«Мен Сьерра-Леонениң соңгу чүгүнде бичии суурга өскен мен — деп, Дауда чугаалаан. — Бичии оол турумда бистиң өг-бүлевис өске бир өг-бүле-биле чер былаажып эгелээн. Ону тодарадыр дээш, хам кижи чалап алган бис. Ол хам көңгүс өске бир эр кижини чалап алгаш, ону ак пөс-биле шыпкаш, аңаа көрүнчүк тутсуп берген. Бичии болганда, ол эр кижи сириңейнип, дериде берген. Ол көрүнчүкче көрүп алгаш: „Ак хептиг, буурул баштыг, күдүгүр кырган ашактың кел чыдарын көрүп тур мен!“ — деп алгырган.

Ол кырган-ачамның овур-хевирин чугаалап турган! Оон ол эр кижи шугулдап: „Меңээ бүзүревес болзуңарза, боттарыңар көрүптүңер!“ — деп алгырып эгелээн. Ынчалза-даа бистиң кайывыс-даа дидинмээн. Хам кижи ынчан оът-сигенден, бүрүлерден кылган хандызын олче бызай чажып, ону оожургаткан.

Көрүнчүкче көрүп турган кижи таварыштыр „кырган-ачам“ ол чер бистиң деп база кырган-авам ону хостуг эргелиг болбаазырадып болур дээн. Өске өг-бүле ооң-биле чөпшээрешкен. Шак ынчаар ол херек шиитпирлеттинген».

Барыын Африкада ындыг болуушкуннар — анаа чүүл-дүр. Чок апарган кижилер өске оранче чорупкаш, дириг кижилерни хайгаарап, оларның чуртталгазынче салдар чедирип турар деп, Африкада база делегейниң өске-даа черлеринде сая-сая улус бүзүреп турар. Ол шынап-ла ындыг бе? Херек кырында өлген кижи улаштыр чурттаар бе? Бир эвес чурттавас болза, кымнар өлген кижиниң сүнези болуп алгаш, көстүп турарыл? Бо айтырыгларның шын харыызын билип алыры эргежок чугула. Чүге дизе оон бистиң чуртталгавыс хамааржыр.