Wimbo wa Sulemani 1:1-17

Onyesha Kama Maandishi Ficha Aina ya Maandishi

  • Wimbo wa nyimbo (1)

  • Msichana (2-7)

  • Mabinti wa Yerusalemu (8)

  • Mfalme (9-11)

    • “Tutakutengenezea mapambo ya dhahabu” (11)

  • Msichana (12-14)

    • ‘Mpenzi wangu ni kama mfuko wa manukato ya manemane’ (13)

  • Mchungaji (15)

    • “Wewe ni mrembo, mpenzi wangu”

  • Msichana (16, 17)

    • “Wewe ni mrembo, mpenzi wangu” (16)

1  Wimbo wa nyimbo,* ambao ni wa Sulemani:+  2  “Unibusu* kwa mabusu ya kinywa chako,Kwa maana maonyesho yako ya mapenzi ni bora kuliko divai.+  3  Manukato ya mafuta yako mbalimbali yanapendeza.+ Jina lako ni kama mafuta yaliyomiminwa yenye manukato.+ Ndiyo sababu wasichana wanakupenda.  4  Nichukue;* acha tukimbie. Mfalme amenileta katika vyumba vyake vya ndani! Na tufurahi na kukushangilia. Na tusifu* maonyesho yako ya mapenzi kuliko divai. Wana* haki ya kukupenda.  5  Mimi ni mweusi, lakini napendeza, enyi mabinti wa Yerusalemu,Kama mahema ya Kedari,+ kama vitambaa vya mahema+ ya Sulemani.  6  Msinikodolee macho kwa sababu mimi ni mweusi,Kwa sababu jua limenichoma. Wana wa mama yangu walinikasirikia;Walinifanya kuwa mlinzi wa mashamba ya mizabibu,Lakini sikulinda shamba langu mwenyewe la mizabibu.  7  Niambie, wewe ninayekupenda* sana,Mahali unapochunga mifugo yako,+Mahali unapoipumzisha wakati wa adhuhuri. Kwa nini niwe kama mwanamke aliyefunikwa shela*Kati ya makundi ya wenzako?”  8  “Ikiwa hujui, ewe mwanamke mrembo kuliko wote,Nenda ufuate nyayo za mifugoNa uchunge wanambuzi wako karibu na mahema ya wachungaji.”  9  “Ewe mpenzi wangu, nakufananisha na farasi jike* kati ya magari ya Farao.+ 10  Mashavu yako yanavutia kwa mapambo,*Shingo yako kwa mikufu ya shanga. 11  Tutakutengenezea mapambo* ya dhahabuYaliyotiwa vifungo vya fedha.” 12  “Mfalme anapokuwa ameketi kwenye meza yake ya mviringo,Marashi* yangu+ hunukia. 13  Mpenzi wangu ni kama mfuko wa manemane unaonukia manukato+Unaokaa usiku kucha katikati ya matiti yangu. 14  Mpenzi wangu kwangu mimi ni kama kishada cha maua ya hina+Kati ya mashamba ya mizabibu ya En-gedi.”+ 15  “Tazama! Wewe ni mrembo, mpenzi wangu. Tazama! Wewe ni mrembo. Macho yako ni macho ya njiwa.”+ 16  “Tazama! Wewe ni mrembo,* mpenzi wangu, na unapendeza.+ Kitanda chetu kiko kati ya majani mabichi. 17  Maboriti ya nyumba yetu* ni mierezi,Mapau yetu ni miberoshi.

Maelezo ya Chini

^ Au “Wimbo ulio bora.”
^ Anayeongea ni msichana.
^ Tnn., “Nivute nikufuate.”
^ Au “tusimulie.”
^ Yaani, wale wasichana.
^ Tnn., “shela ya maombolezo.”
^ Au “ambaye nafsi yangu inakupenda.”
^ Au “farasi jike wangu.”
^ Au labda, “kati ya nywele zilizosukwa.”
^ Au “mapambo ya duara ya kichwani.”
^ Tnn., “Nardo.”
^ Au “una sura nzuri.”
^ Au “nyumba yetu kubwa.”
BIBLIA TAKATIFU—TAFSIRI YA ULIMWENGU MPYA (TOLEO LA 2017)
Wimbo wa Sulemani 1
Lugha ya Alama ya Tanzania
Isome Biblia Kwenye Mtandao
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt 40