Көзүлбес чаяалгалар дээрге черге чурттап чорааш, чок апарган кижилер эвес-тир
Көзүлбес чаяалгалар херек кырында бар! Каракка көзүлбес кара күштер-даа, ангелдер-даа бар. Оларны черге чурттап чорааш, чок апарган кижилер деп болур бе?
Чок! Кижи чок апаргаш, улустуң бүзүреп турары дег, өске оранче чоруй барбас. Ону кайыын билип ап болур бис? Библиядан. Библия дээрге алыс шынның ному-дур. Ону биске дың чаңгыс Иегова дээр аттыг Бурган берген. Иегова кижилерни чаяап каан болгаш, кижи чок апаарга, ооң-биле чүү болурун дыка эки билир (Ырлар 83:18, Чаа делегей; 2 Тимофейге 3:16).
Адам черниң довураандан тывылгаш, довурак-доозунче шилчий берген
Бурган бир дугаар кижини «черниң довураандан» чаяап каан деп Библияда бижээн (Эге дөс 2:7). Бурган ону Эдем сесерлиинге, дываажаңга, чурттадып каан. Адам Иегованың хоойлузун хажытпаан болза, өлбес турган, ам-даа дириг турар ийик. Адам Бурганның хоойлузун өжегерээн үрептерге, ол аңаа: «Довурак-доозундан тывылган сен, довурак-доозунче катап-ла шилчий бээр сен» — дээн (Эге дөс 3:19).
Ооң утказы кандыгыл? Боданып көрем: Иегова Адамны довурактан чаяар мурнунда ол каяа турган? Ол каяа-даа турбаан, дээрниң төлээзи-даа эвес турган. Ол шуут чок турган! Ынчангаш Иегова Адамга «довурак-доозунче катап-ла шилчий бээр сен» дээни-биле ону чок апаар сен деп чугаалаан. Адам өске оранче-даа чорбаан. Ооң амы-тыны үстүп каарга, чуртталгазы өлүм-биле төнүп калган. Өлүм дээрге амы-тынга удурланышкак чүүл-дүр.
Өске чок апарган улустар-биле чүү болуп турар? Олар бир-ле черде чурттап турар бе? Библияда ооң харыызы бар:
«Бүгү-ле дириг чүве [кижилер-даа, дириг амытаннар-даа] чаңгыс черже чоруп турар, олар шуптузу довурак-доозундан тыптып келген база довурак-доозунче катап эгли бээр» (Экклесиаст 3:20).
«Өлүглер чүнү-даа билбес» (Экклесиаст 9:5).
«Оларның ынакшылы-даа, көөр хөөн чогу-даа, хүннээшкини-даа шагда-ла читкен» (Экклесиаст 9:6).
«Чеде бээриң чевегде ажыл-даа чок, бодал-даа чок, билиг-даа чок, мерген угаан-даа чок» (Экклесиаст 9:10, Чаа делегей).
«Кижи хөөкүй амызы үстүп, кара черже кире бээр, боттандырар дээн бодалдары ол-ла дораан чиде бээр» (Ырлар 145:4).
Чүгле дириг улус бо ажылдарны кылып шыдаар
Бо библейжи шүлүктер-биле чөпшээрежири сеңээ берге-дир бе? Ийе болза, мооң дугайында бодан: хөй өг-бүлелерде ада кижи өг-бүлезин хандырар дээш, акшаны ажылдап ап турар. Ол чок апаарга, ооң өг-бүлезинге дыка берге боор. Чамдыкта кадайынга база ажы-төлүнге акша-көпеек чемче безин четпейн баар. Чок апарган кижиниң дайзыннары ооң өг-бүлезин каржы аажылап турар чадавас. Бодуңдан айтыр: ол кижи өске оранда улаштыр чурттап турар болза, чүге ол өг-бүлези дээш сагыш човавайн турар? Чүге оларны каржы улустан камгалавайн турар? Чүге дизе Бижилгеде бижээни ышкаш, ол кижиниң амы-тыны үстү бээрге, ол чүнү-даа кылып шыдавас апаар (Ырлар 113:25).
Чок апарган улус аштап-суксааннарга дузалап шыдавас, оларны каржы аажылалдан камгалап шыдавас
Ынчаарга чок апарган улус кажан-даа дирлип келбес дээни ол бе? Чок. Диргизиишкин дугайында оон көөр бис. Бо чижек дириг улустуң чүнү кылып турарын өлүг улус билбес деп көргүзүп турар. Чок апарган кижилер сени көрүп, дыңнап, сээң-биле чугаалажып шыдавас. Ынчангаш олардан корткан ажыы чок. Олар сеңээ дузалап-даа, хора чедирип-даа шыдавас (Экклесиаст 9:4; Исайя 26:14).
