«Ya xchʼajubotik ta skʼoponel yilel te Bibliae. Pero jaʼnax ya xchʼajubat teme maba ya anaʼ bitʼil ya akʼopone», jich la yal jtul jchʼiel kerem te Will sbiile.

 ¿Yabal akʼan ya anaʼ bin-utʼil ya xjuʼ ya amulan skʼoponel te Bibliae? Te bin ya yichʼ cholbeyel skʼoplal liʼi yame skoltayat.

•  Nopa awaʼiy te ya awil kʼoem te bin yak ta kʼoel ta pasele

•  Lebeyaxan skʼoplal

•  Te bin ya yalik yantik jchʼieletik

 Kʼalal ya akʼopon te Biblia ya xjuʼ jich ya apas ini:

1.   Tsaa junuk te bin ya akʼan ya anopbey skʼoplale. Jaʼniwan te bin kʼot ta pasel ta skuxlejalik te machʼatik ya yalbey skʼoplal te Biblia, te bin ya yalbey skʼoplal te Evangelio o te audiodramaetik te ay ta jw.org.

2.   Kʼopona te bin ya scholbey skʼoplal. Ya xjuʼ ya akʼopon ta atukel o sok te afamilia o awamigotak. Ya xjuʼ te jtul machʼa ya skʼopon te bintik kʼot ta pasele, te yantike ya xjuʼ ya skʼoponik te bin la yalik te machʼatik ya yichʼ cholbeyel skʼoplal tey-ae.

3.   Pasa awil ini:

   •   Pasa dibujar te bin la akʼoponbey skʼoplale o pasa bayal dibujoetik te ya scholbey skʼoplal te bintik kʼot ta pasele. Tsʼibaya chaʼoxpʼaluk te bin ya xchiknaj ta ilel ta dibujo.

   •   Kʼalal ya akʼopon ta Biblia te bin kʼax ta skuxlejal jtul j-abat yuʼun Dios, tsʼibaya te bintik la spas, te taleliletik la yakʼ ta ilel sok te bendicionetike la sta yuʼune.

   •   Cholbeya skʼoplal te bintik kʼot ta pasele. Nopa awaʼiy te ajokinej tey-a te machʼatik yakat ta snopbeyel skʼoplal, te ya apasbey jojkʼoyeletik sok te ya xkʼopojat sok te machʼatik la yilik te bin kʼot ta pasele.

   •   Teme ay bin ma lek la spas te machʼa yakat ta snopbeyel skʼoplale, jeltaybeya skʼoplal te bin la spase. Jun ejemplo, nopa awaʼiy ta swenta te Pedro te la smuk ta yoʼtan te Jesús (Marcos 14:66-72). ¿Bin-a te la skʼan la spas te Pedro te kʼalal la sta tenel?

   •   Nopa awaʼiy te jaʼ kʼax ta akuxlejal te bin la anopbey skʼoplale sok tsʼibaya. Jaʼnix jich tsʼibaya te bintik la yakʼbat anope (Romanos 15:4).

 Teme ya awilbey skʼoplal ta lek te bin yakat ta skʼoponel ta Bibliae, ya xjuʼ te ay bin mukʼ skʼoplal ya ata. Ya xjuʼ ya ata chaʼoxpʼal kʼopetik te ay bin tulan skʼoplal ya yakʼik ta naʼel.

 Jun ejemplo, paja te bin ya yal Mateo 28:7 sok Marcos 16:7.

•    ¿Bin yuʼun te Marcos la yal te ya xchiknaj te Jesús ta stojol te jnopojeletik «soc te Pedro»?

•  Nopa awaʼiy ini: Te Marcos maba tey ay-a, jich yilel te jaʼ cholbot yaʼiy yuʼun te Pedroe.

•  ¿Bin ya yakʼ jnoptik? ¿Bin yuʼun akʼbot slamalil kʼinal la yaʼiy te Pedro kʼalal la snaʼ te ya skʼan ya x-ilot yuʼun te Jesuse? (Marcos 14:66-72). ¿Bin-utʼil la yakʼ ta ilel te Jesús te jaʼ jun lekil amigo? ¿Bin-utʼil ya xjuʼ ya atʼunbey stalel te Jesús teme ya akʼan te lekil amigo ya xkʼoate?

 Yame amulanxan snopel te Biblia teme ya anop awaʼiy te tey yakat ta yilel-a te bin yak ta kʼoel ta pasel sok teme ya alebeyxan skʼoplale.