Mwanzo 46:1-34
46 Basi Israeli akachukua kila kitu alichokuwa nacho* na kuondoka. Alipofika Beer-sheba,+ alimtolea dhabihu Mungu wa Isaka, baba yake.+
2 Kisha Mungu akaongea na Israeli katika maono usiku na kumwambia: “Yakobo, Yakobo!” naye akajibu: “Mimi hapa!”
3 Akamwambia: “Mimi ndiye Mungu wa kweli, Mungu wa baba yako.+ Usiogope kushuka kwenda Misri, kwa maana huko nitakufanya uwe taifa kubwa.+
4 Mimi mwenyewe nitashuka pamoja nawe Misri, na pia mimi mwenyewe nitakurudisha kutoka huko,+ na Yosefu atayafumba macho yako kwa mkono wake.”*+
5 Kisha Yakobo akaondoka Beer-sheba, na wanawe* wakamsafirisha Yakobo baba yao na watoto wao na wake zao katika magari ya kukokotwa ambayo Farao alikuwa amewapa ili yamsafirishe.
6 Wakachukua mifugo yao na mali zao, walizokuwa wamekusanya katika nchi ya Kanaani. Basi wakafika Misri, Yakobo na wazao wake wote.
7 Alienda Misri pamoja na wanawe na mabinti zake na wajukuu wake wa kiume na wa kike—wazao wake wote.
8 Sasa haya ndiyo majina ya wana wa Israeli waliokuja Misri,+ Yakobo na wanawe: mzaliwa wa kwanza wa Yakobo alikuwa Rubeni.+
9 Wana wa Rubeni walikuwa Hanoki, Palu, Hezroni, na Karmi.+
10 Wana wa Simeoni+ walikuwa Yemueli, Yamini, Ohadi, Yakini, Zohari, na Shauli+ mwana wa mwanamke Mkanaani.
11 Wana wa Lawi+ walikuwa Gershoni, Kohathi, na Merari.+
12 Wana wa Yuda+ walikuwa Eri, Onani, Shela,+ Perezi,+ na Zera.+ Lakini Eri na Onani walikufa katika nchi ya Kanaani.+
Wana wa Perezi walikuwa Hezroni na Hamuli.+
13 Wana wa Isakari walikuwa Tola, Puva, Iobu, na Shimroni.+
14 Wana wa Zabuloni+ walikuwa Seredi, Eloni, na Yahleeli.+
15 Hao ndio wana wa Lea, aliomzalia Yakobo huko Padan-aramu, kutia ndani Dina binti yake.+ Wanawe na mabinti zake wote walikuwa 33.
16 Wana wa Gadi+ walikuwa Zifioni, Hagi, Shuni, Esboni, Eri, Arodi, na Areli.+
17 Wana wa Asheri+ walikuwa Imna, Ishva, Ishvi, na Beria, na dada yao aliitwa Sera.
Wana wa Beria walikuwa Heberi na Malkieli.+
18 Hao ndio wana wa Zilpa,+ kijakazi ambaye Labani alimpa Lea binti yake. Alimzalia Yakobo wana hao: wote walikuwa 16.
19 Wana wa Raheli, mke wa Yakobo, walikuwa Yosefu+ na Benjamini.+
20 Katika nchi ya Misri, Asenathi+ binti ya Potifera kuhani wa Oni,* alimzalia Yosefu wana hawa: Manase+ na Efraimu.+
21 Wana wa Benjamini+ walikuwa Bela, Bekeri, Ashbeli, Gera,+ Naamani, Ehi, Roshi, Mupimu, Hupimu,+ na Ardi.+
22 Hao ndio wana ambao Raheli alimzalia Yakobo: wote walikuwa 14.
23 Mwana* wa Dani+ alikuwa Hushimu.+
24 Wana wa Naftali+ walikuwa Yahzeeli, Guni, Yezeri, na Shilemu.+
25 Hao ndio wana wa Bilha, kijakazi ambaye Labani alimpa Raheli binti yake. Alimzalia Yakobo wana hao: wote walikuwa saba.
26 Wazao wote wa Yakobo walioenda Misri pamoja naye walikuwa 66, bila kuhesabu wake wa wanawe.+
27 Wana wa Yosefu aliowazaa akiwa Misri walikuwa wawili. Watu wote wa nyumba ya Yakobo waliokuja Misri walikuwa 70.+
28 Yakobo alimtuma Yuda+ atangulie na kumwambia Yosefu kwamba alikuwa njiani kwenda Gosheni. Walipofika katika nchi ya Gosheni,+
29 Yosefu akaagiza gari lake litayarishwe, kisha akaenda kumpokea Israeli baba yake huko Gosheni. Alipokutana na baba yake, mara moja akamkumbatia* na kulia kwa muda.*
30 Kisha Israeli akamwambia Yosefu: “Sasa niko tayari kufa; nimeona uso wako na kujua kwamba ungali hai.”
31 Ndipo Yosefu akawaambia ndugu zake na watu wa nyumba ya baba yake: “Acheni nipande niende kumjulisha Farao,+ ‘Ndugu zangu na watu wa nyumba ya baba yangu waliokuwa katika nchi ya Kanaani wamekuja kwangu.+
32 Watu hao ni wachungaji+ na wafugaji,+ nao wamekuja na kondoo wao na ng’ombe wao na kila kitu walicho nacho.’+
33 Farao akiwaita na kuwauliza, ‘Mnafanya kazi gani?’
34 Mnapaswa kumwambia, ‘Sisi watumishi wako tumekuwa wafugaji tangu tulipokuwa vijana mpaka sasa, sisi pamoja na mababu zetu,’+ ili mwishi katika nchi ya Gosheni,+ kwa sababu Wamisri wanamchukia kila mtu anayefuga kondoo.”+
