Бо брошюраны номчааш, Библияның эртем талазы-биле ылап шынныын, дыка хөй улус ышкаш, кайгаан чадавас сен. Чамдык шажын өөредиглери ында чок боорга, улус оон-даа кайгап ханмас. Бурган Октаргайны болгаш бүгү-ле амылыг чүүлдү алды хонук иштинде чаяаган деп Библияда бижээнин, чамдык улус дорт уткалыг билип турар. Октаргайның азы Черниң тыптып келген үезинге хамаарыштыр эртем санаашкынында болгаш Библияда херек кырында кандыг-даа чөрүшкек чүүл чок a.

Оон артык, Черде чуртталга чаяаттынган деп кыска дыңнадыг эртем шинчилелдеринге хөй арганы берип турар. Бурган бүгү амылыг чүүлдү янзы, уксаа аайы-биле чаяаганын Библияда бижээн (Эге дөс 1:11, 21, 24). Ол медээ чамдык теорияларга удурланышкак-даа болза, эртем фактылары-биле дүгжүп турар. Теориялар тыптып келгеш чиде бээр, а фактылар артып каарын үе көргүскен.

Чамдыкта кижилер Библияны шинчилээринче далашпас, чүге дизе шажыннардан чөгели төнген. Олар шажын-чүдүлгениң чүгле ийи арынныын, саттыныкчызын болгаш улусту дайынче ыдалаарын көрүп турар. Библияның өөредиглерин сагып чоруур бис дээр улустуң ажыл-херээнден, ол номнуң дугайында түңнел үндүрери шын бе? Чамдык каржы фанатиктер, расистер агартынар дээш, эволюция теориязын ажыглаарга, ону көргеш шынчы эртемденнер дүвүреп турар. Оларның каржы үүлгедиглеринге даянып, эволюция теориязының дугайында түңнел үндүрери шын бе? Ол өөредигни бодун шинчилеп, бар фактыларга деңнээри шынныг боор эвеспе?

Библияны шак ынчаар шинчилээринче сени чалап тур бис. Шажыннарның хөй кезииниң өөредиглери Библиядан ылгалып турарын көргеш, өөрүүр боор сен. Дайыннарны, язы-сөөк ылгаарын Бурган деткивес, харын-даа каржы сеткилден оваарнырынга өөредип турар, чүге дизе ындыг сеткил күчүлелге чедирер (Исайя 2:2—4; Матфей 5:43, 44; 26:52). Оон ыңай фанатизм, бадыткал чок чүүлге бүзүрээри Библияга дүүшпес. А харын-даа ёзулуг бүзүрел бадыткалдарга үндезилеттинерин база Бурганга бараалгаарда угаан-сарыылын ажыглаары чугулазын өөредип турар (Римчилерге 12:1; Еврейлерге 11:1). Библия сонуургак чорукту шиитпейн, чүс-чүс чылдар дургузунда улусту хинчектеп, дүвүредип чоруур нарын айтырыгларның харыызын дилээрин кыйгырып турар.

«Бурган бар болза, бузут-бакты чүге чөпшээреп турарыл?» — деп боданган сен бе? Библия ол-даа база өске-даа айтырыгларга бүзүрелдиг харыылап турар b. Ынчангаш алыс шынны дилээрин уламчыла, ынчан чүрээңге дээштиг, угаан-сарыылдыг, бадыткалдыг харыыларны тып алыр сен. Маңаа таварылга чугула эвес.