода бижээн. Иисус Христос өөреникчилеринге мындыг айтыышкын берген: «Бүгү чоннарны сугже суп, оларны Мээң өөреникчилерим боор кылдыр ээлдириңер» (Матфей 28:19). Христос боду база сугга суктуруп алган. Сугну ооң бажынче анаа-ла бызай чашпаан, а ол бүгү мага-боду-биле сугже кирген (Матфей 3:16). Ынчангаш амгы үеде христианнар база сугга суктуруп тургаш, бүгү мага-боду-биле сугже кирер ужурлуг.

4. Сугга суктуруп турары-биле кижи чүнү көргүзүп турарыл?

 ⁴ Сугга суктурганы-биле кижи Бурганның өңнүү болуксап турарын база Аңаа бараалгаар дээн изиг күзелин көргүзүп турар (Ырлар 39:8, 9). Сугга суктурарының мурнунда кижи чүнү кылыр ужурлуг?

5. а) Сугга суктуруп алыксап турар болзуңарза, эгезинде чүнү кылыр ужурлуг силер? б) Иегованың Херечилериниң ужуражылгаларынче баары чүге чугула?

⁵ Сугга суктурарының мурнунда Иегованың болгаш Иисус Христостуң дугайында билиглер алыры эргежок чугула. Библияны өөренип эгелээниңер-биле билиглерни ап эгелээн силер. (Номчуптуңар: Иоанн 17:3.) Ынчалза-даа ол дээрге чүгле бирги базым-дыр. Иегованың «күзел-соруун эң долу билип» алырынче Библия бисти кыйгырып турар (Колосчуларга 1:9). Бурганның күзел-соруун билип алырынга Иегованың Херечилериниң ужуражылгалары силерге дузалаар. Ол ужуражылгаларже үргүлчү барып тургаш, Бурган-биле чоок хамаарылганы сайзырадып ап болур силер (Еврейлерге 10:24, 25).

6. Кижи сугга суктурарының мурнунда Библияны кайы хире эки билир боор ужурлугул?

⁶ Сугга суктурарының мурнунда Библияны бирден бирээ чокка билириңерни Иегова силерден манавайн турар. Сугга суктуруп алыксай берген эфиоп кижиден база долу билигни Ол манаваан (Ажыл-чорудулга 8:30, 31). Бурганның дугайында билиглерни кезээ мөңгеде өөренир бис (Экклесиаст 3:11). Сугга суктурар дизе, кол библейжи  билиглерни билип, ооң-биле чөпшээрежири чугула (Еврейлерге 5:12).

7. Библиядан алган билиглериңер силерге кандыг салдар чедиргенил?

⁷ Библияда мынча дээн: «Бүзүрел чок болза, Бурганның сеткилинге кирери канчап болдунарыл?» (Еврейлерге 11:6). Ынчангаш кижи сугга суктурарының мурнунда-ла бүзүрелин өстүрүп алыр ужурлуг. Бурунгу Коринфиниң чамдык чурттакчылары Иисустуң эдерикчилериниң өөредип турган чүүлдерин дыңнаан соонда, «бүзүрээш, сугга суктуруп алганнар» деп Библияда бижээн (Ажыл-чорудулга 18:8). Ынчалдыр силер база Библиядан билиглерни алгаш, Бурганның аазаашкыннарынга бүзүреп, Иисустуң өргүлү бачыт биле өлүмден хостап шыдаар деп билип алган силер (Иисус 23:14; Ажыл-чорудулга 4:12; 2 Тимофейге 3:16, 17).

8. Билип алган билиглериңерни өске кижилерге чугаалаарынче силерни чүү оттурарыл?

⁸ Библиядан ап турар билиглериңерниң силерге ажык-дузазын көрген тудум, бүзүрелиңер дам-на быжыгар. Ынчангаш билип алган билиглериңерни өске бир кижиге чугаалап бээр күзелиңер оттуп кээри магатчок (Иеремия 20:9; 2 Коринфичилерге 4:13).

9, 10. а) Билип алган билиглериңерни кымнар-биле үлежип болур силер? б) Чыыш-биле кады суртаалдап эгелээр дизе, чүнү канчаар ужурлуг силер?

⁹ Чаа билиглериңерни өг-бүлеңер, өңнүктериңер, кожаларыңар азы кады ажылдап турар улузуңар-биле  үлежиксээр чадавас силер. Ону чугаалап тургаш, эптиг-чөптүг, хүндүткелдиг болуңар. Оон чоорту чыыш-биле кады суртаалдап эгелей берип болур силер. Суртаал ажылынга киржир күзелиңер тыптып келзе, силерге Библияны өөредип турар кижиге чугаалаңар. Ол силерниң библейжи дүрүмнерни амыдыралыңарга ажыглап эгелээниңерни эскерип, белен деп көргеш, хуралдың ийи удуртукчузунга силерниң-биле кады баргаш, дугуржуп алыр.

¹⁰ Удуртукчулар кол библейжи өөредиглерни эки билип алганыңарны, ол өөредиглерге бүзүрээриңерни, Библияга дүүштүр чурттап турарыңарны болгаш шынап-ла Иегованың Херечизи болуксап турарыңарны билип алыр дээш силерниң-биле чугаалажыр. Оон корткан ажыы чок, чүге дизе удуртукчулар чыыштың кежигүннери дээш аажок сагыш човап чоруурлар (Ажыл-чорудулга 20:28; 1 Пётр 5:2, 3). Удуртукчулар ол чугааның соонда силерге чыыш-биле кады суртаалдаарын чөпшээреп болур.

11. Чыыш-биле суртаалдап эгелээриниң мурнунда амыдырал чуртталгазынга өскерлиишкиннерни кылыры чүге чугула?

¹¹ Суртаалдап эгелээриниң мурнунда чуртталгаңарда база бир-ле чүүлдү өскертир ужурлууңарны удуртукчулар силерге чугаалаар чадавас. Ону кылыры чүге чугула? Өске улуска Бурганның дугайында чугаалап тургаш, бистер Ооң төлээлекчилери бооп турар бис, ынчангаш Бурганның бараалгакчызы болурунга төлептиг кылдыр амыдыраар  ужурлуг бис (1 Коринфичилерге 6:9, 10; Галатчыларга 5:19—21).

12. Чүге шупту улус бачыдын миннир ужурлуг?

¹² Сугга суктурарының бетинде база бир чугула базымны кылыр херек. Пётр элчин мынча дээн: «Силерниң бачыттарыңар өршээттинзин дээш, ооңарны миннип, Бурганче эглиңер!» (Ажыл-чорудулга 3:19). Бачыттарын миннири дээрге чүү дээни ол? Ол дээрге эрткен үезинде шын эвес кылдыр алдынып чораанынга хараадаары-дыр. Чижээ, бир эвес мөзү-шынар чок чуртталга чурттап чораан кижи болза, бачыдын миннир болза эки. Бүгү назынында шын кылдыр чурттаарын кызып чораан улус безин бачыдын миннир ужурлуг, чүге дизе шупту улус бачыттыг. Ынчангаш Бурганның өршээли кижи бүрүзүнге херек (Римчилерге 3:23; 5:12).

13. Бурганче эглири дээрге чүү дээни ол?

¹³ Шын эвес кылдыр алдынып чораанынга чүгле хараадаары четчир бе? Чок. Пётр элчин Бурганче эглириниң дугайында база бижээн. Өскээр чугаалаарга, биеэги шын эвес амыдыралын каггаш, чуртталгазын чаа арындан эгелеп алыры. Чижээ, барып көрбээниңер хоорайже чорупкан дижик силер. Халдып ора, өске угже бар чыдарыңарны билип каан силер. Чүнү канчаар силер? Машинаңарны доктааткаш, дедир ээп алыр (азы эглип кээр) болгай силер. Ынчан шын угже кирип алгаш, орууңарны уламчылаар силер. Ооң-биле дөмей, Библияны өөренип тургаш, амыдыралыңарга бир-ле  чүүлдү өскертир ужурлууңарны эскерип болур силер. Ынчан «Бурганче эглип», шын амыдыралды тудуп эгелээринге белен силер бе?

14. Бурганга бараалгаарын аазаары деп чүл ол?

¹⁴ Сугга суктурарының бетинде база бир чугула базым — Иеговага бараалгаарын аазаары. Ол дээрге чүгле Иеговага мөгеерин аазаары болгаш чүнү-даа мурнай Ооң күзел-соруун күүседири чүден артык чугула деп турарывысты илереткен тускай мөргүл-дүр (Ыдыктыг хоойлуну катаптааны 6:15).

15, 16. Бурганга бараалгаар дээн аазаашкынын бээринче кижини чүү оттуруп болур?

¹⁵ Иегова Бурганга бараалгаар деп аазаашкынны бүгү назынында чаңгыс кижи-биле чурттаар дээн даңгыракка дөмейлеп болур. Ону бир чижекке көрүптээлиңер. Аныяк оол бир кыс-биле ужуражып эгелээн дижик. Уругну эки билген тудум, аңаа сеткилинден ынакшып, ооң-биле өг-бүле тудуп алыксай берген. Ол базым дыка шыңгыы болгаш харыысалгалыг деп билип турза-даа, оолдуң ынакшылы күштүг болгаш, ону кылырынга белен.

¹⁶ Иегованың дугайында хөйнү билген тудум, Аңаа ынакшылыңар өзүп, сеткилиңер ханызындан Аңаа бараалгаксап турарыңарны билип каар силер. Ынчан Бурганга чуртталгаңарны бараалгадырын мөргүл таварыштыр аазаар күзелиңер тыптып кээр. Иисустуң эдерикчизи болуксаар кижи бодундан ойталаар ужурлуг деп Библияда  бижээн (Марк 8:34). Ооң утказы кандыгыл? Ол дээрге бүгү талазы-биле Бурганга дыңнангыр болуру-дур. Чүге дээрге Ооң күзел-соруун күүседири бистиң хууда күзелдеривистен-даа, сорулгаларывыстан-даа эргежок чугула болгай. (Номчуптуңар: 1 Пётр 4:2.)

17. Чамдык улус чуртталгазын Иеговага чүге бараалгатпайн турарыл?

¹⁷ Бир-ле кижи Бурганга аазаан сөзүн тудуп шыдавайн баарындан корткаш, чуртталгазын Иеговага бараалгадырынче далашпайн турар чадавас. Ындыг кижи Иегованы чөгендирерин күзевейн турар. А өске бир кижи чуртталгазын Бурганга бараалгатпас болза, бодунуң алдынып чорууру дээш харыы тутпас деп бодаар.

18. Харыысалга чүктээринден коргуп турар болзуңарза, силерге чүү дузалаар?

¹⁸ Харыысалга чүктээринден коргуп-даа турар болзуңарза, Иеговага ынакшылыңар силерге дузалаар. Бурганга ынак болзуңарза, аазаан сөзүңерге шынчы болур дээш, бар шааңар-биле кызар силер (Экклесиаст 5:4; Колосчуларга 1:10). Ынчан Иегованың күзел-соруун күүседири хөлүн эрттир берге деп бодавас силер. Иоанн элчин мынча дээн: «Бурганга ынаавысты Ооң чагыгларын күүсеткенивис-биле көргүзер бис, а Ооң чагыгларын күүседири берге эвес» (1 Иоанн 5:3).

19. Иеговага чуртталгазын бараалгадырындан чүге кортпас болза экил?

¹⁹ Иегова Аңаа чуртталгазын бараалгадыр дээн  улустан тергиин болурун манавайн турар. Ол бистиң кылып шыдапкы дег шаавыстан хөйнү кажан-даа негевес (Ырлар 102:14). Бурган биске шын алдынып чурттаарынга дузалаарын аазаан (Исайя 41:10). «Дээрги-Чаяакчыга чүрээңниң ханызындан идеге... Ол ынчан сээң орууңну дорттап бээр» — деп, Библия кыйгырып турар (Чугаалар 3:5, 6).

20. Иеговага чуртталгаңарны бараалгадырын аазаан соонда, чүнү кылыр ужурлуг силер?

²⁰ Бир эвес силер чуртталгаңарны Иегова Бурганга долузу-биле бараалгадырын мөргүлге аазаан болзуңарза, дараазында базымга, сугга суктурарынга, белен силер.

21, 22. Бурганга бараалгаксап турар күзелиңерни улус мурнунга канчаар көргүзүп болур силер?

²¹ Иеговага чуртталгаңарны бараалгадырын аазааш, сугга суктуруп алыксап турар болзуңарза, удуртукчулар чөвүлелиниң башкарыкчызынга дыңнадыңар. Ол акывыс удуртукчуларның кайы-бирээзин силерниң-биле кол библейжи өөредиглерни сайгарыптарын дилээр. Бир эвес олар силерни белен деп көөр болза, чоокку үеде болур Иегованың Херечилериниң шуулганынга сугга суктуруп алырыңарны сүмелеп болур. Шуулганга сугга суктурарының утказын тайылбырлаан илеткел болур. Ооң соонда илеткелчи сугга суктуруп алыр күзелдиг улустан ийи айтырыгны салыр. Ол айтырыгларга «ийе» деп харыылааш, Бурганга бараалгаар дээн күзелиңерни улус мурнунга көргүзер силер (Римчилерге 10:10).

 ²² Ам сугга суктурарынга белен силер. Силерни сугже долузу-биле сугар. Сугга суктурганыңар-биле чуртталгаңарны Иегова Бурганга бараалгатканыңарны база Иегованың Херечизи апарганыңарны шупту улуска көргүзер силер.

23. «Аданың, Оглунуң болгаш Ыдыктыг Сүлдениң ады-биле» сугга суктурары дээрге чүү дээни ол?

²³ Иисус бодунуң өөреникчилерин «Аданың, Оглунуң болгаш Ыдыктыг Сүлдениң ады-биле» сугга суктурар ужурлуг деп чугаалаан. (Номчуптуңар:  Матфей 28:19.) Ол дээрге Иегованың өндүр улуг туруш-байдалын хүндүлеп, хүлээп көрүп турарывыс-тыр. Оон аңгыда Бурганның күзел-бодалынга Иисус Христостуң ролюн база Иегова Бодунуң күзел-соруун күүседирде, ыдыктыг сүлдени ажыглап турарын медереп билип турар бис (Ырлар 82:19; Матфей 28:18; Галатчыларга 5:22, 23; 2 Пётр 1:21).

24, 25. а) Сугга суктурарының утказы кандыгыл? б) Сөөлгү эгеге чүнү сайгарар бис?

²⁴ Сугга суктурарының утказы мындыг: сугже киргениңер-биле биеэги чуртталгаңарга «өлгениңерни», а оон үнүп келгеш, Бурганның бараалгакчызы бооп, чаа амыдыралды эгелээниңерни көргүзер силер. Сактып чоруңар, силер боттарыңарны кандыг-ла бир кижиге, организацияга азы ажыл-херекке эвес, а Иегова Бурганга бараалгаткан силер.

²⁵ Чигзиниг чок, Бурганга бараалгаар дээн аазаашкыныңар база сугга суктуруп алганыңар Иегова-биле найыралыңарны быжыглаар (Ырлар 24:14). Ынчалза-даа сугга суктуруп алыры дээрге-ле камгалалды албан алыр дивээни ол. Павел элчин мынча дээн: «Боттарыңарның камгалалыңарны Бурганга бүрүн хүндүткел-биле болбаазырадырын уламчылаңар-ла» (Филипчилерге 2:12). Сугга суктурары дээрге-ле Иегова-биле найыралдың чүгле эгези-дир деп сактып чоруңар. Бурган-биле найыралды чидирбес дээш, чүнү кылыр болза экил? Ол айтырыгны сөөлгү эгеге сайгарар бис.