«Ay jpasoj tulan ta skʼoponel te Bibliae, pero ya kil te ma xlaj ta kʼoponel ta oranax» (xchi te Briana, 15 yaʼbilal).

 ¿Jichbal ya anop te jaʼate? Teme jiche, te artículo ini yame skoltayat.

•  ¿Bin yuʼun mukʼ skʼoplal te ya jkʼopontik te Biblia?

•  Te bintik-utʼil ya xjuʼ jkʼopontik te Biblia

•  Te bin ya yalik yantik jchʼieletik

 ¿Yabal yakʼ chʼajilal te ya jkʼopontik te Bibliae? Ya xkʼot ta koʼtantik. Jichniwan ya awil te bayal spaginaul sok te maʼyuk slokʼombail. ¡Ma pajaluk sok te bin ya xkʼax ta televisión sok ta videoetik!

 Pero nopanax awaʼiy ini: te yakuk ata jun caja te antiguoix te nojel ta oro, ¿mabal yakuk ajam ta oranax?

 Te Biblia pajal sok te caja te la kaltikixe, nojel ta bintik tʼujbil. Melel tey ya ata apʼijil te ya skoltayat swenta:

•   Ya anop ta lek te bin ya apase.

•   Lekuk ya awil aba sok te ameʼ atate.

•   Ya ata lekil awamigotak.

•   Ya akombey yip te estrés.

 Manchukme jaʼ jun libro te antiguoix, ya xjuʼ skoltayotik, melel «spisil te bin tsʼihbabil [...] hich nix la scʼan Dios te ya yichʼ tsʼihbayel» (2 Timoteo 3:16). Jaʼ yuʼun spisil te tojobtesel ya jtatik ta Biblia, jaʼ talem ta stojol te Jpaswanej yuʼun spisil te bintik aye.

 Te ya jkʼopontik ta spajkal. Jichme ya anaʼ bin-a te ya scholbey skʼoplal ta spajkal te Bibliae. Bayal te bin-utʼil ya xjuʼ ya apase. Kiltik cheb ejemplo:

•    Yame xjuʼ ya akʼopon te 66 ta pajk libroetik te yichʼoj te Biblia, ta Génesis kʼalal ta Apocalipsis.

•    Yame xjuʼ ya akʼopon jaʼ chikan te bin-ora kʼot ta pasel te bin ya yal te Bibliae.

 Te bin ya xjuʼ ya apas: Ta sección 4-A yuʼun te folleto Guía para el estudio de la Palabra de Dios yame ata jun lista ta swenta te bin kʼot ta pasel ta skuxlejal te Jesús liʼ ta Balumilal.

 Lea jun aʼiyej ta Biblia te pajal sok te wokolil te ay ta atojole. Jun ejemplo:

•    ¿Yabal amulan te ayuk awamigotak te ya xjuʼ ya awakʼ smukʼul awoʼtan ta stojole? Kʼopona te aʼiyej yuʼun te David sok Jonatán (1 Samuel, capítulo 18 kʼalal ta 20). Ta patil pasa te bin ya ata liʼi «Cómo encontrar amigos de verdad». Yame anop te bin-utʼil ya xjuʼ ya apas ta akuxlejal.

•    ¿Yabal akʼan te ayukxan awip yuʼun ya atsal te pejtsʼetike? Ya xjuʼ ya akʼopon te aʼiyej yuʼun te José, jich ya awil te bin-utʼil la stsal pejtsʼe (Génesis, capítulo 39). Ta patil pasa te bin ya ata liʼi «Cómo resistir las tentaciones», «Acusado falsamente». Tey ya anop bin ya skʼan ya apas.

•    ¿Yabal akʼan ya anaʼ bin-utʼil ya xjuʼ ya skoltayat te oracionetike? Kʼopona te bin kʼot ta stojol te Nehemías (Nehemías, capítulo 2). Ta patil pasa te bin ya ata liʼi «Jehová contestó su oración». Bayalme bin ya yakʼbat anop.

 Te bin ya xjuʼ ya apas: Kʼalal ya akʼan ya akʼopon te Biblia, lea jun lugar te banti maʼyuk bin ya xjuʼ ya schʼaytesbat awoʼtan.

 Tsaa jun aʼiyej o jun salmo, kʼopona, ta patil nopa bin-utʼil ya xjuʼ ya skoltayat. Kʼalal ya xlaj akʼoponbele, pasbeya aba te jojkʼoyeletik ini:

•    ¿Binwan yuʼun te Jehová la yotses ta Biblia te kʼopiletik ini?

•    ¿Bin ya jnop ta swenta stalel sok ta swenta te bin ya spas te Jehová?

•    ¿Bin-utʼil ya xjuʼ ya skoltayon ta jkuxlejal te bin lajelto jkʼoponbele?

 Te bin ya xjuʼ ya apas: Akʼa ta awoʼtan te ya xkʼot ta pasel awuʼun. Tsʼibaya te bin kʼajkʼalil ya xkajat ta skʼoponel te Biblia, tuuntesa te «Programa yuʼun skʼoponel te Biblia» te ya ata ta página kuʼuntik ta Internet.