Kʼalal te Biblia ya stuuntes te kʼopil skʼasesel alal ma jaʼuk ya yalbey skʼoplal te kʼalal ay machʼa spasemal yoʼtan te ya skʼases yale. Pero ay bayal textoetik yuʼun Biblia te ya yakʼ jnaʼtik bin yilel ya yil Dios te skuxlejal te ants winiketik manchukme ayto ta schʼujt snan te alale.

 Jaʼ majtanil yuʼun Dios te kuxlejalile (Génesis 9:6; Salmo 36:9). Spisil te kuxlejalil mukʼ skʼoplal ta yoʼtan te Diose, tey ochem skʼoplal-a te skuxlejal te alal te ayto ta schʼujt te smamae. Jaʼ yuʼun te kʼalal ay machʼa ya smil ta spasemal yoʼtan jtul alal te mato ayineme, la yaʼiy milaw-abi.

 Te ley te la yakʼ te Dios ta stojol te israeletik jich ya yal: «Teme ay winiketik te stsakoj sbaik ta majtamba-a te ya yejchentesik jtul ants te yikʼoj yal sok ya x-ayin te yal te kʼalal mato yorailuk-a, pero maʼyuk machʼa ya xlaj, te machʼa la sta smul yame yakʼ multa chikan jayeb ya skʼan te smamalal te ants sok te bin ya snop te juecetike. Pero teme laj te ants o te yale, yame skʼan ya yichʼ milel-euk te machʼa milawane» (Éxodo 21:22, 23, La Biblia. Traducción del Nuevo Mundo edición 2019 ta español). a

•  ¿Bin-ora ya xjajch ta kuxinel jtul alal?

•  ¿Yabal spasbey perdón te Dios te machʼa ta spasemal yoʼtan la skʼases yale?

•  ¿Lekbal teme ya skʼases yal jtul ants ta skaj te ya xjuʼ ya xlaj te yal o ya xlaj te antse?

 Ta sit te Diose ya xjajch te kuxlejalil te kʼalal ya xjajch ta chiknajel ta schʼujt smama te alale. Ta Biblia, te Dios spisil-ora ya yal te jaʼix jtul ants winik te alal te mato ayineme. Kiltik cheʼoxeb ejemploetik te ya yakʼ ta ilel te pajal ta sit te Dios te alal te ayinemix soknix te alal te mato ayineme.

•   Ta jun buelta te ajwalil David, jich la yalbey te Diose: «La yil asit te hahch ta chicnajel te jbaqʼuetal» (Salmo 139:16). Jich yuʼun ta sit te Diose te David jaʼix jtul ants winik-a manchukme mato ayinem-a.

•   Kiltik yan ejemplo. Te Dios snopojix bin aʼtelil ya yakʼbey spas te j-alwanej Jeremías manchukme mato ayinem-a. Jich la yalbey: «Te cʼalal ma to pasbilat cuʼun ta schʼuht a te anan, la jnaʼbat aba; te cʼalal ma to xʼayinat a, parte la jcacʼat; la jcaʼbat awaʼtel ta jalwanej ta stojol te nacionetique» (Jeremías 1:5).

•   Te Lucas, te jaʼ doctor-a sok te la stsʼibay-euk te Biblia, la stuuntes jpʼal kʼopil ta kʼopil griego swenta ya yalbey skʼoplal te alal te mato ayinem sok te alal te ayinemixe (Lucas 1:41; 2:12, 16).

 Yak, te Dios ya spasbey perdón te machʼatik ta spasemal yoʼtan la skʼases te yalike. Teme jich ya yilik te kuxlejalil te bitʼil ya yil te Diose jichniwan ya yaʼiyik te ma staik perdón yuʼun te bin la spasike, pero te Biblia jich ya yal: «Te Jehová ay scʼuxul yoʼtan soc lec yoʼtan [...]. Hich te bin utʼil snamalil yiloj sbahic banti ya xlocʼ tal cʼahcʼal soc te smahlib cʼahcʼal, hich la snamijtes bahel te jcʼaxun-mandar cuʼuntique» (Salmo 103:8-12). b Te Jehová ya spasbey perdón te machʼatik ya sujtes yoʼtanik ta smelelil yuʼun te smulik la spasik ta nameye, jich bitʼil te skʼasesel alale (Salmo 86:5).

 Ta swenta te bin ya yal te Biblia ta stojol te alal te mato ayineme, ma lek ta kʼasesel te alale manchukme ya xjuʼ ya sta swokol ta patil te nanil o te alale.

 ¿Jaxan teme yorailix ya x-ayin te alal pero teme yak ta yilel bayal swokol te smama sok teme ya skʼan ya yichʼ tsael machʼa-a te ya xkuxin teme jaʼbal te smama o jaʼ te alale? Manchukme ma spisiluk-ora te jich ya xkʼot ta pasele, jaʼme ya skʼan ya staik ta nopel te sfamilia te alal, jich bitʼil te smeʼ state.