Эрлик болгаш ооң буктары чүге кижилерни мегелээрин кызып турар? Бисти оларның үймээнинге катчып, оларга мөгейип эгелээривисти күзеп турар. Оон ыңай оларның мегезинге бүзүреп, Бурганның сеткилинге кирбес ажыл-херектер кылырывысты күзээр. Иеговага таарымча чок ёзу-чаңчылдар колдуунда өлген улус-биле харылзаалыг боор.

Чоок киживис чок апаарга, биске дыка улуг согуг боор. Ынчангаш кажыыдал көргүзеринде багай чүве чок. Чоок эжи Лазар чок апаарга, Иисус «ыглай берген» (Иоанн 11:35).

Бүдүн делегейде өлүм-биле харылзаалыг аңгы-аңгы ёзу-чаңчылдар хөй. Оларның хөй кезии библейжи дүрүмнерни хажытпайн турар. Ынчалза-даа чамдыызы өлген кижиниң сүнезини улаштыр чурттап, бисти хайгаарап чоруур деп өөредип турар. Чок апарган кижиниң хааржааның чанынга олуруп, ооң-биле байырлажып, ыыткыр ыглажып база хөөржүдүлге чаңчылдарын дыка хынамчалыг сагыыр боор. Бо бүгүнү улус өлген кижиниң сеткилинге кирбейн баарындан корткаш кылыр. Ынчалза-даа «өлүглер чүнү-даа билбес» болганда, ол ёзу-чаңчылдарга киржип турар улус Эрликтиң мегезин деткип турар (Экклесиаст 9:5).

Өлген улус дириг кижилерниң дузазын хереглеп турар база оларны оожургатпас болза, хора чедирип болур деп, чамдык ёзу-чаңчылдар өөредип турар. Чамдык чурттарда өлген кижиниң 40 хонуун база чылдаанын эрттирип, сөөлгү доюн кылып, тускай ёзулалдарны сагып турар. Ынчаар кылырга, өлген кижи өске оранче чоруй баар деп бодаарлар. Оон бир нептереңгей ёзу-чаңчыл — өлген кижиниң чанынга аъш-чем салыры.

Ол ёзу-чаңчылдар шын эвес, чүге дизе Эрликтиң өлген улуска хамаарыштыр меге өөредиин деткип турар. Буктарның меге өөредиинге үндезилээн ёзу-чаңчылдарга киржир болзувусса, Иегова аңаа чүүлзүнер бе? Чок! (2 Коринфичилерге 6:14—18).

Алыс шын Бурганның бараалгакчылары Эрликтиң меге өөредиин деткип турар ёзулалдарга киришпес. Ооң орнунга олар дириг улус дээш сагыш човап, оларны оожургадып, дузалажып турар. А чок апарган кижиге чүгле Иегова дузалап шыдаар деп, олар билир (Иов 14:14, 15).

Чамдык улус кара күштер-биле боттары азы караң көрнүр улус таварыштыр харылзажып турар. Ону караң көрнүр чорук деп адаар. Хамнаары, сымыраныры, илби-шидилээри, төлге салыры база өлген улус-биле чугаалажыры дээрге караң көрнүр чоруктуң хевирлери-дир.

Библияда: «Чон аразынга... төлгечи, караң көрнүр кижи, илбилиг сөстер чугаалаар кижи, сымыраачы, шишпикчи, илбичи, өлүг улустуң сүнезиннерин кыйгырар кижи база турбазын. Чүге дээрге ындыг чүүлдер кылып турар улус Дээрги-Чаяакчының мурнунга бужар» — деп бижээн (Ыдыктыг хоойлуну катаптааны 18:10—12).

Караң көрнүр чорук-биле кандыг-даа харылзаа тутпазын Иегова чүге шыңгыы оваарындырып турар?

Ол биске экини күзээш база кижилерге ынак болгаш, сагыш човап турар. Оон аңгыда, буктар-биле харылзаа тудар кижи хинчектенир деп, ол дыка эки билир.

Бразилиядан ооң мурнунда караң көрнүр чораан Нильда ону бодунуң кежинге көрген. Буктар ону дыка хинчектеп турган. «Буктар... меңээ чүнү кылырымны дужаап турганнар. Бо-ла медерелим ышкыныптар апарган мен. Оон мени сагыш аараан улустуң эмчизинге кезек үе ишти чыттырып каан. Кара күштер мени хинчектеп туруп бээрге, шыдашпайн, оожургадыр эмнер ижип, арагалап, таакпылап эгелээн мен. Бо бүгү хөй чылдар ишти уламчылап келген» — деп, Нильда сактып чугаалаан.

Нильда чоорту Иегованың болгаш ооң бараалгакчыларының дузазы-биле кара күштерден адырлып алгаш, ужур-уткалыг, аас-кежиктиг чурттап эгелээн. «[Каржы] күштерден дезиңер, безин олар-биле бичии-даа харылзашпаңар» — деп, ол үлешкен.