Te testigoetik yuʼun Jehová ya stsob sbaik cheb buelta ta jun semana ta sNail Tsoblejetik. ¿Bin ya spasik tey-a? ¿Bin ya ata-a teme ya xbaate?

•  ¿Bin ya yichʼ pasel tey ta sNail Tsoblejetik?

•  ¿Bin yuʼun lek teme ya xbaate?

•  Te bin ya yalik yantik jchʼieletik

 Ta sNail Tsoblejetik ya yichʼ akʼel nojptesel ta swenta Biblia te ya xtuun kuʼuntik ta jkuxlejaltik. Te tsoblejetik te ya yichʼ pasel tey-a ya skoltayat ta:

•   Snopel te smelelil ta swenta Dios.

•   Snaʼbeyel swentail te bin yak ta kʼoel ta pasel ta ora ini.

•   Slekubtesel atalel.

•    Stael smelelil awamigotak.

  Te bin ya yichʼ alel tey-a ya skoltayat. Te nojptesel ya yakʼ te Biblia te ya yilbeyik skʼoplal ta tsoblejetik te testigoetik yuʼun Jehová, ya skoltayat swenta ya ata spʼijil awoʼtan (Proverbios 4:5). Te Biblia ya skoltayat swenta lek te bin ya ata ta nopel spasele. Jaʼnix jich ya yakʼbey sujtib jojkʼoyeletik te mukʼik skʼoplal, jich bitʼil ini:

•   ¿Bin swentail te kuxulotike?

•   ¿Jaʼbal smul Dios te ay jwokoltike?

•   ¿Bin ya xkʼot ta jwentatik te kʼalal ya xlajotike?

 Cheʼoxeb nojpteseletik te ya jchʼam kaʼiytik ta tsoblejetik te ya yichʼ pasel ta slajibal semana jaʼik ini:

•   ¿Bin yuʼun ya skʼan ya kakʼ jbatik ta tojobtesel yuʼun te Bibliae?

•   ¿Machʼa ya xjuʼ ya skoltayotik te kʼalal bin-ora ayotik ta wokol?

•   ¿Bin yakal spasbel ta jtojoltik te Wentainel yuʼun Dios?

 «Jtul joy ta clase kʼot ta tsoblej. Jun-nax jujkaj sok te jfamilia sok la kakʼbeykotik yil te junetik la yichʼ ilbeyel skʼoplale. Ta patil la yalbon te bayal la smulan te sujtib ya yakʼik te kʼalal ya yichʼ pasel jojkʼoyeletik. Jaʼnix jich la yal te maʼyuk yuʼunik ta iglesia te banti ya xbajt te junetik ay kuʼunkotike» (xchi te Brenda).

 ¿Anaʼojbal-a? Ma tojbil te ochibal ta sNail Tsoblejetik sok maʼyuk bin-ora ya yichʼ kʼanel takʼin tey-a.

 Te machʼatik ya anaʼbey sba tey-a ya xbajt yakʼbat yip awoʼtan. Te Biblia ya yal te ya stsob sbaik te jchʼuunjeletik swenta talel kʼaxel ya yakʼbey sba yip yoʼtanik (Hebreos 10:24, 25). Te ants winiketik ta kʼajkʼal ini ma xyichʼ sbaik ta wenta, jaʼ yuʼun ya yakʼ yip koʼtantik te kʼalal ya jokintik te machʼatik mukʼ skʼoplal ta yoʼtanik te Dios sok te ya yichʼik ta wenta te yantike.

 «Ay baeltik te jmeloj koʼtan sok lujben ya kaʼiy jba te kʼalal ya xboon ta sNail Tsoblej, pero te machʼatik ya xkʼotike ya yakʼbonik stseʼelil koʼtan. Te kʼalal ya sujton ta jnae, kʼax lek ya kaʼiy jba sok ayix-xan yip koʼtan-a» (xchi te Elisa).

 ¿Anaʼojbal-a? Ta swolol Balumilal kʼaxem ta 120 mil kongregasionetik yuʼun te testigoetik yuʼun Jehová sok kʼaxem ta 60 mil sNail Tsoblejetik. Ta jujun jaʼbil ayniwan 1,500 sNail Tsoblejetik ya yichʼ pasel ta swenta te yak ta pʼolel te machʼatik ya xkʼotik ta tsoblejetike. a