Te kʼalal ay kamigotik ya yakʼbotik stseʼelil koʼtantik sok ya skoltayotik ta jkuxlejaltik. Te lekil amigoetike ya yakʼ kakʼtik ta ilel sok te yakuk jlekubtestik te lekil taleliletik kuʼuntike (Proverbios 27:17).

 Te Biblia ya yal te ya skʼan ya jtsatik ta lek te kamigotaktike sok ya yalbotik te bintik wokolil ya jtatik teme ma jichuk ya jpastike (Proverbios 13:20; 1 Corintios 15:33). Teme chopol te kamigotike ya xjuʼ ya yutsʼin te jtaleltik sok ya xjuʼ ya jta jwokoltik ta jkuxlejaltik.

Ta artículo yame xbajt kiltik:

•  ¿Bin yilel te lekil amigoe?

•  ¿Aybal ejemploetik ta Biblia ta swenta lekil amigoetik?

•  ¿Yabal xjuʼ kamigointik te Diose?

•  Texto yuʼun Biblia te ya yalbey skʼoplal te amigoetike

 Te Biblia ya yal te lekil amigoetike ma jaʼuk te ay machʼa ay bin pajal ya smulanik o te bin pajal ya skʼan ya spasik. Ya jtatik jun ejemplo, ta Salmo 119:63 te jich ya yal: «Ha jmohlol spisil te machʼatic ya a xiʼat, te ya schʼuhunic spasel te mandariletic awuʼune». Te machʼa la stsʼibay te salmo ini ya yakʼ ta ilel te jaʼ ya skʼan ya yamigoin te machʼa lek ya skʼan ya x-ilot te Diose sok te ya spasbey te smantale.

 Te Biblia ya yal bin yilel stalel te jun lekil amigoe. Jich bitʼil:

•   «Te machʼa jun yoʼtan sbahic, spisil ora ay scʼuxul yoʼtan, soc hich cʼohem te bin utʼil sbanquil ta yorahil wocol» (Proverbios 17:17).

•   «Ay machʼatic te jun yoʼtan sbahic te ya xjihnawanic, soc ay machʼatic te cʼax hich jun yoʼtan sbahic te bin utʼil te machʼa jun smeʼstat soque» (Proverbios 18:24).

 Te versiculoetik ini ya yakʼ kiltik te jun lekil amigo ya skʼan te jun yoʼtan, te ay skʼuxul yoʼtan, te ay slekil yoʼtan sok te ay yutsil yoʼtan. Te smelelil amigoe ya skoltayotik spisil-ora. Jaʼnix jich jamal ya yalbotik teme ay bin maba lek ya jpastik o teme ay bin maba lek te ya jnop ya jpastike (Proverbios 27:6, 9).

 Ta Biblia ya jtatik lekil ejemploetik te ay machʼa la yamigoin sbaik te yanyantik skuxlejalik, stsʼumbalik, yaʼbilalik sok yaʼtelik. Kiltik oxeb ejemploetik.

•   Te Rut sok Noemí. Te Rut jaʼ yalib te Noemí, jaʼ yuʼun ya jnaʼtik te jaʼ pekʼel yaʼbilal sok te yan slumal te Rute. Manchukme jich-abi, la yamigoin sbaik sok talel kʼaxel kʼux la yaʼiy sbaik (Rut 1:16).

•   Te David sok Jonatán. Jich yilel te jaʼ ayix yaʼbilal te Jonatán ayniwan 30 jaʼbil yiloj sba sok te Davide, pero te Biblia ya yal te «la yamigoin sbaik ta lek» (1 Samuel 18:1, TNM).

•   Te Jesús sok te jpuk-kʼopetik. Te Jesús yichʼoj mukʼ yaʼtel ta stojol te jpuk-kʼopetike melel jaʼ smaestroik sok jaʼ yajwalik (Juan 13:13). Manchukme jich-abi la yamigoin te jpuk-kʼopetike sok jaʼnix jich la yamigoin te machʼatik ya x-aʼiybot te skʼope. Jich la yal: «La jcalbeyex te jun coʼtan jbahtic [o kamigo jbatik], como spisil te bin la jcaʼiy ta stojol te Jtat la jcaʼbeyex anaʼic» (Juan 15:14, 15).

 Yak, ya xjuʼ ya kamigointik te Diose. Te Biblia ya yal: «Te jun yoʼtan sba soc [o yamigoinej] te machʼatic toj yoʼtan» (Proverbios 3:32). Te bin ya skʼan ya yal te textoe, jaʼ te jaʼnax ya yamigoin Dios te machʼatik lek stalelik, te ma spasik lot sok te ya spasik tulan ta skuxlejalik yuʼun ya spasik te smantale. Jich bitʼil te Biblia ya yal te la yamigoin Dios te Abrahán (2 Crónicas 20:7; Isaías 41:8; Santiago 2:23).