Мындыг байдалды сагыштаалап көр даан: Аяна аныяктар чыылган черге келген. Он минут безин эртпээнде, ол артынга таныыры үннү дыңнап каан:

Аяна хая көрнүп келгеш, холунда ийи шил туткан, Жанна дээр эжин көрүп каан. Шилдерде эзиртир суксун дээрзин ол билип турар. Жанна бир шилди олче сунгаш: «Сен чаш уруг эвес болгай сен, аа?» — деп чугаалаан.

Аяна ынаксавайн турар, ынчалза-даа Жанна ооң эжи болгай. Ам арта Аяна чыдып калган кижи кылдыр көстүксевейн турар. Оон аңгыда Жаннаның ат-сураа эки бооп турар. «Бир эвес ол безин ижип турар болза, ында багай чүү деп? Ол наркотиктер эвес ышкажыл» — деп, Аяна бодун оожургадып турар.

Аянаның орнунга турган болзуңза, чүнү канчаар сен?

Ындыг байдалда мерген угаанныг шиитпир хүлээп алыр дизе, быжыг туруш херек. Бодуңну болгаш үзел-бодалдарыңны эки билип алыр болзуңза, өскелерге башкартпайн, чуртталгаңны бодуң башкарып шыдаар боор сен (1 Коринфичилерге 9:26, 27).

Ындыг быжыг турушту канчаар сайзырадып ап болурул? Баштай дараазында айтырыгларга харыылап көрем.

Бодуңда бир-ле арга-шинек болгаш эки талалар бар деп чүүлдү миннир болзуңза, ол чүүл бодуңче шын көрүштүг болурунга дузалаар.

БИБЛИЯДАН ЧИЖЕК. Павел элчин: «„Чеченим кончуг“ деп шыдавас боорум чадавас, ынчалза-даа билиг дугайты херек бир өске болдур ийин» — деп бижээн (2 Коринфичилерге 11:6). Ыдыктыг Бижилгени ханы билир болгаш, Павел ооң арга-шинээнге чигзинип турган улуска харыы берип шыдаар турган. Өскелерниң багай хамаарылгазы ооң бодунга бүзүрелин кошкадып шыдаваан (2 Коринфичилерге 10:10; 11:5).

БОДУҢНУ ХЫНАП КӨР. Адаанга бодуңнуң салым-чаяаныңны азы кылып билир чүүлдериңни бижип ал.

Ам бодуңнуң аажы-чаңыңның кандыг-бир эки талазын тайылбырлап бижип көр. Кандыг кижи сен, боданып көрем: сагыш човангыр? беримчелиг? бүзүрелдиг? кызымак?

Кошкак талаларың сеңээ айыылды тургузуп болур. Ынчангаш оларга алзыр болзуңза, мөзү-шынар талазы-биле туруштуг чорууңну чидирип ап болур сен.

БИБЛИЯДАН ЧИЖЕК. Павел кошкак талаларын миннип турган. Ол: «Угаан-сагыжымга Бурганның хоойлузун өөрүшкү-маңнайлыг хүлээп алыр-дыр мен. Ынчалза-даа кижи бүдүжүмде өске дүрүм-хоойлу барын эскердим. Ол дүрүм-хоойлу угааным хоойлузунга удур демисежип, мени мага-бодумда ажыл-херээн боттандырган бачыттың дүрүм-хоойлузунуң туттурукчузу кылып турар» — деп бижээн (Римчилерге 7:22, 23).

БОДУҢНУ ХЫНАП КӨР. Кандыг кошкак талаларың-биле демисежир болзуңза эки?

Таксиге олурупкаш, чолаачыны, бензин төнгүжеге чедир, бир кварталды тырыкыландыр халдыр кылдыр дилээр сен бе? Чок, болбайн! Ол артык чарыгдал болгаш мелегей чорук ышкажыл.

Кичээл: салган сорулгалар, чаңгыс черге тапталбайн, бурунгаар базымнар кылырынга дузалаар. Сен чүү чүвеже чүткүп турарыңны болгаш ону канчаар чедип алырыңны эки билир болгай сен.

БИБЛИЯДАН ЧИЖЕК. «Ынчангаш мен база эчис сорулгазы чок кижи дег, анаа-ла хей чүгүрбейн чор мен» — деп, Павел бижээн (1 Коринфичилерге 9:26). Анаа-ла агым аайы-биле байдалдарга чагыртырының орнунга Павел сорулгалар салып, оларже чүткүп чораан (Филипчилерге 3:12—14).

БОДУҢНУ ХЫНАП КӨР. Чыл дургузунда кандыг үш сорулганы чедип алыр деп турарыңны бижип ал.

Быжыг үзел-бодалдар чокта шиитпир чок кижи бооп, кежиниң өңүн өскертип турар хамелеон дег, өскелерниң аайы-биле чоруур кижи апаар сен. А ол чүүл сени быжыг туружу болгаш бодунуң үзел-бодалдары чок кижи кылдыр көргүзер.

Бүзүрелиңниң аайы-биле алдынар болзуңза, өскелер чүнү-даа кылып турда, үзел-бодалдарыңга бердинген бооп артып каар сен.

БИБЛИЯДАН ЧИЖЕК. Даниил медээчи элээди турда, ону төрелдеринден чарып каан. Ынчалза-даа ол Бурганның айтыышкыннарын сагыыр деп, «ыяк шиитпирлеп алган» (Даниил 1:8). Шак ынчаар ол бодунуң шиитпиринге шынчы артканын көргүскен. Даниил, шынап-ла, бодунуң үзел-бодалдарынга дүүштүр чурттап чораан.

БОДУҢНУ ХЫНАП КӨР. Үзел-бодалдарың кандыгыл? Чижээ: Бурган бар деп, бүзүрээр сен бе? Ол бар деп, сени чүү бүзүредип турарыл?

Бурганның мөзү-шынарга хамаарышкан негелделерин сеңээ ажыктыг деп, санаар сен бе? Ийе болза, чүге?

Ынчаарга, кандыг кижи сен? Сырын аайы-биле хадып чоруур бүрү сен бе, азы күштүг хат-шуурганны безин шыдап эртиптер быжыг ыяш сен бе? Бүзүрелиңни быжыгла, ынчан быжыг ыяшка дөмей боор сен. Оон «мен кандыг кижи мен?» деп айтырыгга харыылап шыдаар сен.