TE BINTIK YA SJOJKʼOYIK TE JCHʼIELETIK
¿Lekbal te sjoynix ta winikil o ta antsil te ya smulan sbaike?
«Kʼalal kʼunkʼun la jta kaʼbilale, te bin wokolxan la kaʼiye jaʼ te jajch jmulan te joy ta keremile. La jkuy te oranax ya xkʼaxe, pero ma juʼem kuʼun yijkitayel» (David, te 23 yaʼbilale).
Te David schʼuunej Dios sok ya skʼan ya schʼuunbey te skʼope. ¿Yabal xjuʼ yuʼun spasel te bin ya xkʼanbot yuʼun te Diose? ¿Bin ya snop te Dios ta swenta te machʼa sjoynix ta winikil o ta antsil te ya smulan sbaike?
¿Bin ya yal te Biblia?
Te bin ya snop te ants winiketik ta swenta te machʼatik sjoynix ta winikil o ta antsil ya smulan sbaike ya xjelon te kʼalal ya xkʼax bael te jaʼbil o jaʼ chikan te bin costumbre ay yuʼunike. Pero te j-abatotik yuʼun te Dios ma jaʼuk ya jtʼuntik te bin ya snopik spisil te ants winiketike. Ma jkʼantik «te bayuc ya xʼicʼototic bahel yuʼun biluc nohptesel», jich bitʼil ya yal Efesios 4:14. Jaʼme ya jtʼuntik te bin ya yal te Biblia ta swenta te machʼatik sjoynix ta winikil o ta antsil ya smulan sbaik sok yantikxan te bin ya yichʼ pasele.
Te Biblia jamal ya yalbey skʼoplal te machʼatik sjoynix ta winikil o ta antsil ya smulan sbaike. Kiltik te bin ya yale.
«Ma me xwayat soc winic hich te bin utʼil ya xwayat soc ants» (Levítico 18:22).
«Ihquitayotic yuʼun Dios ta spasel bintic chopol ya snop ta yoʼtanic, [...] ta spasel te bin ya scʼan yoʼtanic te qʼuexlaltic sba ta pasel. Te antsetic yuʼunic la syanijtesic te stalelic te bin utʼil ya sjoquin sba soc winic» (Romanos 1:24, 26).
«Ma me sloʼloybeyex awoʼtanic: te jpas-muliletic, te machʼatic schʼuhunejic lotil diosetic, jʼantsiwejetic, machʼatic smohlol sba ta winiquil o ta antsil te ya sjoquin sbahic, jʼeleqʼuetic, machʼatic ay stʼutʼilic, jyacubeletic, jʼixtaʼcʼopetic, jloʼloyej-biluquetic, haʼic ini ma ba ya xʼaʼbot yichʼic te cuentahinel yuʼun Dios» (1 Corintios 6:9, 10).
Te mantaliletik yuʼun te Dios akʼbilotik ta jpisiltik. Chikan bin-a te ya smulan spasel te jbakʼetaltike, ta jpisiltik ya skʼan ya jpastik tulan yuʼun jnaʼtik skomel jbatik swenta ma jpastik te bin ma smulan te Diose (Colosenses 3:5).
¿Yabal skʼan ya yal-abi te...?
¿Yabal skʼan ya yal-abi te ya yal te Biblia te ya skʼan ya jpʼajtik te machʼatik jich ya spasike?
Maʼuk. Te Biblia ya yakʼ ta nopel te maʼyuk machʼa ya skʼan ya jpʼajtik o ya kilintaytik. Ya yalbotik te lamaluk koʼtantik sok spisil te ants winiketik manchukme yanyantik-a te skuxlejalike (Hebreos 12:14). Jaʼ yuʼun, maba lek te ya jlabantik, te ya jkontraintik o ya kutsʼintik te machʼatik jaʼnix sjoy sbaik ta winikil o ta antsil te ya smulan sbaik.
¿Yabal skʼan ya yal te j-abatotik yuʼun te Jehová ya jkontraintik te leyetik te ya yal te ya xjuʼ ya xnujpun jtul winik sok yan winik o jtul ants sok yan ants?
Te Biblia ya yal te jaʼnax lek ya yil Dios te ya xnujpun jtul winik sok jtul ants (Mateo 19:4-6). Te j-abatotik yuʼun te Dios maba ya jkoltaybeytik skʼoplal ni jaʼuk ya jkontraintik te leyetik te ya yal te xjuʼ ya xnujpun jtul winik sok yan winik o jtul ants sok yan ants. Teme ya jkoltaybeytik skʼoplal o ya jpʼajtik jun ley ta swenta-abi jich kʼoem te yak jchʼikbel jbatik ta política. Pero te Biblia ya yalbotik te ma skʼan ya jchʼik jbatik ta política (Juan 18:36).
Pero ¿jaxan teme...?
Pero ¿jaxan teme ay machʼa jich yak ta spasel? ¿Yabal xjuʼ ya sjelontes te skuxlejale?
Yak. Te Biblia ya yal te ay jich la spasik te ants winiketik ta sbabial siglo. Kʼalal te Pablo la stikun bael jun carta ta stojol te corintioetik la yal ta jamal te maba ya x-ochik ta Wentainel yuʼun te Dios te machʼatik sjoynix ta winikil o ta antsil ya sjokin sbaik ta wayel, sok jich la yalxan: «Ay hich ayex ta namey» (1 Corintios 6:11).
¿Yabal skʼan ya yal-abi te maʼyukix bin-ora ikʼbotix yoʼtanik te bin la yijkitayike? Maʼuk, aynix ikʼbot yoʼtanik. Te sKʼop Dios jich ya yal: «La alapiquix te yachʼil acuxlejalic, te xquechet ta achʼubel» (Colosenses 3:10). Jichnix-a, kʼunkʼunme te ya jelontestik te jkuxlejaltike.
Pero ¿jaxan teme yato smulan te sjoy ta winikil o ta antsil te machʼa ya skʼan ya schʼuun te smantal te Diose?
Jichnix bitʼil te yantik bin ya smulan te jbakʼetaltike, te ants winik jaʼnix ya sta ta nopel teme ya skom o ya yakʼ sba ta tsalel yuʼun te bin ya skʼan te sbakʼetale. ¿Bin-utʼil ya skom sba? Te Biblia jich ya yal: «Acʼa me swentainex spisil ora te Espiritue. Jich ma ba ya apasic te bila ya smulan spasel te abaqʼuetalique» (Gálatas 5:16, Xchʼul Cʼop Dios ta Tzeltal yuʼun Oxchuc soc Tenejapa).
Te versículo ini maba ya yal te jkʼaxel ma x-ikʼbotix yoʼtan ta spasel te bin ya smulan te sbakʼetale. Te bin ya yale, jaʼ teme ya skʼaytes sba ta snopel te Biblia sok te spisil-ora ya spas oración, jichme ya sta yip yuʼun ya stsʼik te bin ya skʼan yoʼtan sok jich maba ya spas.
Te David, te la kalbeytik skʼoplal ta sjajchibale, jich la spas sok juʼ yuʼun skomel sba, jaʼnix jich la yalbey te smeʼ stat te bin yak ta kʼaxel ta stojole. Jich ya yal: «Xkuxet kʼinal la kaʼiy, jaʼniwan la skoltayon ta smulanel te jkeremil te lajuk kalbey ta oranax te jmeʼ jtate».
Kʼalal jaʼ ya jchʼuuntik spasel te mantaliletik yuʼun te Jehová jaʼ ya yakʼ stseʼelil koʼtantik. Jnaʼojtik te mantaliletik yuʼun te Jehová «toj ayic stuquel» sok «ya yacʼ tseʼejinuc oʼtanil», sok teme ya jpastik ta jkuxlejaltike yame yakʼbotik jmajtantik (Salmo 19:8, 11).
