Yak. Te lekil koltayel ya xtal ta stojol «te Dios te ya smucʼubtesbe yoʼtan te machʼatic ayic ta wocol» (2 Corintios 7:6,).

•   Yip oʼtanil. ¿Bin-utʼil te Dios ya yakʼbey smukʼul yoʼtan te machʼatik ayik ta mel-oʼtan? Maniwan ya slajinbat spisil te wokoliletik te ay awuʼune, pero ya yakʼbat awip yuʼun jich ya xjuʼ ya xkujch awuʼun-a (Filipenses 4:13). Ya xjuʼ ya schʼuun awoʼtan te ya yaʼiybat spisil te bin ya awalbeye, melel te Biblia jich ya yal: «Te Jehová nopol ay ta stojol te machʼatic ayic ta mel-oʼtan, soc ya scoltay te machʼatic pichʼil yoʼtanique» (Salmo 34:18). Melel te Dios ya yaʼiybat te akʼop te kʼalal ya akʼanbey koltayel manchukme ma xjuʼ ya acholbey yaʼiy ta akʼop te bin yaʼiyel ya awaʼiy abae (Romanos 8:26, 27).

•   Ejemploetik ta Biblia te ya yakʼ smukʼul koʼtantik. Jtul te machʼa la stsʼibay te salmo jich la yalbey te Dios te kʼalal smeloj yoʼtan: «Cʼalal ta scʼubulil [...] ya cawtayat». ¿Bin koltayot yuʼun maba ya smelix yoʼtan-a? Jaʼ te la sjultes ta yoʼtan te bitʼil te Dios maba ya skʼan te ya jmel koʼtantik yuʼun ta swenta te banti ya xchʼayotike. Jich la yalxan te salmista: «Te yacuc awichʼ ta cuenta te muliletic, ¿machʼa ya xhuʼ te teqʼuel ya xhil? Pero ay perdón ta atojol, scuenta yuʼun ya xʼichʼotat ta mucʼ» (Salmo 130:1, 3, 4).

•   Smukʼul oʼtanil. Ta ora ini te Dios ya yakʼ smukʼul koʼtantik, pero jaʼnix jich ya yalbotik te ta pajel chaʼbej ya xbajt slajin spisil te bintik ya yakʼ jwokoltik sok te tulan mel-oʼtan. Te kʼalal jich ya skʼotes ta pasel, «te bin ay ta nahil [jich bitʼil te tulan mel-oʼtan] mayuquix ta naʼel, jcʼaxel ma xnaʼotix» (Isaías 65:17).

 Nota: Te testigoetik yuʼun Jehová ya smukʼulin koʼtantik te koltayel te ya yakʼ te Dios, pero jaʼnix jich ya jletik te koltayel ta stojol te jpoxtaywanejetik te kʼalal ayotik ta chamel jich bitʼil te tulan mel-oʼtan (Marcos 2:17). Manchukme jich-abi, maba ya kaltik te bin poxil ya skʼan ya atuuntes, melel jujuntul ya jtatik ta nopel te bin poxil ya jtuuntestik.