Bayal jchʼieletik ya yalik te ya skʼoponik Dios, pero maba ya skʼoponik ta jujun kʼajkʼal. Ayniwan machʼatik jich ya yalik: «¿Bin swentail te oración? ¿Jaʼnaxbal ya skoltayon yuʼun lek ya kaʼiy jba?».

•  ¿Bin-a te oración?

•  ¿Yabal yaʼiybon jkʼop te Diose?

•  ¿Bintik ya skʼan ya kalbey te Diose?

•  Te bin ya yalik yantik jchʼieletik

 Te oración jaʼ te ya jkʼopontik te Jehová te Jpaswanej yuʼun spisil te bintik ay. Nopanax awaʼiy: te Dios te bayal yuʼel «ma ba namal ay ta jtojoltic» (Hechos 17:27). Te Biblia jich ya yalbotik: «Nohpojanic ta stojol Dios, hich ya xnohpoj ta atojolic» (Santiago 4:8).

 ¿Bin ya skʼan ya apas yuʼun ya xnoptsajat ta stojol Dios?

•   Pasa oración. Jaʼ jich ya xkʼopojat sok.

•   Kʼopona te Biblia. Jaʼ jich ya skʼoponat te Diose.

 Te kʼalal ya xkʼopojex ta achebalik, ta swenta te oración sok snopel te Biblia, yame skoltayat yuʼun ya awamigoinxan te Jehová.

 «Skʼoponel te Jehová te machʼa kʼax mukʼ yaʼtele, jaʼ jun tʼujbil majtanil te ay kuʼuntike» (xchi te Jeremy).

 «Kʼalal ya jcholbey te Jehová te bin yaʼiyel ya kaʼiy jba, nopolxan ya kaʼiy jba ta stojol» (xchi te Miranda).

 Manchukme achʼuunej te Dios sok ya apas oración, maniwan ya achʼuun te ya yaʼiybat te akʼope. Pero te Biblia jich ya yalbotik ta swenta te Jehová: «Yac awaʼiybey scʼop te machʼa ya scʼoponat» (Salmo 65:2). Jaʼnix jich ya yalbat te yakuk awalbey spisil te bin ya amel awoʼtan yuʼune. ¿Bin yuʼun? Melel ya smel yoʼtan ta atojol (1 Pedro 5:7).

 Nopa awaʼiy ini: ¿Spisilbal-ora ya xkʼopojat sok te awamigotake? Jichnix ya xjuʼ ya apas sok te Diose. Kʼopona ta spisil-ora sok albeya te sbiile: Jehová (Salmo 86:5-7; 88:9). Te Biblia ya yalbotik te yakuk kaʼtelintik skʼoponel te Diose (1 Tesalonicenses 5:17).

 «Te oración jaʼ te kʼalal ya xkʼopojon sok te jTat te ay ta chʼulchan sok te ya kalbey spisil te bin ay ta koʼtane» (xchi te Moises).

 «Ya jcholbey te Jehová te bintik mukʼ skʼoplale, jichnix te bitʼil ya kalbey te jmama sok te kamigotake» (xchi te Karen).

 Te Biblia jich ya yal: «Pero ta scuenta scʼoponel Dios soc yalel wocol, aʼbeya snaʼ Dios spisil te bintic yac acʼambeyic» (Filipenses 4:6).

 ¿Lekbal teme ya jcholbey yaʼiy te jproblemae? ¡Lek! Te Biblia ya yalbotik te jich ya skʼan ya jpastike: «Aʼbeya Jehová te bin ay awocol yuʼun, ha me ya yaʼbat awip» (Salmo 55:22).

 Pero mame jaʼuknax ya skʼan ya acholbey te awokole. Jtul achʼix te Chantelle sbiile, jich la yal: «Maba lekil amigaon yuʼun Jehová teme jaʼnax ya jkʼanbey koltayele. Ta melel, nail ya skʼan ya kalbeytik wokol, sok bayal bin ya xjuʼ ya jtsʼibay ta jun lista te bintik ya skʼan ya kalbey wokol yuʼune».

 Nopa awaʼiy ini: ¿Bintik ya awal wokol yuʼun? Nopa oxchajpuk te bin ya skʼan ya awalbey wokol yuʼun te Jehovae.

 «Maniwan kʼax mukʼuk skʼoplal te bin ya kalbeytik wokol yuʼune, jich bitʼil jun tʼujbil nichim ya xjuʼ ya stijbotik koʼtantik ta yalbeyel wokol te Jehová» (xchi te Anita).

 «Nopilana ta awoʼtan jun texto te bayal ya amulane o te bin spastiklanoj te Jehová te kʼaxto ya amulane. Ta patil albeya wokol yuʼun te Jehová» (xchi te Brian).