1-2. Tunanufaikaje kwa kuumbwa tukiwa na uwezo wa kupata furaha zaidi tunapotoa kuliko tunapopokea?

 YEHOVA alipowaumba wanadamu, aliwaumba wakiwa na uwezo wa kupata furaha zaidi wanapotoa kuliko wanapopokea. (Mdo. 20:35) Je, hilo linamaanisha kwamba hatuwezi kupata shangwe yoyote tunapopokea? Hapana. Sisi sote tumejionea jinsi tunavyohisi vizuri tunapopokea zawadi. Hata hivyo, tunakuwa na furaha kubwa hata zaidi tunapotoa. Kwa kweli, ni faida kwetu kwamba Yehova alituumba kwa njia hii. Kwa nini?

² Njia ambayo Yehova ametuumba, inaturuhusu sisi wenyewe kuongeza furaha yetu. Tunaweza kuongeza shangwe yetu kwa kutafuta fursa nyingi zaidi za kutoa. Je, haistaajabishi kwamba Yehova alituumba kwa njia hiyo?—Zab. 139:14.

3. Kwa nini Yehova anafafanuliwa kuwa “Mungu mwenye furaha”?

³ Maandiko yanatuhakikishia kwamba kutoa kunaleta furaha, hivyo haishangazi kuwa Biblia inamwita Yehova, “Mungu mwenye furaha.” (1 Tim. 1:11) Yeye ndiye Mtoaji wa kwanza na mkuu zaidi. Kama mtume Paulo alivyoeleza, “tuko hai, tunatembea, na tunaishi” kwa sababu ya Yehova. (Mdo. 17:28) Kwa kweli, “kila zawadi njema na kila tuzo kamilifu” hutoka kwa Yehova.—Yak. 1:17.

4. Ni jambo gani litakalotusaidia kupata furaha zaidi?

⁴ Huenda sisi sote tungependa kujionea kwa njia kubwa zaidi furaha inayotokana na kutoa. Tunaweza kupata furaha hiyo kwa kuiga ukarimu wa Yehova. (Efe. 5:1) Tunapochunguza mfano wa Yehova, acheni tuone mambo tunayoweza kufanya ikiwa tunahisi kwamba watu hawathamini yale tunayowafanyia. Vikumbusho hivyo vitatusaidia kudumisha na hata kuongeza shangwe tunayopata tunapotoa.

IGA UKARIMU WA YEHOVA

5. Yehova anatuandalia vitu gani vya kimwili?

⁵ Yehova ametuonyesha ukarimu kwa njia gani? Fikiria mifano michache. Yehova anatupatia vitu vya kimwili. Huenda sikuzote tusiwe na vitu vya kustarehesha, lakini tunamshukuru Yehova kwamba anahakikisha sikuzote tunapata vitu tunavyohitaji. Kwa mfano, anatuwezesha kupata chakula, mavazi, na mahali pa kuishi. (Zab. 4:8; Mt. 6:​31-33; 1 Tim. 6:​6-8) Je, Yehova anatuandalia mahitaji yetu ya kimwili kwa sababu tu ni wajibu wake? La hasha! Basi, kwa nini Yehova anatuandalia mambo hayo?

6. Tunajifunza nini kutokana na Mathayo 6:​25, 26?

⁶ Kwa ufupi, Yehova hutuandalia mahitaji yetu ya kimwili kwa sababu anatupenda. Fikiria maneno ya Yesu yanayopatikana kwenye Mathayo 6:​25, 26. (Soma.) Yesu anatumia mifano kutokana na uumbaji. Anapozungumza kuhusu ndege, Yesu anasema hivi: “Hawapandi mbegu, hawavuni, wala kukusanya ghalani.” Hata hivyo, anaendelea kusema hivi: “Baba yenu wa mbinguni huwalisha.” Kisha, Yesu anauliza hivi: “Je, ninyi si wenye thamani kuliko wao?” Tunajifunza nini? Yehova anawaona waabudu wake kuwa wenye thamani zaidi kuliko wanyama. Ikiwa Yehova anawaandalia wanyama mahitaji yao, tunaweza kuwa na uhakika kwamba atatuandalia mahitaji yetu pia! Kama baba wa kibinadamu mwenye kujali, Yehova anaiandalia familia yake kwa sababu anaipenda.—Zab. 145:16; Mt. 6:32.

7. Taja njia moja ambayo tunaweza kuiga ukarimu wa Yehova. (Tazama pia picha.)

⁷ Kama Yehova, sisi pia tunaweza kuwapatia wengine mahitaji yao ya kimwili kwa sababu tunawapenda. Kwa mfano, je, unamjua mwabudu mwenzako ambaye anahitaji chakula au mavazi? Yehova anaweza kukutumia wewe kumsaidia kupata mahitaji hayo. Watu wa Yehova wanatambulika hasa kwa kuonyesha ukarimu wakati wa majanga. Kwa mfano, wakati wa janga la COVID-19, ndugu na dada waliwapatia chakula, mavazi, na vitu vingine wale waliokuwa na uhitaji. Pia, ndugu na dada wengi walitoa michango kwa ukarimu kwa ajili ya kazi ya ulimwenguni pote. Michango hiyo ilisaidia katika kazi ya kutoa misaada kwa akina ndugu ulimwenguni pote. Ndugu na dada hao walifuata ushauri huu unaopatikana kwenye Waebrania 13:16: “Msisahau kutenda mema na kushiriki vitu vyenu pamoja na wengine, kwa maana Mungu hupendezwa na dhabihu kama hizo.”

8. Tunanufaikaje kutokana na nguvu za Yehova? (Wafilipi 2:13)

⁸ Yehova hutupatia nguvu. Yehova ana nguvu zisizo na mipaka, na anafurahia kuwapatia nguvu waabudu wake waaminifu. (Soma Wafilipi 2:13.) Je, umewahi kusali ili upate nguvu za kupinga kishawishi au za kuvumilia jaribu kali? Huenda pia umewahi kumwomba Yehova akupatie nguvu za kutosha ili utimize mambo unayohitaji kufanya siku hiyo. Sala yako inapojibiwa, unaweza kukubaliana na maneno haya ya mtume Paulo: “Kwa mambo yote nina nguvu kupitia yule anayenipa nguvu.”—Flp. 4:13.

9. Tunawezaje kuiga jinsi Yehova anavyotumia nguvu zake kwa ukarimu? (Tazama pia picha.)

⁹ Ingawa sisi ni wanadamu wasio wakamilifu, tunaweza kuiga jinsi Yehova anavyotumia nguvu zake kwa ukarimu. Hatuwezi kuwapatia watu wengine nguvu zetu kihalisi. Lakini tunaweza kuzitumia kwa ajili yao. Kwa mfano, tunaweza kuwasaidia kazi za nyumbani Wakristo waliozeeka au wagonjwa. Ikiwa hali zetu zinaruhusu, tunaweza kujitolea kusaidia kusafisha na kudumisha Jumba la Ufalme. Tukitumia nguvu zetu kwa njia hiyo tutawanufaisha ndugu na dada zetu.

10. Tunawezaje kutumia nguvu ya maneno kuwanufaisha wengine?

¹⁰ Usisahau kwamba maneno pia yana nguvu. Je, unaweza kumfikiria mtu yeyote atakayenufaika ikiwa utampongeza kwa unyoofu? Je, unamjua mtu yeyote anayehitaji faraja? Ikiwa ndivyo, kwa nini usichukue hatua ya kwanza kumfikia mtu huyo? Unaweza kumtembelea, kumpigia simu, au labda kumtumia kadi, barua pepe, au ujumbe wa simu. Si lazima uwe mwenye ufasaha ili ufanye hivyo. Huenda maneno machache ya kutoka moyoni ndiyo ambayo hasa mwabudu mwenzako anahitaji ili aendelee kuwa mwaminifu siku hiyo au kupata nafuu kutokana na hali yake.—Met. 12:25; Efe. 4:29.

11. Yehova anatumia hekima yake jinsi gani?

¹¹ Yehova hutupatia hekima. Mwanafunzi Yakobo aliandika hivi: “Ikiwa yeyote kati yenu anakosa hekima, na aendelee kumwomba Mungu, kwa maana yeye huwapa wote kwa ukarimu na bila kutafuta makosa.” (Yak. 1:5; maelezo ya chini) Kama maneno hayo yanavyoonyesha, Yehova hawanyimi watu hekima yake. Kwa ukarimu anawapatia wengine hekima yake. Pia, Yakobo alisema kwamba Yehova anapowapatia watu hekima, anafanya hivyo “bila kushutumu,” au “bila kutafuta makosa.” Kamwe hataki tujihisi vibaya kwa kukubali kwamba tunahitaji mwongozo wake. Badala yake, anatusihi tuutafute mwongozo wake.—Met. 2:​1-6.

12. Tuna fursa zipi za kuwafundisha wengine mambo tunayojua?

¹² Namna gani sisi? Je, tunaweza kumwiga Yehova kwa kuwafundisha wengine mambo tunayojua? (Zab. 32:8) Watu wa Yehova wana fursa nyingi za kushiriki na wengine mambo waliyojifunza. Kwa mfano, mara nyingi tunawazoeza wahubiri wapya katika huduma. Wazee wa kutaniko huwasaidia kwa subira watumishi wa huduma na ndugu waliobatizwa wajifunze jinsi ya kushughulikia migawo yao kutanikoni. Na wale walio na uzoefu katika ujenzi na udumishaji husaidia kuwazoeza wasio na uzoefu mwingi ili waweze kufanya kazi kwenye majengo ya kitheokrasi.

13. Tunapowazoeza wengine, tunawezaje kuiga jinsi Yehova anavyoshiriki na wengine hekima yake?

¹³ Wale wanaowazoeza wengine watafanya vizuri wakiiga jinsi Yehova anavyowazoeza wengine. Kumbuka kwamba Yehova hutoa hekima kwa ukarimu. Vivyo hivyo, kwa ukarimu tunashiriki na wengine ujuzi na uzoefu wetu. Hatutawaficha baadhi ya mambo tunayojua kwa sababu tunaogopa kwamba huenda hatimaye wakachukua nafasi yetu. Wala hatungependa kuwa na maoni haya: ‘Hakuna aliyenizoeza mimi! Acha ajifunze mwenyewe.’ Watu wa Yehova hawapaswi kuwa na mtazamo kama huo. Badala yake, tunafurahi kuwaeleza wengine mambo tunayojua na kufanya yote tunayoweza ili kuwazoeza. (1 The. 2:8) Tunatumaini kwamba wao pia “watastahili vya kutosha kuwafundisha wengine.” (2 Tim. 2:​1, 2) Ikiwa sote tutashiriki kwa ukarimu hekima yetu, tutakuwa wenye hekima zaidi na furaha zaidi.

IKIWA WENGINE HAWATHAMINI MAMBO TUNAYOWAFANYIA

14. Watu wengi wanatendaje tunapowaonyesha ukarimu?

¹⁴ Tunapokuwa wakarimu, hasa kuelekea ndugu na dada zetu, mara nyingi wanatushukuru kwa ukarimu wetu. Huenda wakatuandikia kadi au kutushukuru kwa njia nyingine. (Kol. 3:15) Wanapotushukuru, tunakuwa wenye furaha zaidi.

15. Tunapaswa kukumbuka nini ikiwa baadhi ya watu hawathamini mambo tunayowafanyia?

¹⁵ Lakini wakati mwingine huenda baadhi ya watu wasitushukuru kwa mambo tuliyowafanyia. Nyakati nyingine, huenda tukatoa muda wetu, nguvu, au mali lakini baadaye tukajiuliza ikiwa kweli mtu tuliyemsaidia anathamini jambo tulilomfanyia. Ikiwa hilo litatokea, tunawezaje kuepuka kupoteza shangwe yetu au kuwa na uchungu? Kumbuka maneno ya andiko letu la msingi, Matendo 20:35. Furaha yetu inayotokana na kutoa haitegemei jinsi watu wanavyoitikia. Tunaweza kuchagua kufurahia kutoa hata ikiwa wengine hawathamini mambo tunayowafanyia. Jinsi gani? Fikiria njia chache zifuatazo.

16. Tunapaswa kukazia fikira nini tunapotoa?

¹⁶ Kazia fikira kumwiga Yehova. Yeye huwapatia watu vitu vizuri iwe wanathamini au la. (Mt. 5:​43-48) Yehova anaahidi kwamba tunapomwiga kwa kutoa “bila kutumaini kurudishiwa,” tutapata “thawabu kubwa.” (Luka 6:35) Hivyo, usivunjike moyo ikiwa watu hawatakushukuru. Kumbuka kwamba sikuzote Yehova atakuthawabisha kwa mema unayofanya ili kuwasaidia wengine kwa sababu wewe ni “mtoaji mchangamfu.”—Met. 19:17; 2 Kor. 9:7.

17. Tunawezaje kudumisha mtazamo unaofaa? (Luka 14:​12-14)

¹⁷ Ili tudumishe mtazamo unaofaa tunapotoa, tunahitaji kutumia kanuni iliyo kwenye Luka 14:​12-14. (Soma.) Si vibaya kuwakaribisha au kuwaonyesha ukarimu kwa njia nyingine wale wanaoweza kutuonyesha ukarimu pia. Hata hivyo, namna gani ikiwa tumetambua kwamba tumekuwa tukiwaonyesha wengine ukarimu kwa sababu tunatumaini kwamba wao watatuonyesha ukarimu pia? Itafaa ikiwa tutajitahidi kufuata ushauri wa Yesu. Tunaweza kuwa wakaribishaji wageni kwa watu ambao tunajua kwamba hawana uwezo wa kuturudishia chochote. Kisha, tutakuwa na furaha kwa sababu tunamwiga Yehova. Pia, mtazamo huo utatusaidia kuendelea kuwa na shangwe hata wengine wasipothamini mambo tunayowafanyia.

18. Ni nini kitakachotusaidia kutowafikiria vibaya waabudu wenzetu?

¹⁸ Epuka kutilia shaka nia ya wengine. (1 Kor. 13:7) Ikiwa wengine hawathamini mambo tunayowafanyia, tunaweza kujiuliza hivi: ‘Je, kweli wao ni watu wasio na shukrani, au wamesahau tu kutushukuru?’ Labda kuna sababu nyingine zilizofanya wasitende kama tulivyotarajia. Huenda baadhi ya watu wakathamini sana mambo tuliyowafanyia lakini wakashindwa kusema. Huenda wanaaibika kupokea msaada, hasa ikiwa zamani, wao ndio waliokuwa wakiwasaidia wengine. Vyovyote vile, upendo wa Kikristo utatuchochea kutowafikiria vibaya waabudu wenzetu na kuendelea kupata shangwe inayotokana na kutoa.—Efe. 4:2.

19-20. Kwa nini subira ni muhimu tunapowafanyia wengine mambo mazuri? (Tazama pia picha.)

¹⁹ Uwe na subira. Mfalme Sulemani mwenye hekima aliandika hivi kuhusu kuwa wakarimu: “Tupa mkate wako juu ya maji, kwa maana baada ya siku nyingi utaupata tena.” (Mhu. 11:1) Kama maneno haya yanavyoonyesha, huenda wengine wakaonyesha uthamini—“baada ya siku nyingi.” Fikiria mfano ufuatao unaoonyesha ukweli wa jambo hilo.

²⁰ Miaka mingi iliyopita, mke wa mwangalizi wa mzunguko alimwandikia barua yenye kutia moyo dada aliyekuwa amebatizwa karibuni, akimsihi aendelee kuwa mwaminifu. Miaka minane baadaye, dada huyo alijibu barua hiyo na kusema hivi: “Nilihisi ninapaswa kukuandikia na kukueleza jinsi ambavyo umekuwa msaada kwangu kwa miaka mingi bila hata wewe mwenyewe kutambua.” Aliendelea kusema hivi: “[Barua yako] ilikuwa na maneno yenye kutia moyo, lakini lile andiko hasa ndilo lililogusa moyo wangu, nami sikulisahau kamwe.” a Baada ya kueleza baadhi ya changamoto alizokabili, dada huyo alisema hivi: “Nyakati nyingine nilitaka kutoka, niiache kweli, niache kumtumikia Yehova. Lakini andiko uliloniandikia lilibaki moyoni mwangu, nami . . . nikaendelea kusonga mbele.” Anaongezea hivi: “Hakuna jambo lingine lolote katika miaka hiyo yote minane lililonisaidia kwa kadiri hiyo.” Hebu wazia jinsi mke huyo wa mwangalizi alivyofurahi alipopokea barua hiyo “baada ya siku nyingi”! Sisi pia tunaweza kupokea shukrani muda mrefu baada ya kumfanyia mtu jambo fulani zuri.

21. Kwa nini umeazimia kuendelea kuiga ukarimu wa Yehova?

²¹ Kama ilivyotajwa, Yehova alituumba tukiwa na uwezo wa pekee. Ingawa tunafurahia kupokea, tunapata furaha kubwa zaidi tunapotoa. Tunahisi vizuri tunapoweza kuwasaidia waabudu wenzetu. Na tunakuwa na furaha wanapotushukuru. Hata hivyo, iwe mpokeaji anatushukuru au la, tunaweza kufurahi kwamba tulifanya jambo linalofaa. Usisahau kamwe kwamba chochote unachotoa, ‘Yehova anaweza kukupa vingi zaidi.’ (2 Nya. 25:9) Sikuzote Yehova hutupatia vitu vingi zaidi kuliko tunavyotoa! Na hakuna shangwe kubwa zaidi kuliko kuthawabishwa na Yehova mwenyewe. Basi, acheni tuazimie kuendelea kumwiga Baba yetu wa mbinguni mwenye ukarimu.