Өг-бүле чуртталгаңга өөрүшкүлүг бол

Өг-бүлелер херек кырында аас-кежиктиг бооп болур бе?

Ол канчап болдунарыл?

 Бо дептержигештиң арыннарында көргүскен өг-бүлелер ышкаш аас-кежиктиг болгаш демниг өг-бүлелерни билир сен бе? Кайда-даа өг-бүлелер буступ турар. Чарлыышкыннар, ажылдың бүзүрел чогу, долу эвес өг-бүлелерде ажы-төлдүң база ада-иениң бергелери, кижилерниң чөгел төнгени — бо бүгү сандараашкынны ханыладып турар. Өг-бүле чуртталга талазы-биле бир эксперт мынча деп хомудаан: «Өг-бүлениң буурап турары амгы үеде кижи бүрүзүнге билдингир».

Чүге бо үеде өг-бүлелерде ындыг нарын бергелер тыптып турарыл? Өг-бүле чуртталгазынга канчаар өөрүп болур бис?

Өг-бүле канчаар тыптып келгенил

Бо айтырыгларга харыылаар дизе, өгленириниң тургузуун база өг-бүлениң канчаар тыптып келгенин билип алыр болзувусса эки. Бир эвес өг-бүлелерниң Тургузукчу-Чаяакчызы бар болза, өг-бүлелер удуртулганы оон дилээр ужурлуг. Чүге дизе өг-бүле чуртталгазынга канчаар долузу-биле өөрүшкүлүг бооп болурувусту, чүгле ол кымдан-даа артык дээре билир.

Солун чүүл, дыка хөй улустуң бодалы-биле алырга, өг-бүле тургузуунуң Чаяакчызы чок. «Чамдык эртемденнер өгленириниң тывылганын кижиден куду турар дириг-амытаннарның ийи кылдыр эдержири-биле холбаар хөөннүг» — деп, «Американ энциклопедияда» («The Encyclopedia Americana») чугаалап турар. Ынчалза-даа  Иисус Христос эр болгаш херээжен кижи чаяаттынган болганын чугаалаан. Бодунуң сөстерин бадыткаары-биле ол библейжи дыңнадыгны цитаталааш, немеп каан: «Бурганның каттыштырган чүвезин кижи чарып болбас ужурлуг» (Матфейниң 19:4—6).

Ийе, Иисус Христос шынны чугаалаан. Угаан-сарыылдыг Бурган бир дугаар кижилерни чаяап каан болгаш, оларның өг-бүле чуртталгазы аас-кежиктиг болзун дээш сагыш човаан. Бурган бир дугаар кижилерни өг-бүлеге каттыштыргаш, эр кижи «бодунуң кадайы-биле чыпшына бээр, олар ам ийи эвес, а чаңгыс мага-бот боор» деп чугаалаан (Бытие 2:22—24). Өг-бүлелерде бергелерниң тыптып турары дээрге оларның амыдыралының аяны Чаяакчының Сөзүнде, Библияда, тургускан негелделерни сагывайн турарындан эвес-тир бе?

 Кандыг орук чедиишкинге экээрил?

Сен, чугаажок, билир болгай сен, амгы делегей кижилерге чүгле бодун бодаар болгаш чүгле бодунуң күзелдерин боттандырарынче чүткүлдү сайзырадырын деткип турар. «Чазый чорук ажырбас — деп, бир финансист Каттышкан Штаттарда дээди өөредилге чериниң доозукчу клазынга чугаалаан. — Чазый-даа болзуңза, ынчалзажок бодуңнуң дугайыңда эки бодалдыг бооп болур сен». Ынчалза-даа бай чуртталга сүрери чедиишкинге чедирбес. Материализм дээрге өг-бүле чуртталгазының база бир эң коргунчуг айыылы, чүге дизе ол кижилерниң аразында харылзаазын бузуп, үезин база акшазын чип турар. Маңаа дөмейлешпейн турар, Библияның чүгле ийи мерген өөредии аас-кежиктиг болурунга чүү чугулазын көргүзүп турарын эскерип көрем:

«Ынакшыл-биле кылган ногаа аймаадан чем, көөр хөңнү чогу-биле семиртир азырап каан бугадан дээре».

«Долдур мал-маган дөгерген алгыш-кырыштыг бажыңдан, кургаг кескинди хлеб биле тайбың оон дээре»

Притчи 15:17; 17:1.

Шынап-ла, кандыг кончуг бүзүрелдиг сөстер боор але? Бир эвес өг-бүле бүрүзү бо өөредиглерни сагып чораан болза, өртемчей кайы-хире өске турарын бодап көр даан! Библия өг-бүле кежигүннеринге бот-боттарының аразынга кандыг хамаарылгалыг болурунуң дугайында үнелиг удуртулгазын берип турар. Чүгле каш библейжи сүмелерни көрүптээли:

Өг-бүлелерниң ээлеринге: «...бодунуң мага-бодунга дег, кадайларынга ынак боор ужурлуг» (Ефесчилерге 5:28—30).

Бөдүүн-даа болза, хөлчок ажыктыг! Оон аңгыда, Библия өгнүң эр ээзи кадайынга хүндүткелдиг болурун сүмелеп турар (1 Пётрнуң 3:7). Ол эжинге онзагай кичээнгей салып, эргеледип, бодап билбишаан, деткип турар болза, ону көргүзүп турары ол. Ашаа кадайының саналын үнелевишаан, ону дыңнаар (Бытие 21:12, дөмейлеп көр). Бир эвес ашаа кадайынга бодунга күзеп турары дег хамаарылгалыг болур болза, кандыг-даа өг-бүлеге ажыктыг болур деп чөпшээрежир сен бе? (Матфейниң 7:12).

 Өгнүң херээжен ээзинге: «Кадайы ашаан хүндүлезин» (Ефесчилерге 5:33).

Кадайы ашаанга ооң амыр эвес харыысалгаларын күүседиринге дузалажып, өг-бүлениң аас-кежиинге бодунуң үүлезин киирип турар. Шак-ла ынчаар ол баш удур көрдүнген турган, чүге дизе Бурган эр кижиге кадайын «дузалакчы, немелде кылдыр» берген (Бытие 2:18,ЧӨ). Бир эвес кадайы ашаан хүндүлеп, ооң шиитпирлерин деткип база өг-бүлениң сорулгаларын чедип алырынга кады ажылдажырга, кандыг йөрээлдерни өг-бүле чуртталгазынга киирер-дир, бодап көр даан?

Ашак, кадайга: «Ашак, кадай харылзаалары арыг-шынчы болзун» (Еврейлерге 13:4).

Ашак-кадай улус бот-боттарынга шынчы болур болза, өг-бүле чуртталгазы чигзиниг чок аас-кежик эккээр. Ашак-кадай болганынга шынчы эвези өг-бүлелерни үргүлчү бузуп турар (Притчи 6:27—29, 32). Ынчангаштың Библияның бисти бүзүредир чүүлү мерген: «Чалыы шааңдан кадайың-биле аргаланып чор... ооң ынакшылынга үргүлчү ханып чор. Чүү дээш... өске херээженни сонуургаар сен?» (Притчи 5:18—20).

Ада-иеге: «Төлүңерни шын орукка чажындан өөредиңер» (Притчи 22:6, АО).

Бир эвес ада-иелер ажы-төлүнге үргүлчү үе-шагын, кичээнгейин салып турар болза, ол өг-бүле чуртталгазынга эки салдарлыг болур. Ынчангаш Библия ада-иелерни ажы-төлүн «бажыңга оргаш, орукка чорааш, удуурунуң бетинде, оттуп келгеш» шын дүрүм-чижекке өөредирин бүзүрелдии-биле чугаалап турар (Второзаконие 11:19). Ада-иелер ажы-төлүн кижизидип тургаш, ынакшылын көргүзер ужурлуг деп, база Библияда бижээн (Ефесчилерге 6:4).

Ажы-төлге: «Ажы-төл, Дээрги-Чаяакчыга башкарткаш, ада-иеңерни дыңнаңар» (Ефесчилерге 6:1).

Хоойлу-дүрүм сагывас бо делегейге ада-иеге чагыртыры шынап-ла белен эвес. Ындыг болза-даа өг-бүле Чаяакчызының чугаазын күүседири сарыылдыг мерген эвес-тир бе? Бистиң өг-бүле чуртталгавысты канчаар аас-кежиктиг кылырын чүден артык ол дээре билир. Ынчангаш ада-иезиниң сөзүн күүседирин кызары ажы-төлге чугула. Бо делегейниң багай чүүл кылырынче көгүдүглеринден шиитпирлиг ойталаары оларга чугула (Притчи 1:10—19).

 Өг-бүле чуртталгазының кежии бажыңның кежигүн бүрүзү библейжи сүмени кайы-хире ажыглаарындан болур. Өг-бүле чүгле амгы үеде өөрүп чурттаар эвес, а келир үеде Бурганның аазаан кайгамчыктыг делегейинге чурттаар идегелдиг болур (2 Пётрнуң 3:13, Ажыдыышкын 21:3, 4). Ынчангаш Библияны кады өөренири сээң өг-бүлеңге чаңчыл болзун! Миллион-миллион бүгү делегейде өг-бүлелер «Өг-бүлениң аас-кежииниң чажыды» деп номдан шынап-ла ажыктыг удуртулганы тып ап болур деп түңнелге келген.

Өскээр айытпаан болза библейжи цитаталарны орус дылда Еврей Бижиктерниң Синодалдыг үндүрүделгезинден очулдурган. Грек Бижиктерни «Чаа Дугуржулга-Чагыг» очулгадан алдынган. Өске очулгалар: АО ― «Амгы үениң очулгазы»; ЧӨ ― «Ыдыктыг Бижиктерниң Чаа Өртемчей очулгазы».