Jich yilel te Miguel o «san Miguel», jich bitʼil la yalik cheʼoxeb religionetik jaʼ te sbiil ya yichʼ akʼel te Jesús ta Biblia te kʼalal mato xtal ta Balumilal-a sok te kʼalal chaʼsujt moel ta chʼulchan. a Te sKʼop Dios ya yal te Miguel la stij sba ta kʼop sok te Pukuj ta swenta te sbakʼetal te Moisés soknix la skoltay jtul chʼul-abat te tikunbil tal yuʼun te Dios yuʼun ay bin ya xbajt yalbey te j-alwanej Daniel (Daniel 10:13, 21; Judas 9). Te Miguel ya skoltaybey skʼoplal te yaʼtel te Jehová sok ya spas guerra sok te skontratak te Diose, jaʼ yuʼun snujpʼ te ya yichʼ te biilil Miguel, te ya skʼan ya yal «¿Machʼa pajal sok te Diose?» (Daniel 12:1; Apocalipsis 12:7).

 Kilbeytik skʼoplal bin yuʼun te ya xjuʼ ya kaltik te Jesús jaʼ te arcángel Miguel.

•   Te Miguel jaʼ «te arcángel» (Judas 9). Te biilil arcángel ya skʼan ya yal «jwolawal o jtsobaw yuʼun chʼul-abatetik» sok jaʼnax ya xchiknaj ta cheb versiculoetik ta Biblia. Ta schebal te versÍculo ini, te kʼopil arcángel jtulnax chʼul-abat ya yalbey skʼoplal jich ya yakʼ ta ilel te jaʼnax jtul chʼul-abat te yichʼoj te biilile. Jun versículo ya yalbey skʼoplal te kʼalal te Jesús chaʼkuxajemix-ae, jich ya yal: «Haʼnix te Cajwaltic ya xco talel ta chʼulchan ta scuenta tulan aw ta mandar soc scʼop jtsobaw chʼul aʼbat» (1 Tesalonicenses 4:16). Jich bitʼil ya yal te versículo ini, te Jesús ya xkʼopoj jich bitʼil skʼop jtsobaw yuʼun chʼul-abat. Jaʼ yuʼun ya xjuʼ ya kaltik te Jesús jaʼ te arcángel Miguel te jtsobaw yuʼun chʼul-abatetik.

•   Te Miguel jaʼ jwolawal yuʼun te ipal chʼul-abatetik ta chʼulchan. «Te Miguel soc te chʼul aʼbatetic yuʼun la stsal sbahic soc te dragón», te jaʼ te pukuje (Apocalipsis 12:7). Yichʼoj tulan yaʼtel ta chʼulchan, jaʼ yuʼun te Biblia ya yakʼbey sbiilin: «Jtuhl jtsobaw yuʼun te príncipaletic» sok «te mucʼul príncipal» (Daniel 10:13, 21; 12:1). Te kʼalal jich ya yichʼ albeyele, jaʼ jich ya yichʼ naʼbeyel sba te «jaʼ jnitawal yuʼun spisil te chʼul-abatetik». Jaʼ jich ya yichʼ albeyel skʼoplal te Miguel ta Nuevo Testamento yuʼun te David Aune.

   Te Biblia jaʼnix jich ya yalbey yan sbiil te machʼa yichʼoj tulan yaʼtel ta stojol spisil te chʼul-abatetik. Ya yalbey skʼoplal te «ya xchicnaj cohel tal ta chʼulchan ta yohlil yat cʼahcʼ te Cajwaltic Jesús soc te chʼul aʼbatetic yuʼun te ay yipic» (2 Tesalonicenses 1:7, 8; Mateo 16:27). Soknix 1 Pedro 3:21, 22 ya yal te Jesús «mohix ta chʼulchan soc [...] scuentahinej chʼul aʼbatetic soc te machʼatic ay yaʼtelic soc te ay yuʼelique». Ma snujpʼuk te ya kaltik te Dios yakʼojbey yaʼtel te Jesús sok te Miguel yuʼun jtsobaw yuʼun te chʼul-abatetike. Jich yuʼun-abi te biilil Miguel jaʼnix te Jesuse.

•   «Ya xhahch te Miguel [ta] yorahil bayel wocol» (Daniel 12:1). Ta libro yuʼun Daniel te kʼopil «ya xhahch» ya skʼan ya yakʼ ta naʼel te ay jtul ajwalil te ya xjajch ta spasel jun aʼtelil te kʼax mukʼ skʼoplal (Daniel 11:2-4, 21). Te Jesucristo te ya sbiilin «scʼop Dios», ya xbajt aʼtejuk jich bitʼil «ajwalil yuʼun ajwaliletic» yuʼun ya slajinlan te skontratak te Dios sok ya skanantay te lum yuʼune (Apocalipsis 19:11-16). Yame spas ta yorail tulan wokol «te mayuc hich cʼohem ta pasel ta shachel to tal bahlumilal» (Mateo 24:21, 42).