•  Киирилде сөстер 2

•  «Бурганның Сөзүнден эртинелер» 3—5

  •  Илеткел 3

  •  Үнелиг бодалдар 4

  •  Библияның номчулгазы 5

•  Суртаалдаар арга-мергежилди экижидери 6—14

  •  Чугааны эгелеңер 7

  •  Сонуургалды сайзырадыңар 8

  •  Өөреникчилерни белеткеңер 9

  •  Бүзүрелиңерни тайылбырлаңар 10

  •  Илеткел 11

  •  Допчулал 12

  •  Аргалар 13

  •  Видеоларны болгаш дептерлерни ажыглаары 14

•  «Христиан чуртталга» 15, 16

  •  Чыышка Библияны өөренири 16

•  Түңнел сөстер 17

•  Мактаары болгаш сүме кадары 18

•  Үени сагыыры 19

•  Кожуун хайгааракчызы келгенде 20

•  Кожуун азы регион шуулганының неделязы 21

•  Сактыышкын кежээзиниң неделязы 22

•  «Чуртталгавыс болгаш бараалгалывыс» деп ужуражылганың башкарыкчызы 23

•  «Чуртталгавыс болгаш бараалгалывыс» деп ужуражылганың чарлакчызы 24

•  Сүмелер бээр акывыс 25

•  Немелде класстар 26

•  Видеороликтер 27

1. Бо документиде айтыышкыннар «Христиан чуртталгавыс болгаш бараалгалывыс» деп ужуражылгага киржип турар шупту улуска ажыктыг боор. Олар даалгазын белеткээрде, «Христиан чуртталгавыс болгаш бараалгалывыс» деп ажылчын кыдыраашта база бо документиде айтыышкыннар-биле таныжып алыр болза эки. Шупту суртаалчылар даалгаларны күүседир кылдыр сорук киирип болур. Суртаалчы эвес улус Библияның өөредиглери-биле чөпшээрежип, чуртталгазын библейжи дүрүмнерге дүүштүр өскертип алган болза, даалгаларны күүседип болур. Суртаалчы эвес кижи даалгалар күүседип турар болза, «Чуртталгавыс болгаш бараалгалывыс» деп ужуражылганың башкарыкчызы ооң-биле негелделерни сайгаргаш, ооң дүгжүп-дүүшпейн турарын чугаалаар. Ол ону өөредип турар башкызының (азы Иегованың Херечизи ада-иезиниң бирээзиниң) чанынга чугаалаар. Сугга суктурбаан бараалгакчы болуксап турар улуска негелделер база ындыг болур (od-U эге 8, абз. 8).

2. Бир минут. Ыры болгаш мөргүл соонда ужуражылганың чарлакчызы болур программаже дыңнакчыларның сонуургалын хайныктырар. Ол эң-не ажыктыг бодалдарже улустуң кичээнгейин салыр ужурлуг.

 3. Илеткел (он минут). Илеткелдиң темазы, планы (ийи-үш кол пунктузу) ажылчын кыдыраашта бар. Ол илеткелди хуралдың удуртукчузунга азы мергежилдиг дузалакчыга дагзыр. Бир эвес расписание аайы-биле Библияның чаа номун өөренир болза, ооң дугайында таныжылга видеоролигин көргүзер. Илеткелчи акывыс видеороликтен бодалдарны илеткелдиң темазы-биле харылзаштырып болур. Ынчалза-даа ол ажылчын кыдыраашта бердинген планның кол бодалдарын албан ажыдар ужурлуг. Үе четчир болза, акывыс чуруктарны болгаш материалдың немелде бодалдарын тайылбырлаар. Оон ыңай ол пунктуларның утказын эки ажыдып турар өске-даа материалдарны ажыглап болур.

 4. Үнелиг бодалдар (он минут). Киирилде болгаш түңнел сөстер чокка айтырыг, харыы дузазы-биле сайгарылга. Бо пунктуну хуралдың удуртукчузу азы мергежилдиг дузалакчызы эрттирер. Ол дыңнакчылардан ийи айтырыгны салыр. Оон ыңай акывыс айтырыгда бердинген шүлүктерни номчуур-номчувазын боду шиитпирлээр. Харыылаар кижи 30 азы оон эвээш секунда ишти чугааланыр болза эки.

 5. Библияның номчулгазы (дөрт минут). Бо даалганы эр өөреникчиге дагзыр. Өөреникчи киирилде-даа, түңнел-даа сөстер чокка бердинген үзүндүнү номчуур. Ужуражылга чарлакчызының кол сорулгазы — чазыг чокка, илдик чокка, үн аянын өскертип, доктаашкыннарны кылып, уткага дүүштүр үнүн дыңзыдып, шын угаап-билиишкинниг, анаа чугаада ышкаш кылдыр эки номчуурунга өөреникчилерге дузалаары болур. Чамдык үзүндүлер узун азы кыска болганда, ужуражылганың башкарыкчызы даалга берип тургаш, өөреникчиниң арга-шинээн кичээнгейге алыр ужурлуг.

6. Он беш минут. Ужуражылганың бо кезээ кижи бүрүзүнге улус-биле чугаалажыр, башкылаар, суртаалдаар арга-мергежилди сайзырадыр арганы берип турар. Херек апарганда удуртукчулар база даалгаларны күүседип болур. Өөреникчи бүрүзү «Арга-мергежилиңни сайзырат» азы «Ынакшыл дузалаар» деп брошюраларда кичээл-биле ажылдаар. Ону ажылчын кыдыраашта даалганың чанында скобка иштинде бижип каан. Чамдыкта сайгарар пункт бар боор. Ону хуралдың удуртукчузу азы мергежилдиг дузалакчызы эрттирер. (Ону канчаар эрттирерин  15 дугаар абзацтан көрүңер.)

 7. Чугааны эгелеңер. Бо өөренир даалганы акывыс азы угбавыс күүседир. Даалганың күүседикчилери чаңгыс хиндиктиг улус азы төрелдер болур ужурлуг. Даалганы туруп-даа, олуруп-даа алгаш күүседип болур. (Бо даалгага суртаалдың кандыг аргазын ажыглаарын база ооң чүнүң дугайында боорун  12,  13 дугаар абзацтардан көрүңер.)

 8. Сонуургалды сайзырадыңар. Бо даалганы акывыска азы угбавыска дагзыр. Даалганың күүседикчилери чаңгыс хиндиктиг улус болур ужурлуг (km-U 5/97 ар. 7). Даалганы туруп-даа, олуруп-даа алгаш күүседип болур. Өөреникчи мооң мурнунда эгелеп алган чугаазын канчаар улаштырарын көргүзер. (Бо даалгага суртаалдың кандыг аргазын ажыглаарын база ооң чүнүң дугайында боорун  12,  13 дугаар абзацтардан көрүңер.)

 9. Өөреникчилерни белеткеңер. Бо даалганы акывыска азы угбавыска дагзыр. Даалганың күүседикчилери чаңгыс хиндиктиг улус болур ужурлуг (km-U 5/97 ар. 7). Даалганы туруп-даа, олуруп-даа алгаш күүседип болур. Бо даалгага болуп турар кичээлдиң үзүндүзүн көргүзер. Өөреникчиниң даалгазының кичээли бар болза, чүгле ынчан киирилдени азы түңнелди кылыр. Көрдүнген материалды долузу-биле номчуп болур-даа болза, дөгерезин номчаан херээ чок.

 10. Бүзүрелиңерни тайылбырлаңар. Бо даалга илеткел болза, ону акывыс күүседир. Көргүзүг болза, ону акывыска-даа, угбавыска-даа дагзыр. Даалганың күүседикчилери чаңгыс хиндиктиг улус азы төрелдер болур ужурлуг. Өөреникчи бердинген материалды ажыглап тургаш, теманың айтырыын билдингир, эптиг-чөптүг кылдыр харыылаар. Өөреникчи айыткан дептерни ажыглаар-ажыглавазын боду билир.

 11. Илеткел. Бо даалганы чыышка илеткел кылдыр акывыс күүседир. Илеткел «Ынакшыл дузалаар» деп брошюраның немелде материалы А-га үндезилеттинген болза, өөреникчи ында шүлүктерни суртаалга канчаар ажыглаарын көргүзер. Чижээ, шүлүктү кажан ажыглаарын, ооң утказын азы кижи-биле ону канчаар сайгарарын тайылбырлап болур. А бир эвес илеткел «Ынакшыл дузалаар» деп брошюраның бир кичээлинге үндезилеттинген болза, ол пунктуну суртаалга канчаар ажыглаарын тайылбырлаар. Ол кичээлдиң бирги пунктузунда чижекти сайгарып болур азы кичээлде бар немелде шүлүктерниң кайы-бирээзин ажыглап болур.

   12. Допчулал. Бо болгаш дараазында абзац «Чугааны эгелеңер» биле «Сонуургалды сайзырадыңар» деп пунктуларда даалгаларга хамааржыр. Өскээр айытпаан болза, өөреникчиниң сорулгазы — кижиге Библиядан бөдүүн алыс шын-биле үлежири база дараазында чугаалажыр дээш айтырыгны арттырып каары. Өөреникчи тус черде улуска ажыктыг база өй-шаанда болур теманы шилип алыр ужурлуг. Суртаалдаар херекселден видеону азы дептерни көргүзер-көргүспезин ол боду шиитпирлээр. Өөреникчиниң сорулгазы — сөстерни доктаадыры эвес, а чугаалаар арга-мергежилди көргүзери-дир (чижээ, улусту сонуургаары база анаа хостуг алдынары).

   13. Аргалар. Өөреникчи дагзып каан арганы тус черге таарыштыр ажыглаар ужурлуг. Чижээ:

1.  1) Бажыңнар кезип суртаалдаары. Бо дээрге бир бажыңдан өске бажыңче суртаалдаары-дыр (хууда-даа, телефон азы чагаа-даа таварыштыр болза) база суртаал үезинде чугаалашкан кижи-биле чугааны улаштырары.

2.  2) Арга тыптып кээрге, суртаалдаары. Бо дээрге анаа чугааны суртаалче шилчидиптер арга-дыр. Бо арга ажылыңарда, школада, кожаңарда, автобуска азы хүн бүрүнүң ажылын кылып тургаш, улуска Библиядан бодалды канчаар үлежирин көргүзер.

3.  3) Хөй-ниити черинге суртаал. Бо дээрге кудумчуга, паркка, машина тургузар черлерге, стенди-биле азы улус бар черлерге суртаалдаары-дыр.

 14. Видеоларны болгаш дептерлерни ажыглаары. Байдал аайы-биле өөреникчи видеону азы дептерни көргүзүп болур. Ооң даалгазында видеону көргүзер дээн болза азы боду көргүзүксеп турар болза, ол ону сайгарар ужурлуг, а видеону көргүскен ажыы чок.

15. Ыры соонда 15 минут ишти бир-ийи пункт болур. Ооң сорулгазы — чыышта улуска библейжи дүрүмнерни болгаш сүмелерни ажыглап өөрениринге дузалаары. Өске айтыышкын чок болза, ол пунктуларны хуралдың кайы-даа удуртукчузунга азы мергежилдиг дузалакчызынга дагзып болур. «Тус черниң хереглелдери» деп пунктуну чүгле хуралдың удуртукчузу эрттирер. Пунктуну сайгар деп бижээн болза, эрттирикчи акый ол пункт дургузунда немелде айтырыгларны салып болур. Ол хөй үени пунктунуң кол кезээнче база дыңнакчылар киржир кылдыр үндүрер дээш, эге сөстерни кыска чугаалаар ужурлуг. Интервью алыр деп барза, ол кижини олудундан айтырбайн, сценаже чалап алыр болза эки.

  16. Чыышка Библияны өөренири (үжен минут). Ол пунктуну хуралдың мергежилдиг удуртукчузунга дагзыр. (Удуртукчулар эвээш чыыштарга мергежилдиг дузалакчыга дагзып болур.) Ол пунктуну кайы удуртукчуга дагзып болурун удуртукчулар чөвүлели шиитпирлээр. Чыыштың бо кезиин эрттирер акывыс кичээнгейни кол библейжи шүлүктерже, өөренип турар материалдың амыдыралга ажыктыынче углап, ооң үе-шагын сагыыр ужурлуг. Айтырыг-харыы пунктузун канчаар эрттирерин көргүскен удуртулгадан ажыктыг сүмелерни тып ап болур (w23.04 ар. 24, көзенек). Материалды эки сайгарыптарга, үе арта берзе-даа, акывыс чыышты доозуптар ужурлуг. Бо пунктуну эрттирерин, материалды номчуурун болдунар болза, неделя санында аңгы-аңгы акыларга дагзыр болза эки. Чарлакчы пунктуну кызырыптарын дилээр болза, ону эрттирип турар акывыс канчаар кызырыптарын боду шиитпирлээр. Чижээ, чамдык абзацтарны номчувайн сайгарыптар.

17. Үш минут. Чарлакчы ужуражылганың эң ажыктыг бодалдарын катаптааш, келир неделяның ужуражылгазын допчулай чугаалаар. Үе артар болза, дараазында неделяда даалгаларны кымнар күүседирин ол чарлап болур. Чарлакчы чугула чарлалдарны болгаш чагааларны номчуп болур. Суртаалдаар ужуражылгалар расписаниезин, ашталга графигин (база ындыг уткалыг чүүлдерни) сценадан номчувас, а чарлалдар самбыразынга азар. Бир эвес чагаалар, чарлалдар хөй болза, чарлакчы «Христиан чуртталга» деп кезекти эрттирер акыларны пунктуларын кызырыптарын дилеп болур ( 16,  19 дугаар абзацтарны көрүңер). Ужуражылга ыры болгаш мөргүл-биле доостур.

18. Даалга соонда өөреникчини мактап, күүсеткен кичээлинге хамаарыштыр сүме бээринге чарлакчыда бир хире минут бар. Даалганы чарлаарда кичээлди чугаалавас. Ынчалза-даа даалга соонда, акывыс өөреникчини мактааш, кайы кичээлди база ооң кандыг сүмелерин ажыглаанын чугаалаар, азы моон соңгаар кандыг чылдагаан-биле база чүүже кичээнгейни салырын чымчаа-биле тайылбырлап бээр. Чарлакчы өөреникчиге азы дыңнакчыларга ажыктыг деп санаар болза, даалганың өске онзагай талаларын мактап болур. Чарлакчы өөреникчиге хурал соонда азы өске үеде (бо-даа азы өске-даа кичээлге хамаарыштыр) «Арга-мергежилиңни сайзырат», «Ынакшыл дузалаар» деп брошюраларга азы «Школа служения» деп номга үндезилеп хууда немей сүмени кадып болур. (Ужуражылганың башкарыкчызында болгаш сүмелер бээр акывыста кандыг хүлээлгелер барын  19,  24,  25 дугаар абзацтарда бижип каан.)

19. Пунктуларның үезин узадып болбас. Ужуражылганың чарлакчызы база көрдүнген үени сагыыр ужурлуг. Ажылчын кыдыраашта үелерни берип каан. Материалды эки сайгарган болза, ол үени долузу-биле чарыыр дээш, немелде информациялар немээн херээ чок. Даалганың үези ажа бергенде, Чуртталгавыс болгаш бараалгалывыс» деп ужуражылганың чарлакчызы азы сүмелер бээр акывыс өөреникчи-биле хууда чугаалажыр ( 24,  25 дугаар абзацтарны көрүңер). Ужуражылга ниитизи-биле, ырылар болгаш мөргүл, 1 шак 45 минуттан көвүдевес ужурлуг.

20. Чыышка кожуун хайгааракчызы келген үеде программа ажылчын кыдыраашта расписание ёзугаар, чүгле кезек өскерлиишкиннерлиг кылдыр эртер. «Христиан чуртталга» деп кезекте чыышка Библияны өөренириниң орнунга кожуун хайгааракчызының 30 минут уламчылаар илеткели болур. Ол илеткелдиң мурнунда чарлакчы доозулган ужуражылганы болгаш келир неделяның программазын допчулааш, чугула чагааларны номчааш, херек чарлалдарны кылгаш, кожуун хайгааракчызын таныштырар. Кожуун хайгааракчызы илеткелин доозупкаш, ужуражылганы ыры-биле төндүрер, ырыны ол боду шилип болур. Чыыш соонда ол боду мөргүүр азы өске акывысты дилеп болур. Ол үеде (чыыштың дылынга) немелде класстарга даалгалар болбас. Кожуун хайгааракчызы өске дылдыг бөлүк немеп каан чыышта келген болза, ол бөлүк аңгы ужуражылганы бодунуң дылынга эрттирип болур. А ооң илеткелин ол бөлүкте акы-угбаларывыс чыыш-биле кады дыңнаар ужурлуг.

21. Шуулган неделязында чыыштар болбас. Ол неделяда ужуражылгаларның материалын кижи бүрүзү азы өг-бүлелер боттары сайгарып алыр деп чыышка сагындырар.

22. Сактыышкын кежээзи ажыл хүнүнде таваржыр болза, «Чуртталгавыс болгаш бараалгалывыс» деп ужуражылга болбас.

23. «Чуртталгавыс болгаш бараалгалывыс» деп ужуражылганың башкарыкчызын удуртукчулар чөвүлели шилиир. Ужуражылга айтыышкыннар ёзугаар эки организастыг эртерин ол харыылаар. Ол сүмелер бээр акый-биле сырый ажылдажыр ужурлуг. Ужуражылганың башкарыкчызы чаа ажылчын кыдырааш үнүп кээрге-ле, бүдүн программаны ийи айга планнаар ужурлуг. Ынаар удуртукчулар чөвүлели программаның пунктуларын эрттиреринге чөпшээреп каан акыларны, чарлакчыларны томуйлаары, өөредилге даалгаларын хуваары кирип турар ( 3—16 база  24 дугаар абзацтарны көрүңер). Кымга даалга бээрин шиитпирлеп тургаш, ооң харын, дуржулгазын, сайгарар материалын, чугаалаар эргези бар бе деп херекке алыр болза эки. Бо бүгүнү өске-даа даалгалар берип тургаш, херекке алыры чугула. Даалгаларны өөреникчилерге аргалыг болза, үш неделя бурунгаар бээр болза эки. Даалганы «„Христиан чуртталгавыс болгаш бараалгалывыс“ деп ужуражылгага даалга» (S-89) деп бланк-биле бээр. «Чуртталгавыс болгаш бараалгалывыс» деп ужуражылганың башкарыкчызы программада даалгаларны чарлалдар самбыразында бар деп шынзыгар ужурлуг. Удуртукчулар чөвүлели ужуражылганың башкарыкчызынга дузалаар кылдыр хуралдың өске удуртукчузун азы дузалакчызын томуйлап болур. Ынчалзажок өөредилге даалгаларындан аңгыда, өске пунктуларны чүгле хуралдың удуртукчузунга дагзыр.

24. Неделя санында удуртукчуларның бирээзи «Чуртталгавыс болгаш бараалгалывыс» деп ужуражылганың чарлакчызы болур. (Удуртукчу акылар эвээш чыыштарга мергежилдиг дузалакчы чарлакчы бооп болур). Ол киирилде болгаш түңнел сөстерни чугаалаар. Программаның шупту пунктуларын база ол акывыс чарлаар. Удуртукчуларның санын көрүп тургаш, видео сайгарылга чок эртер болза, чамдык пунктуларны ол эрттирип болур. Пунктуларның аразын чарлаарын кыскаладыры чугула. Удуртукчулар чөвүлели ужуражылганың чарлакчызы болур удуртукчуларны шилип каар. Шилиттинген удуртукчулар ээлчег ёзугаар чарлакчылар болур. Ужуражылганың башкарыкчызын өске шилиттинген удуртукчулардан хөй катап чарлакчы кылдыр томуйлап болур. Ол чүүл байдалдан хамааржыр. Бир эвес удуртукчуну чыышка Библияны өөренирин эрттирер кылдыр шилип каан болза, ол ужуражылганың чарлакчызы база бооп болур. Чарлакчы акывыс өөреникчилерни сеткилинден мактаарын база херек үелерде оларга ажыктыг сүмелер бээрин утпас болза эки. Оон ыңай ужуражылганың үе-шагында төнери дээш чарлакчы харыысалгалыг ( 17,  19 дугаар абзацтарны көрүңер). Дараазында пункт эрттирер акывыс пюпитрни ээлеп ап турда, программаның пунктуларын чарлаптар кылдыр, чарлакчы күзээр болза, сценага хостуг черге немей микрофонну тургузуп болур. Оон ыңай Библияның номчулгазы биле «Суртаалдаар арга-мергежилди экижидери» деп кезекте даалгалар үезинде чарлакчы күзээр болза, сценада стол артынга олуруп болур. Ынчаар кылыр болза, үе камнаттынар.

25. Болдунар-ла болза, бо хүлээлгени дуржулгалыг илеткелчиге хүлээдир. Ооң хүлээлгези — «Чуртталгавыс болгаш бараалгалывыс» деп ужуражылганың даалгаларын күүседир, хөй-ниити мурнунга илеткел чугаалаар хуралдың удуртукчуларынга, дузалакчыларынга, оон аңгыда «Таңныыл суургазын» болгаш чыышка Библияны өөренирин эрттирип турар азы номчукчу акыларга (херек апарганда) сүмелерни бээри ( 19 дугаар абзацты көрүңер). Акыларга даалга санында-ла сүме бээри албан эвес. Бир эвес чыышта өөредир, илеткел чугаалаар салым-чаяанныг удуртукчулар бар болза, сүме бээр хүлээлгени чыл санында өске акывыска дагзып болур.

26. Чыышта өөреникчилер хөй болза, немелде класстарны организастап болур. Класс бүрүзүнге сүме бээр акывысты томуйлап каар (аргалыг болза удуртукчуну). Херек болза, ол хүлээлгени мергежилдиг дузалакчы күүседип болур. Удуртукчулар чөвүлели ол хүлээлгени чаңгыс акывыска быжыглаар бе азы акылар солчур бе дээрзин шиитпирлээр ужурлуг. Сүмелер кадар акый  18 дугаар абзацта бижээн айтыышкыннарны эдерер ужурлуг. Немелде класска даалга күүседир улус «Үнелиг бодалдар» деп пунктунуң соонда ынаар кире бээр. Олар сөөлгү даалганы күүседиптерге, кол залче чедип кээр ужурлуг.

27. «Чуртталгавыс болгаш бараалгалывыс» деп ужуражылгага видеороликтерни ажылчын кыдыраашта расписание ёзугаар көргүзер. Ол видеороликтер JW Library® приложениеде бар. Оларны кандыг-даа электроннуг херекселдерге ажыдып болур.

© 2023 Watch Tower Bible and Tract Society of Pennsylvania

S-38-VI 11/23