1. Baadhi ya watumishi waaminifu wa Yehova wanapambana na hisia gani?

 TUNAFURAHI sana kujua kwamba Yehova anawakubali watu wake wakiwa kikundi! Biblia inasema hivi: “Yehova anawafurahia watu wake.” (Zab. 149:4) Hata hivyo, wakati mwingine baadhi ya watu wanavunjika moyo na kujiuliza, ‘Je, Mungu ananikubali mimi binafsi?’ Watumishi wengi waaminifu wa Yehova walioishi nyakati za Biblia, pindi fulani walihangaishwa na mawazo kama hayo.—1 Sam. 1:​6-10; Ayu. 29:​2, 4; Zab. 51:11.

2. Ni nani walio na kibali cha Yehova?

² Biblia inaonyesha wazi kwamba wanadamu wasio wakamilifu wanaweza kupata kibali cha Yehova. Jinsi gani? Ni lazima tuonyeshe kwamba tunamwamini Yesu Kristo na kubatizwa. (Yoh. 3:​16, maelezo ya chini) Hivyo, tunaonyesha hadharani kwamba tumetubu dhambi zetu na tumemwahidi Mungu kuwa tutafanya mapenzi yake. (Mdo. 2:38; 3:19) Yehova anafurahi tunapochukua hatua hizo ili kusitawisha uhusiano mzuri pamoja naye. Maadamu tunaendelea kufanya yote tuwezayo ili kuishi kulingana na ahadi tuliyotoa tulipojiweka wakfu, Yehova anatukubali na kutuona kuwa rafiki zake wa karibu.—Zab. 25:14.

3. Tutazungumzia nini?

³ Kwa nini huenda baadhi ya watu pindi fulani wakahisi kwamba hawana kibali cha Mungu? Yehova anatuonyeshaje kwamba tuna kibali chake? Na Mkristo anawezaje kuimarisha uhakika wake kwamba ana kibali cha Mungu?

KWA NINI BAADHI YA WATU HUENDA WAKAHISI KWAMBA HAWANA KIBALI CHA YEHOVA?

4-5. Tunaweza kuwa na uhakika gani licha ya kuwa na hisia za kujiona hatufai?

⁴ Wengi wetu tumepambana na hisia za kujiona hatufai tangu tukiwa watoto. (Zab. 88:15) Ndugu anayeitwa Adrián, anasema hivi: “Sikuzote nimejihisi sifai. Nilipokuwa mvulana mdogo ninakumbuka nikisali kwamba familia yetu iweze kuishi katika Paradiso, ingawa nilikuwa na uhakika kwamba mimi sikustahili kuishi huko.” Tony, ambaye hakulelewa na wazazi Wakristo, anasema hivi: “Wazazi wangu hawakuwahi kamwe kuniambia wananipenda au kwamba wanafurahia mambo mazuri ninayofanya. Hilo lilinifanya nihisi kwamba hakuna jambo lolote zuri nililofanya ambalo liliwapendeza.”

⁵ Ikiwa pindi fulani tunapambana na hisia za kujiona hatufai, tunapaswa kukumbuka kwamba Yehova mwenyewe anatuvuta kwake. (Yoh. 6:44) Anaona sifa nzuri tulizo nazo ambazo huenda sisi wenyewe hatuzioni na anaujua moyo wetu. (1 Sam. 16:7; 2 Nya. 6:30) Hivyo, tunaweza kumwamini anaposema sisi ni wenye thamani.—1 Yoh. 3:​19, 20.

6. Mtume Paulo alihisije kuhusu dhambi alizotenda awali?

⁶ Kabla ya kujifunza kweli, baadhi yetu tulifanya mambo ambayo huenda bado yanafanya tujihisi tukiwa na hatia. (1 Pet. 4:3) Hata Wakristo waaminifu wanapambana na mwelekeo wa kutenda dhambi. Je, moyo wako unakuhukumu? Ikiwa ndivyo, unaweza kutiwa moyo kujua kwamba watumishi wengine waaminifu wa Yehova wamekabiliana na hisia hizo pia. Kwa mfano, mtume Paulo alijihisi vibaya alipofikiria kuhusu udhaifu wake. (Rom. 7:24) Paulo alikuwa ametubu dhambi zake na kubatizwa. Hata hivyo, alijirejelea kuwa “mdogo zaidi kati ya mitume” na mtenda dhambi “wa kwanza kabisa.”—1 Kor. 15:9; 1 Tim. 1:15.

7. Tunapaswa kukumbuka nini kuhusu dhambi zetu za zamani?

⁷ Baba yetu wa mbinguni anaahidi kwamba atatusamehe ikiwa tutatubu. (Zab. 86:5) Hivyo, ikiwa tumetubu dhambi zetu kikweli, tunaweza kuwa na uhakika kwamba jambo ambalo Yehova ametuahidi ni la kweli, naye ametusamehe.—Kol. 2:13.

8-9. Tunawezaje kushinda hisia za kwamba mambo tunayofanya hayatoshi kutupatia kibali cha Yehova?

⁸ Sisi sote tungependa kumtumikia Yehova kikamili. Hata hivyo, baadhi ya watu wanahisi kwamba mambo wanayofanya hayatoshi kuwapatia kibali cha Yehova. Dada anayeitwa Amanda anasema hivi: “Mimi hufikiri kwamba kumtolea Yehova kilicho bora kabisa humaanisha sikuzote napaswa kufanya mengi zaidi. Ninaposhindwa kuyatimiza, ninavunjika moyo na kuhisi kwamba Yehova pia hapendezwi nami.”

⁹ Tunawezaje kushinda hisia za kwamba mambo tunayofanya hayatoshi kutupatia kibali cha Yehova? Kumbuka kwamba Yehova ana usawaziko na ni mwenye kunyumbulika. Kamwe hatarajii tufanye mengi zaidi ya yale tunayoweza kutimiza. Anathamini jambo lolote tunalofanya kwa ajili yake maadamu tumempa kilicho bora kulingana na uwezo wetu. Pia, tafakari kuhusu watu katika Biblia ambao walimtumikia Yehova kwa moyo wote. Mfikirie Paulo. Kwa miaka mingi alifanya kazi kwa bidii, akisafiri umbali wa maelfu ya kilomita na kuanzisha makutaniko mengi. Hata hivyo, hali zake zilipobadilika na akashindwa kutimiza mengi zaidi katika kazi yake ya kuhubiri, je, alipoteza kibali cha Yehova? Hapana. Aliendelea kufanya yote aliyoweza, na Yehova alimbariki. (Mdo. 28:​30, 31) Vivyo hivyo, wakati mwingine mambo tunayomtolea Yehova yanaweza kutofautiana. Lakini jambo muhimu kwake ni nia yetu. Acheni tuchunguze baadhi ya njia ambazo Yehova anaonyesha kwamba tuna kibali chake.

YEHOVA ANATUONYESHAJE KWAMBA TUMEPATA KIBALI CHAKE?

10. Tunawezaje “kumsikia” Yehova akituambia kwamba ametukubali? (Yohana 16:27)

¹⁰ Kupitia Biblia. Yehova anafurahi kuwaonyesha kibali chake wale anaowapenda. Maandiko yanataja pindi mbili ambapo Yehova alimwambia Yesu kwamba yeye ni Mwana wake mpendwa, anayemkubali. (Mt. 3:17; 17:5) Je, ungependa kumsikia Yehova akikuhakikishia kwamba una kibali chake? Yehova hazungumzi nasi moja kwa moja, lakini anazungumza nasi kupitia Neno lake. Tunaposoma katika vitabu vya Injili maneno yenye upendo ya Yesu aliyowaambia wanafunzi wake, ni kana kwamba tunamsikia Yehova akizungumza nasi. (Soma Yohana 16:27.) Yesu aliiga kikamilifu utu wa Baba yake. Hivyo, tunaposoma kwamba Yesu aliwaambia wafuasi wake waaminifu ambao si wakamilifu kwamba amewakubali, tunaweza kuwazia Yehova akituambia maneno hayohayo.—Yoh. 15:​9, 15.

11. Kwa nini kukabili hali ngumu hakumaanishi kwamba tumepoteza kibali cha Yehova? (Yakobo 1:12)

¹¹ Kupitia matendo yake. Yehova yuko tayari kutusaidia; kwa mfano, kwa kutuandalia mahitaji yetu ya kimwili. Pindi fulani, huenda Yehova akaruhusu tupitie hali ngumu, kama ilivyokuwa kwa Ayubu mwadilifu. (Ayu. 1:​8-11) Majaribu hayamaanishi kwamba tumepoteza kibali cha Mungu. Badala yake, yanatupatia fursa ya kuthibitisha kina cha upendo wetu kwa Mungu na kwamba tunamtumaini. (Soma Yakobo 1:12.) Tutajionea utunzaji wenye upendo na utegemezo wa Yehova anapotusaidia kuvumilia majaribu.

12. Tunaweza kujifunza nini kutokana na kisa cha Dmitrii?

¹² Mfikirie ndugu anayeitwa Dmitrii, anayeishi barani Asia. Alipoteza kazi yake na hakufanikiwa kupata kazi kwa miezi mingi. Dmitrii aliamua kushiriki zaidi katika huduma, na hivyo alionyesha kwamba anamtumaini Yehova. Miezi mingi ilipita, na bado hakupata kazi. Kisha alipata matatizo ya afya yaliyofanya ashindwe kutoka kitandani. Alianza kufikiri kwamba yeye si mume na baba mzuri, na alihisi amepoteza kibali cha Yehova. Siku moja jioni, binti yake alichapisha kwenye karatasi maneno ya Isaya 30:15 yanayosema hivi: “Mtakuwa na nguvu mkiendelea kuwa watulivu na kuwa na tumaini.” Alimwonyesha baba yake na kumwambia, “Baba, unapohisi vibaya, kumbuka andiko hili.” Dmitrii akatambua kwamba kwa msaada wa Yehova, familia yake ilikuwa na chakula cha kutosha, mavazi, na mahali pa kuishi. Anasema hivi: “Nilichohitaji kufanya ni kuwa mtulivu na kuendelea kumtumaini Mungu wangu.” Ikiwa unakabili jaribu kama hilo, unaweza kutumaini kwamba Yehova anakujali na atakusaidia kuvumilia.

13. Huenda Yehova akamtumia nani kutuonyesha kwamba tuna kibali chake, na anafanya hivyo jinsi gani?

¹³ Kupitia waabudu wenzetu. Yehova huwatumia ndugu na dada zetu kutuonyesha kwamba tuna kibali chake. Kwa mfano, huenda akawachochea kusema maneno yenye kutia moyo kwa wakati unaofaa. Dada mmoja kutoka barani Asia alijionea jambo hilo alipokabili hali ngumu sana. Alikuwa amepoteza kazi yake na alikuwa mgonjwa sana. Kisha mume wake alifanya dhambi nzito na hivyo hakuendelea kutumikia akiwa mzee wa kutaniko. Dada huyo anasema hivi: “Sikuelewa kwa nini mambo hayo yalikuwa yakinipata. Nilifikiri kwamba huenda nimefanya jambo fulani baya na nimepoteza kibali cha Yehova.” Dada yetu alimsihi Yehova amhakikishie kwamba ana kibali chake. Alifanyaje hivyo? Anaeleza hivi: “Wazee wa kutaniko walizungumza nami na kunihakikishia kwamba Yehova ananipenda.” Baadaye, dada yetu alimwomba tena Yehova msaada. Anaendelea kusema hivi: “Siku hiyohiyo nilipata barua kutoka kwa kikundi cha ndugu na dada kutanikoni. Nilipokuwa nikisoma maneno yao yenye kufariji, nilihisi kwamba Yehova alikuwa amesikia sala yangu.” Naam, mara nyingi Yehova anatuonyesha kibali chake kupitia maneno yenye fadhili ya wengine.—Zab. 10:17.

14. Ni kwa njia gani nyingine Yehova anatuonyesha kwamba tuna kibali chake?

¹⁴ Pia, Yehova anatuonyesha kwamba tuna kibali chake kwa kuwatumia waabudu wenzetu watupatie shauri tunapolihitaji. Kwa mfano, katika karne ya kwanza, Yehova alimtumia mtume Paulo kuwaandikia waabudu wenzake barua 14 zilizoongozwa na roho. Barua hizo zilikuwa na shauri la moja kwa moja lakini lililotolewa kwa upendo. Kwa nini Yehova alimwongoza Paulo kuandika shauri hilo? Yehova ni Baba mzuri, na anawatia nidhamu watoto wake ‘anaowapenda.’ (Met. 3:​11, 12) Hivyo, tunapopokea shauri linalotegemea Biblia, tunaweza kuliona kuwa uthibitisho wa kwamba tuna kibali cha Mungu, na si kwamba tumepoteza kibali chake. (Ebr. 12:6) Ni mambo gani mengine yanayothibitisha kwamba tuna kibali cha Yehova?

UTHIBITISHO MWINGINE UNAOONYESHA KWAMBA TUNA KIBALI CHA YEHOVA

15. Yehova humpatia nani roho yake takatifu, na kwa nini hilo linatupatia uhakika kwamba tuna kibali chake?

¹⁵ Yehova huwapatia wale walio na kibali chake roho yake takatifu. (Mt. 12:18) Tunaweza kujiuliza hivi, ‘Je, nimefaulu kuonyesha sifa fulani ya tunda la roho ya Mungu maishani mwangu?’ Je, umetambua kwamba wewe ni mwenye subira zaidi unaposhughulika na wengine kuliko ulivyokuwa kabla hujamjua Yehova? Ukweli ni kwamba kadiri unavyojifunza kuonyesha zaidi sifa za tunda la roho ya Mungu, ndivyo utakavyokuwa na uhakika zaidi kwamba una kibali cha Yehova!—Tazama sanduku “ Sifa za Tunda la Roho Ni . . . ”

16. Yehova anamtumia nani kuhubiri habari njema, na hilo linakufanya uhisije? (1 Wathesalonike 2:4)

¹⁶ Yehova anafurahi kuwakabidhi habari njema wale wenye kibali chake. (Soma 1 Wathesalonike 2:4.) Ona jinsi dada anayeitwa Jocelyn alivyonufaika kwa kushiriki habari njema pamoja na wengine. Siku moja, Jocelyn aliamka asubuhi akiwa ameshuka moyo. Anasema hivi: “Nilihisi kana kwamba sina kitu cha kutoa. Lakini nilikuwa painia, na ilikuwa siku yangu ya kwenda utumishi. Hivyo, nilitoa sala na kwenda kwenye utumishi wa shambani.” Asubuhi hiyo, Jocelyn alikutana na Mary, mwanamke mwenye fadhili aliyekubali kujifunza Biblia. Miezi kadhaa baadaye, Mary alimwambia kwamba alikuwa akisali kwa Mungu ili apate msaada wakati Jocelyn alipopiga hodi. Jocelyn anasema hivi anapokumbuka kisa hicho: “Nilihisi ni kana kwamba Yehova ananiambia, ‘Ninakukubali.’” Bila shaka, si watu wote watakaoitikia vizuri tunapowahubiria. Lakini tunaweza kuwa na uhakika kwamba Yehova anafurahi tunapojitahidi kadiri tunavyoweza kuwahubiria wengine habari njema.

17. Unajifunza nini kutokana na maelezo ya Vicky kuhusu fidia? (Zaburi 5:12)

¹⁷ Yehova anatumia thamani ya dhabihu ya fidia kwa wale walio na kibali chake. (1 Tim. 2:​5, 6) Lakini namna gani ikiwa mioyo yetu haikubali kwamba tuna kibali cha Yehova, hata ingawa tuna imani katika fidia na tumebatizwa? Kumbuka kwamba hatuwezi kutumaini hisia zetu sikuzote, lakini tunaweza kumtumaini Yehova. Anawaona wale walio na imani katika fidia kuwa waadilifu machoni pake na anaahidi kuwabariki. (Soma Zaburi 5:12; Rom. 3:26) Kutafakari kuhusu fidia kulimsaidia dada anayeitwa Vicky. Siku moja, baada ya kutafakari kwa kina kuhusu fidia, alifikia mkataa huu: “Yehova alikuwa amenionyesha subira kwa muda mrefu. . . . Hata hivyo, ni kana kwamba nilikuwa nikimwambia: ‘Upendo wako hauwezi kunifikia. Dhabihu ya Mwana wako haiwezi kufunika dhambi zangu.’” Alipotafakari kuhusu zawadi ya fidia, alianza kuhisi kwamba Yehova anampenda. Sisi pia tutahisi upendo wa Yehova na kibali chake tutakapotafakari kuhusu fidia.

18. Tunaweza kuwa na uhakika gani ikiwa tutaendelea kumpenda Baba yetu wa mbinguni?

¹⁸ Ingawa huenda tukajitahidi kutumia mapendekezo katika makala hii, nyakati nyingine huenda bado tukavunjika moyo na kuhisi hatuna kibali cha Yehova. Ikiwa utahisi hivyo, kumbuka kwamba Yehova anawaonyesha kibali chake “wale wanaoendelea kumpenda.” (Yak. 1:12) Kwa hiyo, endelea kumkaribia Yehova na kutambua njia anazokuonyesha kwamba una kibali chake. Sikuzote kumbuka kwamba Yehova “hayuko mbali na kila mmoja wetu.”—Mdo. 17:27.