Te Biblia ya stij koʼtantik ta yakʼel te bin ay kuʼuntik sok te stojiluk ya kakʼtike. Te kʼalal jich ya jpastike, ma jaʼuknax ya sta slekilal te machʼa ya yichʼ te bin ya jkʼebantike, jaʼnix jich ya jta jlekilaltik-euk (Proverbios 11:25; Lucas 6:38). Te Jesús jich la yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hechos 20:35).

•  ¿Bin-ora snujpʼ te ay bin ya jkʼebantike?

•  ¿Bin-ora ma snujpʼuk te ay bin ya jkʼebantike?

•  Te bin ya yal te Biblia ta swenta te ay bin ya jkʼebantik

 Te kʼalal ya xlokʼ ta koʼtantik te bin ya kakʼtike, ay bin lek ya xlokʼ-a. Te Biblia jich ya yal: «Jujutuhl acʼa yacʼ ha chican te hich yipal snopoj ta yoʼtan te ya yaqʼue, ma ta scuentahuc mel-oʼtan o ta sujel, como cʼux ta oʼtanil yuʼun Dios te machʼa tseʼel yoʼtan ya yaqʼue» (2 Corintios 9:7).

 Te Dios ya skʼan te yakuk xlokʼ ta yoʼtanik te bin ya yakʼik te j-abatetik yuʼune (Santiago 1:27). Te kʼalal ya jkoltaytik te machʼatik maʼyuk bayal bin ay yuʼunik, yakotik ta aʼtel sok te Dios, sok jich ya yil te ay bin la kakʼbeytik smajan kʼoem (Proverbios 19:17). Te Biblia ya yal te ya smajtantesotik te Diose (Lucas 14:12-14).

 Te kʼalal ay bin ya jkʼebantik yuʼun-nax ya jta jlekilaltik. Jich bitʼil:

•   Yuʼun ya jtoy jbatik ta stojol te yantik (Mateo 6:2).

•   Yuʼun ya jkʼantik te ayuk bin ya spasik ta jtojoltik (Lucas 14:12-14).

•   Yuʼun ya jkʼantik te yakuk jtatik te jkoleltik (Salmo 49:6, 7).

 Te kʼalal ay bin ya jkʼebantik te ya yichʼ tuuntesel ta spasel te bin ma lek ya yil te Diose. Ma lek te ya kakʼbeytik takʼin te machʼa ya stuuntes ta tajimal o yuʼun ya sman yuchʼ trago o droga (1 Corintios 6:9, 10; 2 Corintios 7:1). Jaʼnix jich ma lek teme ya kakʼbeytik takʼin te machʼa ya xjuʼ ya x-aʼtej pero ma skʼan aʼtel (2 Tesalonicenses 3:10).

 Te kʼalal jaʼ bayalxan ya kakʼbeytik te yantik, pero maba ya kakʼbeytik stukel te jfamiliatik. Te Biblia ya yal te mamalalil ya skʼan ya yakʼbey te bin ya xtuun yuʼun te sfamilia (1 Timoteo 5:8). Ma snujpʼuk teme bayal bin ya skʼebanbey te yantik pero teme jaʼ maʼyukix bin ya yakʼbey te sfamiliae. Jaʼnix jich te Jesús ma lek la yil te machʼatik maba la yakʼbey te bin ya xtuun yuʼun te smeʼ statik te meʼel mamalikix, ta skaj te la yalik te jaʼ majtanil te yakʼojbeyikix te Dios te bintik ay yuʼunike (Marcos 7:9-13).