TE BINTIK YA SJOJKʼOYIK TE JCHʼIELETIK
¿Labal yichʼ pasel te kuxlejalile o talemotik ta max? Schanebal parte: ¿Bin-utʼil ya jcholbey skʼoplal te bin yuʼun ya jchʼuun te la yichʼ pasel te kuxlejalile?
Schʼuunej awoʼtan te ay jtul Jpaswaneje, pero ya xiwat ta scholbeyel skʼoplal ta eskuela. Ya awil te libroetik awuʼun te ya yakʼ ta nopel te talemotik ta max sok ya xiwat te ya awichʼ labanel yuʼun te maestroetik sok te ajoʼtake. ¿Bin-utʼil ya xjuʼ ya akoltay sok spisil awoʼtan te bintik achʼuuneje?
¡Ayukme yip awoʼtan! ¡Ya xjuʼ awuʼun!
Yaniwan ya anop: «Maʼyuk bayal jpʼijil swenta ya jcholbey skʼoplal te bitʼil talemotik ta max sok yantik temaetik ta swenta siensia». Jich la yaʼiy sba jtul achʼix te Danielle sbiil te jich ya yal: «Ma jmulan-a te bitʼil ya jelontesbey skʼoplal te bin schʼuunejik te maestroetik kuʼun sok te joʼtake». Te Diana jaʼnix jich kʼax ta stojol, jich la yal: «Kʼax wokol ya kil te kʼalal ya yalbonik skʼoplal kʼopetik ta swenta siensia».
Julukme ta awoʼtan: Te bin ya akʼan ya xlokʼ awuʼune ma jaʼuk te ya stsalawanat ta aʼiyeje. Jaʼnix jich, ma puersauk bayal apʼijil swenta ya acholbey skʼoplal te bin yuʼun ay swentail o rason awuʼun te ay jtul Jpaswanej yuʼun te Balumilal sok bintik ay ta chʼulchane.
Te bin ya xjuʼ ya apas: Tuuntesa te bin smelelil ya yakʼ ta naʼel sok te maba tulan ta ichʼbeyel swentail te bin ya yal ta Hebreos 3:4: «Como spisil nahetic ay machʼa pasot yuʼun, pero ha Dios te la spas spisil bintic ay».
Jtul jchʼiel achʼix te Carol sbiil jich ya scholbey skʼoplal te teksto-abi: «Nopa awaʼiy te ayat ta teʼtikil te namal aye, pero ya ata ta ilel jchʼix lapis tey-a. ¿Bin ya awal yuʼun? Jpisiltik ya kaltik te ay machʼa la yijkʼitay jilel tey-ae. Swenta ya xchiknaj te lapis ta teʼtikil la skʼan te ay machʼa la yijkʼitay jilel. Jaʼnix jich, swenta ya xchiknaj spisil te bintik ay ta Balumilal sok ta chʼulchan, la skʼan te ay machʼa la spase».
Teme ay machʼa jich ya yalbat: «Teme yuʼun-nix ay jtul Jpaswanej-ae, ¿machʼa pasot yuʼun?».
Ya xjuʼ ya asut: «Manchukme bayal bintik ma jnaʼbeytik skʼoplal yuʼun te Jpaswaneje, ma skʼan ya yal te maba kuxule. Jich bitʼil, maniwan ya anaʼbey skʼoplal ta lek te machʼa la spas te aselulare, pero ¿mabal jichuk te schʼuunej awoʼtan te ay machʼa la spase? [Maliya te ya sutbat te akʼope.] Melelnix-a te ay bayal bintik ma jnaʼbeytik skʼoplal ta swenta te Jpaswanej, pero ay bayal bintik ya xjuʼ ya jnatik. Teme ya akʼane, ya xjuʼ ya jcholbat cheʼoxebuk».
Chajpana aba ta lek
Te Biblia ya yal: «Chapaluquex me spisil ora ta sjacʼbeyel scʼop te machʼa ya sjocʼobeyex te bin utʼil ay scʼoblal te smucʼul awoʼtanic». Jaʼ-abi ya skʼan ya yal te ya jnaʼtik scholbeyel skʼoplal ta lek te bin jchʼuunejtike. Pero ya skʼan ya jpastik sok lekil talelil, jich ya yalxan te bersikulo: «Mansohuc me awoʼtanic soc ichʼbiluc me ta cuenta hich yac apasic» (1 Pedro 3:15). Jaʼ yuʼun, ay cheb te bin mukʼ skʼoplal ya skʼan ayuk ta koʼtantike: jaʼ te bin ya kaltik sok te bin-utʼil ya kaltike.
Bin ya awal. Tulanme skʼoplal te kʼuxuk ta awoʼtan te Dios, jaʼ-abi ya stijbat awoʼtan skoltaybeyel skʼoplal. Pero teme jaʼnax ya awalbey yantik te kʼux ta awoʼtan te Diose, ma xjuʼ ya atijbey yoʼtanik ta schʼuunel te yuʼun-nix kuxul-a te Diose sok te jaʼ la spas spisil bintik aye. Jaʼ lek te ya atuuntes ejemploetik yuʼun te bintik pastiklanbil te ya yakʼ ta naʼel te ay rason kuʼuntik ta schʼuunel te la yichʼ pasel te kuxlejalile.
Bin-utʼil ya awal. Schʼuunejuk awoʼtan te bin ya awale, pero lekukme atalel ya awakʼ ta ilel, mame chopoluk ya awil te bin ya spas te yantike. Te ants winiketik leknax ya schʼam yaʼiyik kʼalal mukʼ skʼoplal ya awil te bin ya schʼuunike sok te ay derecho yuʼunik te yan-a te bin ya snopike.
«Mame xa awutsʼinbey yoʼtan te yantik sok te ya awakʼ ta ilel te ya ana spisile. Mame ayuk bin lek ya xlokʼ awuʼun-a teme ma lek ya yaʼiy sbaik yuʼun te bin ya awale» Jich la yal te: Elaine.
Aʼtejibaletik te ya skoltayat ta scholbeyel skʼoplal te bin achʼuuneje
Jich bitʼil ya skʼan chapal ya xbaat te kʼalal ya xtal te jaʼale, jaʼnix jich ya skʼan chapalukat te kʼalal ya akoltaybey skʼoplal te bin achʼuuneje
Ya skʼan te chapalukat. Te Alicia jich ya yal: «Teme maba chapalate, jaʼ ya akʼan te maʼyuk bin ya awale swenta maba ya ata kʼexlal-a». Jaʼnix te Jenna jich ya yal: « Kʼalal ya jcholbey skʼoplal te bin jchʼuuneje sok te ya jtuuntes jun ejemplo te maba tulan ta ichʼbeyel swentail sok te smelelil te bin ya yale, leknax ya kaʼiy jba yuʼun».
¿Banti ya xjuʼ ya ata lekil ejemploetik? Bayal jchʼieletik ay staojik ta aʼtejibaletik ini:
Te foyeto ¿Es la vida obra de un Creador?
Te foyeto El origen de la vida. Cinco cuestiones dignas de análisis
Te bideo Las maravillas de la creación revelan la gloria de Dios
Te seksion «¿Casualidad o diseño?» te ay ta rebista ¡Despertad! (baan ta BIBLIOTECA EN LÍNEA Watchtower sok tsʼibaya ta buscador te kʼopil: “casualidad o diseño” [mame xchʼay ta awoʼtan stsʼibayel te komiyaetik])
Jaʼnix jich ya ata informasion ta sbabial yoxebal parte yuʼun te seksion ini te sbiil: «¿Labal yichʼ pasel te kuxlejalile o talemotik ta max?». Te artikuloetik jaʼ ini:
¿Yabal skʼan ya jchʼuun te talemotik ta max yuʼunax te ay machʼatik jich ya yalike?
¿Bin yuʼun ya skʼan ya jchʼuun te la yichʼ pasel te kuxlejalile?
Te bin ya xjuʼ ya apas: Lea ejemploetik te ya yakʼbat schʼuun awoʼtan te bin anopoje, jichme maba wokol ya awaʼiy sjultesel ta awoʼtan sok te ya acholbey skʼoplal sok spisil awoʼtan. ¡Aa, pero mame xchʼay ta awoʼtan spasel ensayar te bin ya xbajtʼ awale!