Мындыг байдалды сагыштаалап көр даан: Ай-кыс Мергенни чүгле ийи ай таныыр хирезинде, сактырга, олар бот-боттарын шагда-ла билир ышкаш. Олар үзүк-соксаал чок СМС-тежип, шак шагы-биле телефонга чугаалажырлар. Олар бот-боттарын сөс чокка-ла билип турар. Ынчалза-даа ам Мерген оон-даа хөйнү күзеп турар...

Ол ийи ай дургузунда Мерген биле Ай-кыс чүгле четтинчип алгаш кылаштажып, ийи-чаңгыс ошкажыр турган. Ай-кыс амдыызында Мерген-биле чоокшулажырын күзевейн турар, ынчалза-даа Мергенниң ону кааптарындан база коргуп турар. Чүгле ооң чанынга ол бодун аажок чараш болгаш күзенчиг кылдыр миннип чоруур. «Бис бот-боттарывыска ынак болгай бис» — деп, Ай-кыс боданып турар.

Бир эвес сен таныжар назы-хар чеде берген болзуңза, мындыг байдалда чүнү канчаар сен?

Бир эвес сен физиктиг хоойлуну херекке албайн, каът бажыңдан шураптар болзуңза, чүү болурул? Сөөк-даяаң сынып, кедерезе амы-тыныңдан чарлып болур сен. Шак ынчаар самыыраар чоруктан ойталаар деп мөзү-шынар хоойлузун херекке албас болзуңза, түңнели база багай болур (1 Фессалоникчилерге 4:3).

Ооң соонда чүү болурул? Библияда: «Самыырап турар кижи бодунуң мага-бодунга удур бачыт үүлгедир» — деп бижээн (1 Коринфичилерге 6:18). Ол чүү дээни ол?

 Шинчилелдер-биле алырга, өгленириниң мурнунда эр-херээжен чорук кылган аныяк оолдарның болгаш кыстарның хөй кезии дараазында чүүлдерни миннип турган:

• ХАРААДААШКЫН. Өгленириниң мурнунда эр-херээжен харылзаа туткан оолдар-кыстарның хөй кезии ол дээш хараадап турганын чугаалаан.

• ЧИТКЕН БҮЗҮРЕЛ. Сөөлзүредир олар: «Менден өске ол оон ыңай кым-биле кады удаан ирги?» — деп чигзинип эгелээр.

• БҮТПЭЭН МАНААШКЫН. Кыс кижи сеткилинде, ону бир-ле эт дег, ажыглавайн, ооң дугайында сагыш човаар кылдыр күзеп чоруур. Дыка хөй аныяк оолдар кыс кижиниң дүжүп бергениниң соонда аңаа сонуургалының чиде бергенин эскерип турар.

• Түңнеп көрээлиңер. Өгленириниң мурнунда эр-херээжен чорук кылыр болзуңза, бодуңну куду көрүп, бир-ле үнелиг чүвени чидирип алыр сен (Римчилерге 1:24). Сээң мага-бодуң аажок үнелиг, ынчангаш ону кайы-хамаанчок төтчеглеве!

Быжыг тура-соруктуг бооп, «самыыраар чоруктан ойталаар» деп Бурганның айтыышкынынга чагыртырын күзеп турарыңны шиитпирлии-биле көргүс (1 Фессалоникчилерге 4:3). Соонда өгленип алыр болзуңза, эр-херээжен харылзааны тудар эргелиг апаар сен. Ынчан сагыш-сеткил өйүүшкүнүн-даа, хараадаашкынны-даа, бодун хүндүлевес чорукту-даа база оон-даа өске өгленириниң мурнунда эр-херээжен харылзаа кылырының багай уржуктарын миннивес сен (Чугаалар 7:22, 23; 1 Коринфичилерге 7:3).

• Сеңээ ёзулуг ынак кижи сээң кадыыңга болгаш сеткил-сагыжыңга хора чедириптер чүүлдерни кылыр бе?

• Сээң Бурган-биле харылзааңны баксырадыптар чүүлдер кылырынче ол албадаар бе? (Еврейлерге 13:4).