1. Baadhi ya ndugu na dada wanahisije kuhusu kuzungumza na watu katika huduma? (Tazama pia picha.)

 TUKIWA watu wa Yehova, tunawahubiria wengine kwa sababu tunampenda Baba yetu wa mbinguni na tunataka kuwasaidia jirani zetu wamjue. Wahubiri wengi wanafurahia sana kazi ya kuhubiri. Lakini si rahisi kwa wengine kufurahia kuhubiri. Kwa nini? Huenda baadhi ya ndugu na dada wana haya sana na hawajiamini. Wengine hawajihisi huru kwenda kwenye nyumba za watu bila kualikwa. Huenda wengine wanaogopa hawatakaribishwa vizuri. Na wengine wamefundishwa kuepuka kabisa kuwakasirisha watu wengine. Licha ya kumpenda sana Yehova, inakuwa vigumu kwa ndugu na dada hao kuwahubiria habari njema watu wasiowafahamu. Hata hivyo, wanatambua jinsi kazi hii ilivyo muhimu na wanahubiri kwa ukawaida. Yehova anafurahi sana wanapofanya hivyo!

2. Kwa nini hupaswi kuvunjika moyo ikiwa ni vigumu kwako kupata shangwe katika huduma?

² Je, wakati mwingine ni vigumu kwako kupata shangwe katika huduma kwa sababu ya hisia kama hizo? Ikiwa ndivyo, usivunjike moyo. Huenda hisia zako za kutojiamini zinaonyesha kwamba wewe ni mnyenyekevu na hutaki kujielekezea fikira. Pia, zinaonyesha kwamba hutaki kubishana na watu. Na hakuna mtu anayetaka kuwakasirisha wengine, hasa anapojitahidi kuwafanyia mema. Baba yako wa mbinguni anajua vizuri changamoto unazokabili na anataka kukupa msaada unaohitaji. (Isa. 41:13) Katika makala hii, tutazungumzia mapendekezo matano ya jinsi ya kukabiliana na hisia hizo na jinsi ya kupata shangwe katika huduma.

LIRUHUSU NENO LA MUNGU LIKUIMARISHE

3. Ni nini kilichomsaidia nabii Yeremia awahubirie wengine?

³ Tangu nyakati za kale, ujumbe kutoka kwa Mungu umewaimarisha watumishi wake walipohitaji kutimiza mgawo mgumu. Kwa mfano, mfikirie nabii Yeremia. Alisita Yehova alipompa mgawo wa kuhubiri. Yeremia alisema hivi: “Mimi sijui kuzungumza, kwa maana mimi ni mvulana tu.” (Yer. 1:6) Alishindaje hisia zake za kutojiamini? Aliimarishwa na ujumbe kutoka kwa Mungu. Yeremia alisema hivi: “Neno hilo lilikuwa kama moto unaowaka uliofungiwa mifupani mwangu, nami nikachoka kulizuia ndani yangu.” (Yer. 20:​8, 9) Ingawa Yeremia alihubiri katika eneo gumu, ujumbe aliotangaza ulimpa nguvu alizohitaji ili aendelee na kazi hiyo.

4. Ni nini kinachotokea tunaposoma Neno la Mungu na kulitafakari? (Wakolosai 1:​9, 10)

⁴ Wakristo huimarishwa na ujumbe kutoka katika Neno la Mungu. Alipoliandikia kutaniko la Kolosai, mtume Paulo alisema kwamba kupata ujuzi sahihi kungewachochea ndugu zake ‘kutembea kwa kumstahili Yehova’ walipoendelea “kuzaa matunda katika kila kazi njema.” (Soma Wakolosai 1:​9, 10.) Kazi hizo njema zinatia ndani kuhubiri habari njema. Hivyo, tunaposoma Neno la Mungu na kulitafakari, imani yetu katika Yehova inaimarika na tunaelewa vizuri zaidi umuhimu wa kuhubiri kuhusu ujumbe wa Ufalme.

5. Tunaweza kufanya nini ili tunufaike kikamili tunaposoma na kujifunza Biblia?

⁵ Ili tunufaike kikamili na Neno la Mungu, hatupaswi kusoma, kujifunza, na kutafakari kijuujuu tu. Tumia muda wa kutosha. Ukisoma andiko ambalo hulielewi, usilipite tu. Badala yake, tumia Fahirisi au Mwongozo wa Utafiti wa Mashahidi wa Yehova ili kupata ufafanuzi wa mstari huo. Ikiwa utatumia muda wa kutosha, utaimarisha uhakika wako kwamba Neno la Mungu ni la kweli. (1 The. 5:21) Kadiri unavyokuwa na uhakika zaidi, ndivyo utakavyofurahia zaidi kushiriki na wengine mambo uliyojifunza.

JITAYARISHE VIZURI KWA AJILI YA HUDUMA

6. Kwa nini tunapaswa kujitayarisha vizuri kwa ajili ya huduma?

⁶ Ukijitayarisha vizuri kwa ajili ya huduma, inaelekea kwamba utajihisi huru zaidi unapozungumza na wengine. Yesu aliwasaidia wanafunzi wake wajitayarishe kabla ya kuwatuma kwenda kuhubiri. (Luka 10:​1-11) Kwa kuwa wanafunzi hao walitumia mambo ambayo Yesu aliwafundisha, waliweza kutimiza mambo mengi na hilo lilifanya wawe na shangwe sana.—Luka 10:17.

7. Tunawezaje kujitayarisha kwa ajili ya huduma? (Tazama pia picha.)

⁷ Tunawezaje kujitayarisha kwa ajili ya huduma? Tunahitaji kufikiria jinsi tunavyoweza kuelezea kweli kwa njia yenye matokeo kwa maneno yetu wenyewe. Pia, ingefaa ikiwa utafikiria mapema njia mbili au tatu ambazo watu huitikia katika eneo tunalohubiri na kufikiria jinsi utakavyowajibu. Kisha tunapozungumza na watu, tutajitahidi kutulia, kutabasamu, na kuwa wenye urafiki.

8. Ni katika njia gani Wakristo ni kama vyombo vya udongo vinavyotajwa katika mfano wa Paulo?

⁸ Mtume Paulo alifafanua jukumu letu katika kazi ya kuhubiri aliposema hivi: “Tuna hazina hii katika vyombo vya udongo.” (2 Kor. 4:7) Hazina hiyo ni nini? Ni kazi inayookoa uhai ya kuhubiri ujumbe wa Ufalme. (2 Kor. 4:1) Vyombo vya udongo ni nini? Vyombo hivyo vinafananisha watumishi wa Mungu, wanaowahubiria wengine habari njema. Katika siku za Paulo, wafanyabiashara walitumia mitungi ya udongo kusafirisha vitu vyenye thamani, kama vile vyakula, divai, na pesa. Vivyo hivyo, Yehova ametukabidhi ujumbe wenye thamani wa habari njema. Kwa msaada wa Yehova, tunaweza kuwa na nguvu tunazohitaji ili kuendelea kuhubiri kwa uaminifu.

SALI ILI UPATE UJASIRI

9. Tunawezaje kushinda changamoto ya kuogopa wanadamu au kuogopa kupingwa? (Tazama pia picha.)

⁹ Wakati mwingine, huenda tukaogopa wanadamu au kuogopa kupingwa. Tunawezaje kushinda changamoto hiyo? Fikiria sala ambayo mitume walitoa walipoamriwa waache kuhubiri. Badala ya kuogopa, walimwomba Yehova awasaidie waendelee ‘kutangaza neno lake kwa ujasiri wote.’ Yehova alijibu sala yao mara moja. (Mdo. 4:​18, 29, 31) Ikiwa wakati mwingine tunawaogopa wanadamu, sisi pia tunapaswa kusali kwa Yehova atusaidie. Mwombe Yehova akusaidie kuimarisha upendo wako kuelekea watu ili usiogope wanadamu.

10. Yehova anatusaidiaje ili tutimize jukumu letu tukiwa Mashahidi wake? (Isaya 43:​10-12)

¹⁰ Yehova ametuchagua tuwe Mashahidi wake, na anaahidi kutusaidia tuwe na ujasiri. (Soma Isaya 43:​10-12.) Fikiria njia nne ambazo Yehova anatusaidia kuwa na ujasiri. Kwanza, Yesu yuko pamoja nasi wakati wowote tunapohubiri habari njema. (Mt. 28:​18-20) Pili, Yehova amewapa malaika mgawo wa kutusaidia. (Ufu. 14:6) Tatu, Yehova ametupatia roho yake takatifu ambayo ni kama msaidizi anayetukumbusha mambo ambayo tumejifunza. (Yoh. 14:​25, 26) Nne, Yehova ametupatia ndugu na dada ambao tunaweza kushirikiana nao. Kwa msaada wa Yehova na utegemezo wa ndugu na dada zetu wapendwa, tunaweza kuwa na ujasiri na kuendelea kuhubiri.

UWE TAYARI KUNYUMBULIKA NA UWE NA MTAZAMO MZURI

11. Unawezaje kuwapata watu wengi zaidi unapokuwa katika huduma? (Tazama pia picha.)

¹¹ Je, unavunjika moyo unapowakosa watu nyumbani? Ikiwa ndivyo, jiulize hivi: ‘Watu wanaoishi katika eneo hili wako wapi sasa?’ (Mdo. 16:13) ‘Je, wako kazini au wameenda kufanya ununuzi?’ Ikiwa ndivyo, je, unaweza kuwapata watu wengi zaidi ukihubiri barabarani? Ndugu anayeitwa Joshua, anasema hivi: “Nimepata nafasi nyingi za kuhubiri nilipoenda kwenye maeneo yenye maduka mengi na kwenye maegesho ya magari.” Pia, Joshua na Bridget, mke wake, wamewapata watu wengi zaidi nyumbani walipohubiri jioni na pia Jumapili alasiri.—Efe. 5:​15, 16.

12. Tunawezaje kutambua mambo ambayo watu wanaamini au yanayowahangaisha?

¹² Ikiwa mwanzoni mtu hapendezwi na ujumbe wetu, jitahidi kutambua mambo anayoamini au mambo yanayomhangaisha. Joshua na Bridget wanatumia swali lililopo kwenye ukurasa wa kwanza wa trakti wanapoanzisha mazungumzo. Kwa mfano, wanapotumia trakti Una Maoni Gani Kuhusu Biblia? wanasema hivi: “Baadhi ya watu wanaiona Biblia kuwa kitabu kutoka kwa Mungu, na wengine hawaioni hivyo. Wewe una maoni gani?” Mara nyingi utangulizi huo unaongoza kwenye mazungumzo.

13. Kwa nini tunaweza kuuona utumishi wetu kuwa wenye mafanikio hata ikiwa watu hawasikilizi ujumbe wetu? (Methali 27:11)

¹³ Mafanikio yetu katika huduma hayategemei matokeo tunayopata. Kwa nini? Kwa sababu tumefanya kile ambacho Yehova na Mwana wake wanataka tufanye—tumetoa ushahidi. (Mdo. 10:42) Hata tunapokosa watu wa kuzungumza nao au ujumbe wetu unapokataliwa, tunaweza kuwa na shangwe kwa sababu tunajua kwamba tunamfurahisha Baba yetu wa mbinguni.—Soma Methali 27:11.

14. Kwa nini tunaweza kuwa na shangwe mhubiri mwingine anapompata mtu anayependezwa katika eneo tunalohubiri?

¹⁴ Tunaweza pia kuwa na shangwe mhubiri mwingine anapompata mtu anayependezwa katika eneo tunalohubiri. Gazeti la Mnara wa Mlinzi limelinganisha kazi yetu ya kuhubiri na kazi ya kumtafuta mtoto aliyepotea. Watu wengi wanahusika katika kazi hiyo, wakimtafuta eneo moja baada ya lingine. Mtoto anapopatikana, kila mtu—na si yule tu aliyempata—bali watu wote wanakuwa na shangwe. Vivyo hivyo, kila mtu kutanikoni anasaidia katika kazi ya kufanya wanafunzi. Wote kutanikoni wanahitajika ili kuhubiri eneo lote, na wote wanakuwa na shangwe mwanafunzi mpya anapoanza kuhudhuria mikutano.

KAZIA FIKIRA UPENDO WAKO KWA YEHOVA NA KWA JIRANI

15. Kutumia kanuni ya Mathayo 22:​37-39 kunatuchocheaje kushiriki zaidi katika huduma? (Tazama pia picha kwenye .)

¹⁵ Tunaweza kuchochewa zaidi kufanya kazi ya kuhubiri kwa kukazia fikira upendo wetu kwa Yehova na kwa jirani. (Soma Mathayo 22:​37-39.) Fikiria jinsi Yehova anavyofurahi anapoona tukifanya kazi hiyo na jinsi watu watakavyofurahi watakapoanza kujifunza Biblia! Pia, kumbuka kwamba wale ambao wanasikiliza ujumbe wetu na kuamua kumtumikia Yehova wanaweza kuishi milele.—Yoh. 6:40; 1 Tim. 4:16.

16. Tunawezaje kupata shangwe katika huduma yetu ikiwa hali zetu hazituruhusu kutoka nyumbani? Toa mfano.

¹⁶ Je, unashindwa kutoka nyumbani kwa sababu fulani? Ikiwa ndivyo, kazia fikira mambo unayoweza kufanya ili kuonyesha kwamba unampenda Yehova na jirani. Wakati wa janga la COVID-19, Samuel na Dania hawakuweza kutoka nyumbani. Katika kipindi hicho chote kigumu, walihubiri kwa ukawaida kupitia simu, waliandika barua, na waliongoza mafunzo ya Biblia kupitia Zoom. Samuel aliwahubiria watu aliokutana nao hospitalini alipoenda kupata matibabu ya kansa. Anasema hivi: “Hali ngumu tunazokabili zinatulemea kiakili, kimwili, na kiroho. Tunahitaji kupata shangwe katika utumishi wetu kwa Yehova.” Walipokuwa wakikabili hali hizo, Dania alianguka na hakuweza kutoka kitandani kwa miezi mitatu. Kisha, alihitaji kutumia kiti cha magurudumu kwa miezi sita. Dania anasema hivi: “Nilijitahidi kufanya yote niliyoweza kadiri hali zangu zilivyoniruhusu. Niliweza kumhubiria muuguzi aliyenitembelea, na nilizungumza na wote waliotuletea vitu nyumbani. Pia, nilikuwa na mazungumzo mazuri kupitia simu pamoja na mwakilishi wa kampuni inayouza vifaa vya matibabu.” Ingawa hali za Samuel na Dania hazikuwaruhusu kutimiza mengi kama ilivyokuwa zamani, walipata shangwe kwa sababu walifanya yote waliyoweza.

17. Unawezaje kunufaika zaidi na mapendekezo yalitolewa katika makala hii?

¹⁷ Mapendekezo matano yaliyotolewa katika makala hii yatakuwa na matokeo zaidi ikiwa yatatumiwa yote kwa pamoja. Kila pendekezo ni kama kiungo kimoja kinachotumiwa kupika chakula fulani. Viungo vyote vinapochanganywa pamoja, chakula kinakuwa kitamu sana. Tunapotumia mapendekezo yote matano, tutakuwa na vifaa kamili kwa ajili ya kupambana na hisia zisizofaa na kupata shangwe zaidi katika huduma.