TE BINTIK YA SJOJKʼOYIK TE JCHʼIELETIK
¿Bin kilel ya yilonik?
¿Bin yuʼun mukʼ skʼoplal te ya kiltik ta lek te bin yilel ya jchajpan jbatike? Melel te jkʼuʼ jpakʼtike ya yakʼ ta naʼel te bin yilel jtaleltike. Jaxan te jaʼate, ¿bin ya yalik ta atojol ta swenta te akʼuʼ apakʼe?
Oxchajp te bin ma skʼan pasel ta swenta te moda
Te bin ma lek ta pasel #1: Te jich ya alap akʼuʼ te bitʼil ya xkʼax ta anuncioetik.
Jtul achʼix te Theresa sbiil jich ya yal: «Ayniwan baeltik te bayal bin ya awil ta anuncio te ya xjajch amulan yuʼune. Te kʼalal ya awil ants winiketik te jich ya slap skʼuʼ spakʼik te bitʼil ya xchiknaj ta anuncio, jich ya xjajch akʼan ya alap akʼuʼ apakʼ-euk».
Te bin ya xchiknaj ta anuncioetik ma jaʼuknax ya x-ikʼbot yoʼtan te achʼixetik. Te libro The Everything Guide to Raising Adolescent Boys (Te bin-utʼil ta chʼitesel jchʼiel keremetik) jich ya yal: «Te keremetik jaʼnix jich ya stʼunik te moda [...]. Melel ya xlokʼ bayal anuncio ta stojol te keremetik manchukme chʼinikto».
Te bin lekxan ta pasele. Te Biblia jich ya yal: «Te machʼa ma snaʼ qʼuinal spisil ya schʼuhun, yan te machʼa pʼij yoʼtan ya stsahtay te banti ya xbehene» (Proverbios 14:15). Jaʼ yuʼun, nopa awaʼiy bin ya skʼan ya yalbat te anuncioetik ya awile. Jich bitʼil, te kʼalal ya awil anuncioetik yuʼun kʼuʼul pakʼal te kʼax pitsʼil o komik (sexy), jojkʼoybeya aba:
«¿Machʼa ya sta slekilal teme ya jtʼun te moda-abi?»
«¿Binwan ya yakʼ ta naʼel ta swenta te jkuxlejal teme jich ya jlap jkʼuʼ jpakʼe?»
«¿Yabal yakʼ ta naʼel te machʼaon-nix ta smelelil-a sok te bin jchʼuuneje?»
Pasa awil ini. Ila ta lek junuk semana te anuncioetik yuʼun kʼuʼul pakʼal. ¿Bin kuxlejalil ya skʼanik te ya atʼune? ¿Yabal anop te ya skʼanik te yakuk atʼun junuk modae? Jtul achʼix te Keren sbiil jich ya yal: «Ya jkʼantik te tʼujbilukotik ta ilel, te tʼujbiluk te jkʼuʼ jpakʼtik sok te tʼujbiluk ta ilel te jbakʼetaltik yuʼun te bin ya jlaptike. Te machʼatik ya spasik te anuncioetik ya snaʼik te jaʼ ya smonbeyik yoʼtan ta ora-abi te achʼix keremetik».
Te bin ma lek ta pasel #2: Te jich ya achajpan aba te bitʼil ay ta moda yuʼun-nax lek ya yilat te yantike.
Jtul kerem te Manuel sbiil jich ya yal: «Kʼalal jun kʼuʼul pakʼal ay ta moda, spisilik ya skʼan ya slapik. Teme maba ya atuuntese, ya slabanatik yuʼun». Jtul achʼix te Anna sbiil jaʼnix jich ya yal: «Te bin mukʼ skʼoplale ma jaʼuk te ya atuuntes te bin ay ta moda, jaʼnix jich mukʼ skʼoplal te lekuk ya yilat te awamigotake».
Te bin lekxan ta pasele. Te Biblia jich ya yal: «Ma me xapajbeyic stalel te bahlumilal» (Romanos 12:2). Ta swenta te consejo ini, ilawil te yawil akʼuʼ apakʼ sok jojkʼoybey aba ini:
«¿Bin ya jnop te kʼalal ya jtsa te jkʼuʼ jpakʼe?»
«¿Kʼax mukʼbal skʼoplal ta koʼtan te ya jman kʼuʼul pakʼal te kʼax toyol stojole?»
«¿Yabal jtoy jba yuʼun te jkʼuʼ jpakʼe?»
Pasa awil ini. Mame xa akuy te chebnax te bin ya xjuʼ ya apase, —te ya atʼun te moda yuʼun lek ya awichʼ ilel o te ya atuuntes biluk kʼuʼul pakʼal te ya awichʼ pʼajel yuʼune— jaʼnix jich ya xjuʼ ya apas ini: te manchuk ya atʼun te bin yilel ya schajpan sba te yantike. Melel teme lek ya awaʼiy aba, jich maba ya amel awoʼtan yuʼun te bin ya snopik te yantike.
Te bin ma lek ta pasel #3: Jaʼ lekxan teme tʼujbil (sexy) ya awichʼ ilel.
Jtul achʼix te Jennifer sbiil jich ya yal: «Ay baeltik te ya jkʼan ya jlap kʼuʼul pakʼal te komik sok te kʼax pitsʼilike».
Te bin lekxan ta pasele. Te Biblia jich ya yal: «Te achʼahlelic ma me haʼuc nax ta sba [...] haʼuc me achʼahlelic te bin ay ta awoʼtanic» (1 Pedro 3:3, 4). Ta swenta te consejo ini, nopa awaʼiy te bin lekxane: ¿Jaʼbal ya akʼan te lek ya awichʼ ilel yuʼun te bitʼil ya achajpan abae o jaʼbal yuʼun te ay slekil awoʼtane?
Pasa awil ini. Jaʼ lekil chʼalelil te pekʼel oʼtanil. Manchukme jaʼ jun talelil te ma mero chikanukix ta ilel ta ora ini, nopa awaʼiy:
¿Aybal machʼa ya anaʼbey sba te jaʼnax ya yalulan te bin ya spase? Te bin mel-oʼtantik sbae jaʼ te maʼyuk machʼa ya skʼan xjokinot ta skaj te jich stalele.
Te jkʼuʼ jpakʼtik jaʼ pajal sok te bitʼil ya xkʼopojotik, teme jich yilel te ya jtoy jbatik, maba ya skʼan ya sjokinotikix-a te yantike.
Jaʼnix jich ya xkʼot ta pasel teme ya alap kʼuʼul pakʼal te kʼax komik sok te pitsʼilike. Te kʼalal chajpnax ta ilel-a te akʼuʼ apakʼe, yaniwan skuyik te yantik te maba ya amukʼulin aba awoʼtan sok te ya atoy abae. Sok yaniwan snopik te ya amulan te ya awichʼ ilel, te jich yan bin ya xjajch snopik yuʼun-a.
Swenta ma yanuk te bin ya snopik ta atojol, pekʼeluk xa awakʼ aba. Jtul achʼix te Monica sbiil jich ya yal: «Teme maba kom o ma pitsʼil te akʼuʼ apakʼe ma skʼan ya yal te jich ya skʼan ya achajpan aba te bitʼil te achuchuʼe. Jaʼ ya skʼan ya yal te ya awichʼ aba ta mukʼ sok te ya awichʼ ta mukʼ te yantike».
Yaniwan amulan-euk sk'oponel ini
TE BIN YA YALIK YANTIK JCHʼIELETIK
¿Bin yuʼun bayal ya jmel koʼtan yuʼun te bin kilel ya kil jbae?
Ilawil bin ya xjuʼ ya apas yuʼun maba jaʼ ya xbajt ta awoʼtan te bin yilel ya awil abae.
TE BIN YA YALIK YANTIK JCHʼIELETIK
Te bin ya yalik yantik jchʼieletik ta swenta te bin yilel ya yil sbaike
¿Bin yuʼun te ay wokol ya kaʼiytik te manchuk ya jmel koʼtantik yuʼun te bin yilel ya kil jbatike? ¿Bin ya xjuʼ ya skoltayotik?
