Бис, Иегованың Херечилери, боттарывыстың болгаш чоок улузувустуң өг-бүлелерин быжыглаар дээш кызып турар бис. Өг-бүлениң үндезилекчизи дээрге, Бурган деп санаар бис (Эге дөс 2:21—24; Эфесчилерге 3:14, 15). Ол Библия таварыштыр бүдүн делегейде кижилерге аас-кежиктиг болгаш быжыг өг-бүлелерни үндезилеп база кадагалап алырынга дузалаар дүрүмнерни берген.

 Бис Библиядан сүмелерни эдерерин кызып турар бис, чүге дизе ол биске — өөнүң ээлеринге болгаш иштилеринге база ада-иелерге — хүлээлгелеривисти эки күүседиринге дузалап турар (Чугаалар 31:10—31; Эфесчилерге 5:22—6:4; 1 Тимофейге 5:8). Өг-бүлезиниң кежигүннери аңгы-аңгы шажыннарга чүдүп турар улусту безин Библиядан мерген угаан аас-кежиктиг кылып турар (1 Пётр 3:1, 2). Ашаа азы кадайы Иегованың Херечизи апарган улустуң чамдыызы мынча деп турар:

•   «Кады чурттап эгелээнивистен баштайгы алды чылда үргүлчү-ле маргыжып, ажынчып-ла турар турган бис. Ынчалза-даа Ивети Иегованың Херечизи апаргаш, ынакшылды болгаш шыдамык чорукту оон-даа артык илередип эгелээн. Ооң ынчаар өскерли бергени өг-бүлевисти камгалаан» (Клауир, Бразилия).

•   «Кажан мээң ашаам Чанса Иегованың Херечилери-биле Библияны өөренип эгелээрге, мен удур турган мен. Чүге дизе олар өг-бүлелерни чарып турар деп бодаар турган мен. Ынчалза-даа Библия өг-бүлевисти быжыктырарынга дузалаан деп оон билип каан мен» (Агнесс, Замбия).

 Улуска суртаалдап тургаш, Библиядан мерген угаанныг сүмелер оларга канчаар дузалап болурун көргүзүп турар бис:

•   Кады чурттаар эжин шилип алыры

•   Өгленген соонда, бирги чылды кады чурттап эртип алыры

•   Ашааның азы кадайының ада-иези-биле эптиг найыралдыг болуру

•   Акша-көпеекти шын чарары

•   Маргыжарын соксадыры

•   Өршээп өөренип алыры

•   Ажы-төлдү кижизидери

 Ийе, ындыг чүүлдер чамдыкта болгулаар. Чижээ, 1998 чылда Sofres деп социологтуг шинчилелдер кылып турар компания отчёт үндүрген. Ол отчёттан алырга, ашаа азы кадайы Иегованың Херечизи апарган 20 дугаар өг-бүледе-ле, чаа чүдүлге хүлээп алган бир кежигүнү шыңгыы бергелерге таваржып турар.

 Иисус ооң эдерикчилериниң өг-бүлелеринге аңгылажыышкын туруп болур деп баш удур чугаалап каан (Матфей 10:32—36). Төөгү эртемдени Вил Дюрант Рим империяга «христиан шажын-чүдүлгени өг-бүлелерниң чарлып турарынга буруулуг деп санап турган» деп демдеглээн a. Амгы үеде база Иегованың Херечилерин ол-ла чүүлге буруудадып турар. Оларны ындыг чүүлге буруудадыры чөптүг бе?

 Кижилерниң эргелерин камгалап турар Европейжи суд, Иегованың Херечилерин өг-бүлелер чарып турар деп буруудаткан херекке хамаарыштыр шиитпир хүлээп тура, мындыг чүүл демдеглээн: «Өг-бүледе Иегованың Херечизи эвес кежигүннери Херечилер бооп турар кежигүннерниң шажын-чүдүлгезин хүлээп көрбейн, чүдүүр эргезин хүндүлевейн база чүдүлгезиниң ажыл-херээн чорударын чөпшээревейн турарындан хөй чөрүлдээлер тургустунуп турар». Суд мынча деп немээн: «Ындыг байдал чүгле Иегованың Херечилериниң өг-бүлелеринде эвес, а шажын-чүдүлгеге хамаарыштыр көрүштери аңгы өске-даа өг-бүлелерде черле бар» b. Ындыг удурланыышкыннарга Иегованың Херечилери таваржып турза-даа, олар Библияда бижээн: «Кымдан-даа чедирген хоразы дээш хора-биле орнун негевеңер... Силерниң талаңардан, болдунар-ла болза, бүгү улус-биле эп-найыралдыг амыдыраңар» дээн сүмеге дүүштүр алдынарын кызып чоруур (Римчилерге 12:17, 18).

 Иегованың Херечилери Библиядан сүмени эдерип, чүгле чаңгыс бүзүрээн ха-дуңма аразындан улуска өгленир ужурлуг (1 Коринфичилерге 7:39). Ол библейжи айтыышкын мерген угаанныг. Чижээ, 2010 чылда өг-бүле болгаш өглениринге хамаарыштыр айтырыгларга тураскааткан бир журналга мынча дээн: «Бир эвес өг-бүле улус чаңгыс шажын-чүдүлгелиг, ёзу-чаңчылдарлыг боор болза», олар бот-боттарын эки бодап билчир боор c.

 Ынчалза-даа Иегованың Херечилериниң организациязы өг-бүледе ашаа азы кадайы Херечи эвес болза, ооң-биле чарлып алырын деткивейн турар. Библияда мынча дээн: «Арткан улуска хамаарыштыр Дээрги-Чаяакчының эвес, а мээң бодалымны чугаалап көрейн: Бурганга бүзүрээн ха-дуңманың бирээзиниң кадайы бүзүревээн херээжен бооп, ашаа-биле чурттаарындан ойталавас болза, ол эр кижи кадайындан чарылбас ужурлуг. А ол ышкаш бүзүрээн херээженниң бүзүревээн ашаа ооң-биле чурттаарындан ойталавас болза, ол херээжен ашаандан чарылбас ужурлуг» (1 Коринфичилерге 7:12, 13). Иегованың Херечилери ол айтыышкынга дыңнангыр.