Өөреникчилерге нарын айтырыг
Мерген экзаменде ышкаш девидеп турар. Дарвинниң эволюция теориязы эртем сайзыралынга болгаш кижи төрелгетенни шажын өөредиглеринден хостаарынга кандыг үлүг кииргенин башкызы ам чаа-ла тайылбырлааш, өөреникчилериниң бодалын үлежип, чугаалажырын манап турар.
Мерген канчаар аайын тыппайн турар. Черни болгаш бүгү амылыг чүүлдү Бурган чаяап каан база Библияда шынны бижээн, а эволюция дээрге бадыткаттынмаан өөредиг деп, ада-иези чугаалап чораан. Башкызы-даа, ада-иези-даа эки сеткилдии-биле чугаалап турар. Оларның кайызынга бүзүрээрил?
Бүгү делегейде өөреникчилер шак ындыг байдалга чыл санында таваржып турар. Олар канчаар болза эки? Ол айтырыгны хууда шинчилеп, эволюцияның болгаш шупту чүве чаяаттынганының бадыткалдарын өөренип көргеш, чүге бүзүрээрин боттары шилип алыр ужурлуг эвес бе?
Өске улустуң чугаазын хынап албайн бүзүрээринден Библия оваарындырып турар: «Кенен кижи дыңнаан чүвезинге-ле бүзүрей бээр, а бодамчалыг кижи базым бүрүзүн ыяк бодап алыр» (Чугаалар 14:15). Библия кижилерниң өөредиглеринге хынамчалыг боорун сүмелеп турар (Римчилерге 12:1, 2).
Бүгү чүве чаяаттынганын школаларга өөретсин деп күзээр шажын бөлүктерин бо брошюра деткивейн турар. А ооң сорулгазы — чуртталга душ бооп тывылган база Библияда шупту чүвени чаяаганының дугайында медээни тоолчургу чугаа деп санаар эртемденнерниң өөредиглерин сайгарары-дыр.
Бис чуртталганың чугула кезээ — клеткаже кичээнгейни салыр бис. Клетканың тургузуунуң дугайында кайгамчык фактыларны билип алыр сен. Ол ышкаш эволюция өөредиин деткип турар чамдык даап бодаашкыннарны бодуң анализтээр сен.
Чуртталганы чаяап каан бе азы ол эволюцияның ачызында тыптып келген бе деп айтырыгны кижи бүрүзү бодунга дөмей-ле салыр апаар. Ооң дугайында боданган чадавас сен. Чуртталганы чаяап каан деп хөй улусту бүзүреткен бадыткалдарны көөрүн сүмелеп тур бис.
