Библияда Эрлик «бүгү делегейни дуурайлап» турар дээн (Ажыдыышкын 12:9). Эрлик болгаш буктар кижилерни Бурганның Сөзү Библияга бүзүрээрин күзевейн турар. Чок апарган улус өске оранда чурттап турар деп улусту бүзүредирин олар кызып турар. Ону канчаар кылып турарын көрээлем.

Хөй шажыннарда кижи чок апаарга, мага-бот өлүп каар, а ооң сүнезини өлбейн, улаштыр чурттап чоруур деп өөредип турар.

Ынчалза-даа Бурганның Сөзү ынчаар өөретпейн турар. Чижээ, Адамның чаяаттынганын Библияда мынча дээн: «Дээрги-Бурган-Чаяакчы черниң довураандан кижини чаяагаш, ооң думчуунче амыдыралдың тыныжын киир үрүптерге, кижи амылыг апарган» (Эге дөс 2:7). Моон алырга, Бурган Адамның мага-бодунга өлүм соонда улаштыр чурттаар кандыг-даа сүнезин бербээн.

Дириг амытаннарда улаштыр чурттаар сүнезин база чок. Бурган дириг амытаннарны, куштарны, балыктарны чаяагаш, амы-тынны бээрге, олар дириг апарган (Эге дөс 1:20, 21, 24, 30).

Бүдүн Библияны номчуур болзуңза, «өлүм чок сүнезин» деп сөстер тыппас сен. Ол дээрге Эрликтиң болгаш ооң буктарының меге өөредии-дир. А Иегова ындыг меге шажын өөредиинге хөңнү чок (Чугаалар 6:16—19; 1 Тимофейге 4:1, 2).

Эрлик кижилерни дуурайлаар дээш, караң көрнүр улусту база ажыглап турар. Караң көрнүр кижи — көзүлбес чаяалгалардан медээлер ап турар кижи-дир. Дыка хөй кижилер база караң көрнүр кижи боду медээлерни чок апарган улустуң сүнезини чугаалап берип турар деп бүзүрээрлер. Ынчалза-даа ындыг чүүл болдунмас деп Библиядан көрдүвүс (Экклесиаст 9:5, 6, 10).

Ынчаарга ол медээлерни олар кайыын ап турар? Аза-буктардан! Кижи дириг турда, олар ону көрүп турган болгаш, ооң канчаар чугааланырын, овур-хевирин, чүнү кылып база чүнү билир турганын дыка эки билирлер. Ынчангаш буктарга чок апарган кижини өттүнери берге эвес (1 Хааннар 28:3—19).

Өлген улустуң байдалының дугайында мегени тарадыр Эрликтиң база бир аргазы — меге чугаалар-дыр. Ол чугаалар улусту алыс шындан ырадып турар (2 Тимофейге 4:4).

Африкада улус чок апарган кижини дириг кылдыр көрген төөгүлерни бо-ла чугаалажыр. Мөчээн кижини чурттап турган черинден ыракта өске черге көрген боорлар. Ынчалза-даа бодуңдан айтыр: бир эвес ол кижи өлүглер оранындан кээп шыдаар турган болза, өске черже барбайн, өг-бүлезинче, эштеринче чедип кээр эвес деп бе?

Ол көрген кижизи чок апарган кижиге анаа дөмей бооп болур. Чижээ, ийи бараалгакчы бир суурга суртаалдап турда, оларның соондан улгады берген эр кижи каш шак ишти кылаштап келген. Акывыстың бирээзин ол кижи каш чыл бурунгаар чок апарган кады төрээн дуңмазы деп бодаан. Шынында ол көңгүс өске кижи деп билдингир, ынчалза-даа ол эр кижи дуңмам-дыр дээш турган. Соонда ол кожаларынга, эштеринге ону канчаар хөөреп турганын бодап көр даан!

Көстүүшкүннер, дүштер база үннер дээн ышкаш элдептиг болуушкуннарга таварышкан кижилерниң дугайында дыңнаан чадавас силер. Ындыг хуулгаазын болуушкуннар улусту коргудуп турар. Барыын Африкага чурттап чораан Марейн чок апарган кырган-авазының ону кыйгырган үнүн дүнелерде бо-ла дыңнаар турган. Ол корткан алгызы-биле бүдүн өг-бүлезин оттуруп кааптар турган. Сөөлүнде ол сээдеңней берген.

Чок апарган улус улаштыр чурттаар турган болза, ынак улузун чүге ынчаар коргудар деп? Ол коргунчуг үннер аза-буктардан кээп турар.

Ажыктыг база оожургал эккеп турар ышкаш болуушкуннар дугайында чүнү чугаалап болур? Чижээ, Сьерра-Леонеден Гбассай аарый бергеш, чок апарган ачазын дүжээн. Ачазы аңаа бир ыяшка баргаш, ооң бүрүзүн алгаш, ону чуура соктааш, сугга хоюткаш, иживит деп сүмелээн. Ону кылырының мурнунда Гбассай кым-биле-даа чугаалашпас ужурлуг турган. Шак ынчаар кылгаш, ол экирий берген.

А бир херээжен кижи ашааның чок апарганының соонда, дараазында дүнеде ашаан чараш идик-хептиг, аажок силиг кылдыр көргенин чугаалаан.

Ындыг медээлер база көстүүшкүннер хора чок, безин ажыктыг ышкаш сагындырар. Олар Бургандан бе? Чок! Иегова — алыс шынның Бурганы (Ырлар 31:5, Чаа делегей). Ол бисти ындыг көстүүшкүннер-биле кажанда-даа мегелеп-дуурайлавас. Ынчаар чүгле буктар кылыр.

Эки буктар турар бе? Чок. Чамдыкта дузалажып турар ышкаш-даа болза, херек кырында олар каржы. Эрлик Ева-биле чугаалажып тургаш, дыка эки кылдыр көстүп турган (Эге дөс 3:1). Ева ооң мегезинге алзып, аайы-биле кылгаш, канчалган? Ол өлүп калган.

Бак кижи мегелээр азы бир-ле кижини дуурайлаар дээш, аажок эки кижи бооп алдынарын билир болгай сен. Тыва дылда мындыг үлегер домак бар: «Чыланның шокары даштында. Кижиниң шокары иштинде». А Бурганның Сөзү: «Эрлик боду безин дээрниң чырыткылыг төлээзи дег хевирлиг бооп, мегелеп көстүп турар» — деп оваарындырган (2 Коринфичилерге 11:14).

Бурган амгы үеде кижилерге медээлерни көстүүшкүннер, дүштер азы үннер таварыштыр дамчытпайн турар. «Кандыг-даа буянныг херек кылыры-биле чепсегленген боор» кылдыр, Бурган оларны Библия таварыштыр өөредип, удуртуп турар (2 Тимофейге 3:17).

Ынчангаш Эрликтиң какпаларындан оваарындырып турары-биле Иегова биске ынакшылын көргүзүп турар. Аза-буктар — айыылдыг дайзыннар деп, ол дыка эки билир.