Иегова Эрликтиң бүгү кылган каржы-бак ажыл-херээн долузу-биле узуткаар. Бүгү черни чагырар кылдыр, ол Иисусту томуйлап каан. Иисустуң чагыргазының үезинде чер кыры дываажаң апаар (Даниил 7:13, 14; Лука 23:43, Чаа делегей).

Иегова ону мынчаар аазап турар:

• АЪШ-ЧЕМ ЭЛБЕК БООР: «Чер биске бодунуң дүжүдүн берзин, Бурганывыс биске ачы-буянын хайырлазын». «Ооң чуртунга, даглар бажынга тараа элбек» боор (Ырлар 66:7; 71:16).

• ДАЙЫННАР БОЛБАС: «Дээрги-Чаяакчының ажыл-херектерин көрүңерем — чер-делегейге кайы хире кайгамчык чүүлдерни кылган-дыр. Чер-делегейниң бүгү кыдыгларынга чаа-дайыннарны Ол соксадып... тур» (Ырлар 45:9, 10).

• КАРЖЫ УЛУС ТУРБАС: «Бузут үүлгедикчилери узуткадып каар болгай... Ам бичии болгаш, бузуттуг кижи чок апаар, ооң турган черин көөрге, ол чиде берген болур» (Ырлар 36:9, 10).

• ААРЫГ-АРЖЫК, ХИЛИНЧЕК-ЧОВАЛАҢ, ӨЛҮМ-ЧИДИМ ТУРБАС: «Ынчан согурларның караа көрүп, дүлейлерниң кулаа дыңнап эгелээр. Ынчан аскак кижи иви ышкаш шурап, үнү чок кижи өөрүшкүлүг ырлап эгелээр» (Исайя 35:5, 6).

  «Бурган ам кижилер-биле кады чурттай бээр... Бурган оларның карактарында чажын чодуп бээр, өлүм-даа, ажыг-шүжүг-даа, ыы-сыы-даа, аарышкы-даа моон соңгаар турбас. Ооң мурнунда турган шупту чүве эрте берген» (Ажыдыышкын 21:3, 4, Чаа делегей).

Эрликке болгаш ооң буктарынга көөрде, Иегова кажанда-даа мегелевес. Ооң шупту аазаашкыннары албан күүсеттинер (Лука 1:36, 37). Иегова сеңээ ынак болгаш, черге тургузар дываажаңынга сээң чурттаарыңны күзеп турар. Бурганның Сөзүнден кайгамчыктыг алыс шынны сеңээ чугаалап бээр кылдыр, Иегованың Херечилерин диле. Ол алыс шынны чуртталгаңда ажыглаар болзуңза, мегениң, бүдүүлүк чоруктуң, дүмбей-караңгының кулданыындан хосталыр сен. А келир үеде бачыт болгаш өлүмден адырлып алыр сен. Иисус: «Ынчан алыс шынны билип алыр силер — оон ол шын силерни хостуг кылып каар» — дээн (Иоанн 8:32).